22 Jul 2015, 15:21
ށ. ކަނޑިތީމާއި އެ އަތޮޅު ފޭދޫގެ ސިއްހީ މަރުކަޒު މަރާމާތު ކުރުމުގެ މަސައްކަތް ސަރުކާރުން މިއަދު ދެ ކުންފުންޏަކާ ހަވާލުކޮށްފި އެވެ.
ހެލްތު މިނިސްޓްރީގައި އެކަމަށްޓަކައި ބޭއްވި ރަސްމިއްޔާތެއްގައި ފޭދޫ ސިއްހީ މަރުކަޒުގެ މަސައްކަތް ހަވާލުކުރީ އައިއެސް އެފް ކޮންސްޓަރަކްޝަން ނަމަކަށް ކިޔާ ކުންފުންޏެކެވެ. ދެ މަސް ދުވަހުގެ ތެރޭގައި ނިންމާ ގޮތަށް އެކުންފުންޏާ އެ މަސައްކަތް ހަވާލުކުރީ 392790( ތިން ލައްކަ ނުވަދިހަ ދެހާސް ހަތްސަތޭކަ ނުވަދިހަ) ރުފިޔާއަށެވެ.
ކަނޑިތީމު ސިއްހީ މަރުކަޒު މަރާމާތުކުރުމުގެ މަސައްކަތް ހަވާލުކުރީ މުރީދު ކާޕެންޓްރީ ނަމަކަށް ކިޔާ ކުންފުންޏަކާއެވެ. އެފަރާތާ މަސައްކަތް ހަވާލުކުރީ 75 ދުވަހުގެ ތެރޭގައި ނިންމާ ގޮތަށް 227332 (ދެލައްކަ ހަތާވީސްހާސް ތިން ސަތޭކަ ތިރީސް ދެރުފިޔާ) އަށެވެ.
ހެލްތު މިނިސްޓްރީގައި މިއަދު ބޭއްވި ރަސްމިއްޔާތެއްގައި އެ ދެ މަސައްކަތް ހަވާލު ކުރުމުގެ ދެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ހެލްތު މިނިސްޓަރު އިރުތިޝާމް އާދަމެވެ. ރައްޔިތުންގެ މަޖިލީހުގެ ކަނޑިތީމު ދާއިރާގެ މެމްބަރު މުހައްމަދު ހުސައިން ވެސް އެ ރަސްމިއްޔާތުގައި ބައިވެރިވެވަޑައިގެންނެވިއެވެ.
ރަސްމިއްޔާތުގައި ވާހަކަފުޅު ދައްކަވަމުން ހެލްތު މިނިސްޓަރު ވިދާޅުވީ ށ. ކަނޑިތީމުގެ ސިއްހީ މަރުކަޒުގެ ޖާގައިގެ ދަތިކަން ކުރިމަތިވެފައިވާތީ އެމަރުކަޒަށް އިމާރާތެއް އިތުރުކުރުމުގެ މަސައްކަތް ވެސް ވަރަށް އަވަހަށް ކުރުމަށް ނިންމާފައިވާ ކަމަށެވެ.