16 Jul 2015, 13:55
ރާއްޖެ އަށް މިނިވަންކަން ލިބުނުތާ 50 އަހަރު ފުރުމުގެ މުނާސަބަތުގައި "މިނިވަން 50 ޝަރަފުގެ އައްޑަނަ"، ކުރީގެ ދެ ރައީސުން ކަމަށްވާ ރައީސް އަލްމަރުހޫމު އިބްރާހިމް ނާސިރާއި ނިޝާން އިއްޒައްްދީނުގެ ލަގަބު ލިބިވަޑައިގެންފައިވާ، ރައީސް މައުމޫން އަބްދުލްގައްޔޫމަށް އެރުވުމަށް ރައީސުލްޖުމްހޫރިއްޔާ އަބްދުﷲ ޔާމީނު އަބްދުލް ގައްޔޫމް ނިންމަވައިފި އެވެ.
ރައީސުލްޖުމްހޫރިއްޔާ އޮފީހުގައި މިއަދު މެންދުރު ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ ތަރުޖަމާން އިބުރާހިމް މުއާޒު އަލީ ވިދާޅުވީ ޝަރަފުގެ އައްޑަނަ އެ ދެ ބޭފުޅުންނަށް ދެއްވާނީ މި މަހުގެ 26 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ ދަރުބާރު [ރަސްމީ ޖަލްސާ]ގައި ކަމަށެވެ.
މުއާޒު ވިދާޅުވީ އިބްރާހިމް ނާސިރަށް އެ ޝަރަފު އެރުވުމަށް ރައީސް ޔާމީން ނިންމެވީ އެމަނިކުފާނަކީ [ރައީސް ނާސިރަކީ] އެބޭފުޅަކަށް ޓަކައި މިނިވަން ދުވަސް ނިސްބަތްވާ އަދި އެ ބޭފުޅެއްގެ ސަބަބުން ރާއްޖެ އަށް މިނިވަންކަން ލިބުނު ފަރާތް ކަމަށްވާތީ ކަމަށެވެ.
މިއަދު ރައީސް އޮފީހުގައޮ ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން ނޫސްވެރިންނަށް މައުލޫމާތު ދެއްވަނީ: ސަން ފޮޓޯ/ ފަޔާޒު މޫށާ
"ރައީސް މައުމޫނަށް އެ ޝަރަފު އެރުވުމަށް ރައީސް ޔާމީން ނިންމެވީ ރައީސް ނާސިރު ރާއްޖެ އަށް މިނިވަންކަން ހޯދައިދެއްވުމަށް ފަހު ވެސް މި މިނިވަންކަން މިނިވަން ގައުމެއްގެ ގޮތުގައި ގައުމުގެ އިސްތިގުލާލު ނަގަހައްޓައި ދެމެހެއްޓުމުގައި 30 އަހަރު ވަންދެން މި ގައުމުގެ ވެރިއަކަށް ހުންނަވައި ރައީސް މައުމޫން ގައުމަށް ޓަކައި ކޮށްދެއްވި އަގުހުރި މަސައްކަތްތަކުގެ އަގުވަޒަން ކުރުމުގެ ގޮތުން،" މުއާޒު ވިދާޅުވި އެވެ.
މިނިވަން ދުވަހުގެ ޖަލްސާގައި ކުރީގެ ދެ ރައީސަކަށް ޝަރަފުގެ އައްޑަނަ އެރުވުމަށް ރައީސް ޔާމީން ނިންމަވާފައިވާ އިރު އިނގިރޭސީންގެ އަތްދަށުން 1965 އަހަރުގެ ޖުލައި މަހުގެ 26 ވަނަ ދުވަހު އުފަންވި މީހުން މިނިވަން 50ގެ ރަސްމީ ޖަލްސާގައި ބައިވެރިކުރަން ވެސް ސަރުކާރުން ވަނީ ނިންމަވާފައި އެވެ.
ހަމައެއާ އެކު މިނިވަން 50ގެ ޖަލްސާގައި ބޭރުގެ 100 އަށް ވުރެ ގިނަ އިއްޒަތްތެރިން ބައިވެރިވެވަޑައިގަންނަވާނެ ކަމަށް ވެސް ސަރުކާރުން ވަނީ ބުނެފައި އެވެ.