18 Jul 2015, 01:44
ރީތިކޮށް ޤުރުއާން ކިޔެވައި ގުރުއާނުގެ އިލްމު ރަނގަޅަށް އެނގޭ މީހަކު ހޮވަން ރާއްޖެ އަށް ހުޅުވާލައިގެން ޓީވީއެމުން ބޭއްވި "އިލްޝާ، އެންމެ އަލިގަދަ ތަރީ"ގެ އެއްވަނަ މަގާމް މާލޭ ދަފްތަރު 9286، އިބްރާހިމް އަލީ ހޯދައިފި އެވެ.
ރޯދަ މަހަށް ޚާއްސަކޮށްގެން ބޭއްވި އެ މުބާރާތުގެ އެއް ވަނައަށް އިބްރާހިމް އަލީ ހޮވުނީ ފައިނަލުގައި ދެ އަންހެން ބައިވެރިންނާ ވާދަކޮށެވެ. މުބާރާތުގެ އެއް ވަނައަށް އިބްރާހިމް އަލީ ހޮވުމުން އޭނާ އަށް ވަނީ 100،000 ރުފިޔާ ލިބިފަ އެވެ.
މުބާރާތުގެ ދެ ވަނަ އަށް ގޮސްފައި ވަނީ ރ. ކަނދޮޅުދޫ، ސީސަންގޭ، އުއްމުޚާނީ އިބްރާހީމެވެ. އޭނާ އަށް ވަނީ 50،000 ރުފިޔާ ލިބިފަ އެވެ. އަދި މުބާރާތުގެ ތިން ވަނައަށް ހޮވުނީ އދ. މާމިގިލީ، ހިރިގާ، ޔަޝްފާ މުހައްމަދެވެ. އޭނާ އަށް ވަނީ 25،000 ރުފިޔާ ލިބިފައެވެ.
އެންމެ އަލިގަދަ މުބާރާތުގެ އެއްވަނަ، ދެވަނަ އަދި ތިން ވަނަ އަށް ހޮވުނު ބޭފުޅުން --- ސަން ފޮޓޯ: އަލީ ނަސީރު
މުބާރާތަށް ހުށަހަޅާފައިވާ ޖުމްލަ 175،000 ރުފިޔާއަކީ އަމިއްލަ ފަރާތަކުން ހުށަހެޅި ފައިސާއެވެ. ނަމަވެސް އެފަރާތުގެ ނަމެއް ޕަބްލިކް ސާވިސް މީޑިއާ (ޕީއެސްއެމް) އިން ހާމައެއް ނުކުރެއެވެ.
މުބާރާތުގެ ފައިނަލްގައި ވާދަކުރި ތިން ބައިވެރިންނަށް ދައުލަތުގެ މުއައްސަސާތަކުންނާއި ކުންފުނިތަކާއި ޖަމިއްޔާތަކާއި އަމިއްލަ ފަރުދުންވެސް ވަނީ ތަފާތު އިނާމު ހަދިޔާކޮށްފައެވެ.
މުޅި ރާއްޖެއަށް ހުޅުވާލައިގެން ބޭއްވި އެ މުބާރާތުގެ އޮޑިޝަންގައި 79 މީހަކު ވާދަކުރި އެވެ. އޭގެތެރެއިން މުބާރާތަށް ހޮވުނީ 12 ބައިވެރިންނެވެ.
އެންމެ އަލިގަދަ ތަރި މުބާރާތަކީ 2013 އަހަރުން ފެށިގެން ކޮންމެ ރޯދަމަހަކު ބާއްވަމުން އަންނަ މުބާރާތެކެވެ.
މިއަހަރުގެ އެންމެ އަލިގަދަ ތަރިއަކަށް ހޮވުނު އިބްރާހީމް އަލީ އަށް އިސްލާމިކް މިނިސްޓަރު ޑރ. އަހްމަދު ޒިޔާދު ބާގިރު ޓްރޮފީ ހަވާލުކޮށްދެއްވަނީ ---- ސަން ފޮޓޯ: އަލީ ނަސީރު
އެމްބީސީ އިން އެންމެ ފުރަތަމަ ބޭއްވި އަލިގަދަ ތަރީގެ އެއް ވަނައަކަށް ހޮވުނީ ސ. ހިތަދޫ، ޝަރަފުއްދީން ސްކޫލްގެ ގްރުއާން ޓީޗަރު ހުސެއިން ޒާހިރު އެވެ. އަދި މިދިޔަ އަހަރު އެ މުބާރާތުގެ އެއްވަނައަކަށް ހޮވިފައި ވަނީ ށ. ފޭދޫ، ވަވެތި، އަލްހާފިޒް އަބްދުއްރަޝީދެވެ.