21 Jul 2015, 14:27
ރައްޔިތުންގެ މަޖިލިސް ހުޅުވާ ދުވަސް އަވަސް ކުރާ ގޮތަށް މަޖިލީހުގެ ގަވާއިދަށް އާންމު ކޮމިޓީން ގެނެސްފައިވާ އިސްލާޙު މިއަދުގެ ޖަލްސާ އިން ފާސްކޮށްފި އެވެ.
މަޖިލީހުގެ ރައީސް އަބްދުﷲ މަސީހު މުހައްމަދު ހުށަހެޅުއްވި އެ އިސްލާހު މިއަދުގެ ޖަލްސާގައި ފާސްވީ 56 މެމްބަރުންގެ ވޯޓުން ނެވެ. އިސްލާހު އެގޮތަށް ފާސްކުރަން ނުފެންނަ ކަމަށް 24 މެމްބަރުން ވޯޓު ދެއްވި އެވެ.
މަޖިލީހުގެ ގަވާއިދަށް ގެނެސްފައިވާ އިސްލާހުގައި ބުނެފައި ވަނީ މަޖިލީހުގެ ފުރަތަމަ ދައުރު ހިނގާނީ ކޮންމެ އަހަރެއްގެ ވެސް ފެބުރުއަރީ މަހުގެ ފުރަތަމަ ދުވަހުން ފެށިގެން އޭޕުރީލު މަހުގެ ނިޔަލަށް ކަމަށެވެ.
މަޖިލީހުގެ ގަވާއިދުގައި ކުރިން ބުނެފައި ވަނީ މަޖިލީހުގެ ފުރަތަމަ ދައުރު ހިނގާނީ ކޮންމެ އަހަރެއްގެ ވެސް މާޗު މަހުގެ ފުރަތަމަ ދުވަހުން ފެށިގެން އޭޕުރީލު މަހުގެ ފުރަތަމަ ދުވަހަށް ކަމަށެވެ.
އާންމު ކޮމިޓީން ފާސްކޮށްފައިވާ އަނެއް އިސްލާހުގައި ބުނެފައި ވަނީ ބިލެއްގެ ފުރަތަމަ ކިއުން އިއްވުމަށް ފަހު ބިލަކާ ގުޅިގެން ހިނގަން ޖެހޭ ކަމަށް މަޖިލީހުގެ ގަވާއިދު ބަޔާންކޮށްފައިވާ ވަކި މަރުހަލާއަކުން ނުވަތަ މަރުހަލާތަކަކުން އެފަދަ ބިލެއް އިސްތިސްނާވާނެ ކަމަށެވެ.
އެހެންނަމަވެސް ބިލަކާ ގުޅިގެން ހިނގަން ޖެހޭ ކަމަށް މަޖިލީހުގެ ގަވާއިދު ބަޔާންކޮށްފައިވާ ހުރިހާ މަރުހަލާއެއް ކުރިއަށް ގެންދިއުމަށް މަޖިލީހުގެ ރައީސް ހުށަހަޅާ ހުށަހެޅުމަކުން ނުވަތަ އިތުރު ބަހުސަކާ ނުލާ މަޖިލީހުން ފާސްކުރާ ފާސްކުރުން ކަމަށް ކަނޑައެޅިދާނެ ކަމަށް ވެސް ގަވާއިދަށް ގެނެސްފައިވާ އިސްލާހުގައި ބުނެފައިވެ އެވެ.