23 Jul 2015, 13:50
ދ. ހުޅުދެލީ ކުރީގެ އޮފީސް އިމާރާތުގައި ރޯކޮށްލާފައި ވަނީ ބަޔަކު ގަސްތުގައި ކަމަށް އެ ރަށު ކައުންސިލުން ބުނެފި އެވެ.
ހުޅުދެލީ ކައުންސިލްގެ ރައީސް އާދަމް ޒާހިރު މިއަދު ސަން އަށް ވިދާޅުވީ އެ ރަށުގެ ކުރީގެ އޮފީސް އިމާރާތުގައި ރޭ ފަތިހު 5:30 އެހާކަންހާއިރު އަލިފާން ރޯކޮށްލާފައި ވަނީ ރަށުގައި ހިންގައި ޕްރޮޖެކްޓްތައް ހުއްޓުވުމުގެ ބޭނުމުގައި ބަޔަކު ގަސްތުގައި ކަމަށް ބެލެވޭ ކަމަށެވެ.
އޭނޭ ވިދާޅުވީ ގޮތުގައި ގުދަނެއްގެ ގޮތުގައި ބޭނުންކުރަމުން ގެންދިޔަ އެ ރަށުގެ ކުރީގެ އޮފީސް އިމާރާތުގައި ހުރި ހުރިހާ މުދަލެއް ވަނީ އަނދާ ހުލިވެފަ އެވެ.
އެތަނުގައި ރޯވި އަލިފާންގަނޑު ނިއްވާލެވިފައި ވަނީ ހެނދުނު 8:00 ހާއިރު ކަމަށް ކައުންސިލްގެ ރައީސް ވިދާޅުވި އެވެ.
"ރައްޔިތުން ނުކުމެ އަލިފާންގަނޑު ނިއްވާލެވުނު އިރު އެތަނުގެ ހުރި ހުރިހާ އެއްޗެއް ހުރީ އަނދައި ހުލިވެފައި. އެތަނުގެ ފާރުތައް ވެސް ހުރީ ވެއްޓިފައި،" ކައުންސިލްގެ ރައީސް އާދަމް ޒާހިރު ވިދާޅުވި އެވެ.
އޭނާ ވިދާޅުވި ގޮތުގައި އެތަނުގެ ތެރޭގައި ކައުންސިލުން ކުރިއަށްގެންދާ އެރީނާ ޕްރޮޖެކްޓްގެ މުދަލާއި އެމްޓީސީސީން އެ ރަށުގައި ނަރުދަމާ އެޅުމަށް ގެންގޮސްފައި ހުރި ގިނަ އަދަދެއްގެ ސާމާނު ވެސް އެތަނުގެ ތެރޭ ހުރި ކަމަށެވެ. އޭގެ ތެރޭގައި ގިނަ އަދަދެއްގެ ސިމެންތި ބަސްތާ އާއި ޕްލާސްޓިކް ޖަންކްޝަންތަކެއް ހުންނާނެ ކަމަށް ވިދާޅުވި އެވެ. އަދި ކައުންސިލުން އެތަނުގައި ބަހައްޓާފައި ހުރި ގިނަ އަދަދެއްގެ ފަރުނީޗަރާއި އަށް ކޮމްޕިއުޓާ ސިސްޓަމްގެ އިތުރުން ގިނަ އަދަދެއްގެ އިލެކްޓްރޯނިކް ސާމާނު ގުދަނުގެ ތެރޭ ހުންނާނެ ކަމަށް ވެސް ކައުންސިލްގެ ރައީސް ވިދާޅުވި އެވެ.