14 Jul 2015, 14:55
އަދާލަތު ޕާޓީގެ ހާރިޖީ ކޮމިޓީގެ ރައީސް ކަމުން ކުރީގެ އިސްލާމިކް މިނިސްޓަރު އަދި އިސްލާމިކް ޔުނިވާސިޓީގެ ވައިސް ޗާންސެލާ ޑރ. މުހައްމަދު ޝަހީމް އަލީ ސައީދު އިސްތިއުފާ ދެއްވައިފި އެވެ.
ޝަހީމް މިއަދު ކުރެއްވި ޓުވީޓެއްގައި ވިދާޅުވެފައި ވަނީ އެ މަގާމުން އޭނާ އިސްތިއުފާ ދެއްވީ އިސްލާމިކް ޔުނިވާސިޓީގެ ގާނޫނު އެކަމަށް ލާޒިމު ކުރާތީ ކަމަށެވެ.
އިސްލާމިކު ޔުނިވާސިޓީގެ ގާނޫނުގެ 19 ވަނަ މާއްދާގެ (ކ)ގައި ބަޔާން ކޮށްފައިވާ ވަނީ އިސްލާމިކު ޔުނިވާސިޓީގެ މަޖިލީހުގެ މެމްބަރަކަށް އައްޔަން ކުރެވޭނީ ސިޔާސީ ޕާޓީއެއްގެ މެމްބަރަކަށް ނުވާ ފަރާތެއް ކަމަށެވެ.
Islamic uni ge qaanoonu laazim kiraathee, AP ga alhugandu huri magaamun isthiufaa dheefin.pic.twitter.com/MDSGlGhoSu
— د.محمد شهيم علي سعيد (@Mohamedshaheem1)July 14, 2015
އަދާލަތު ޕާޓީގެ ހާރިޖީ ކޮމިޓީގެ ރައީސް ކަމުން ޝަހީމް އިސްތިއުފާ ދެއްވި ނަމަވެސް އޭނާ އަދި ވެސް ހުންނެވީ އެޕާޓީގެ މެމްބަރެއްގެ ގޮތުގަ އެވެ.
އިސްލާމިކު ޔުނިވާސިޓީގެ ވައިސް ޗާންސެލާގެ މާގަމު ޝަހީމަށް ރައީސް އަބްދުﷲ ޔާމީން ދެއްވީ މިދިޔަ އާދިއްތަ ދުވަހު އެވެ.
އަދާލަތު ޕާޓީގެ އިލްމުވެރިންގެ މަޖިލީހުގައި ވެސް އިންނަވާ ޝަހީމަކީ އިސްލާމިކް ޔުނިވާސިޓީ އުފެއްދުމަށް ސަރުކާރުން ކުރި މަސައްކަތްތަކުގައި އިސްކޮށް ހަރަކާތްތެރިވެވަޑައިގެންފައިވާ ބޭފުޅެކެވެ. އިސްލާމިކް ޔުނިވާސިޓީގެ ބިލް ޑްރާފްޓު ކުރުމުގެ ކުރިން ކުރަން ޖެހޭ މަސައްކަތްތައް ކުރުމަށް ރައީސް ޔާމީން އެކުލަވާލެއްވި ކޮމެޓީ ޗެއާކުރައްވާފައި ވަނީ ވެސް ޑރ. ޝަހީމެވެ.
އޭނާ ވިދާޅުވީ އިސްލާމިކް ޔުނިވާސިޓީން ތައުލީމް ހާސިލްކުރާ ދަރިވަރުންނަކީ އިލްމީގޮތުން ގާބިލް ބަޔަކަށް ހެދުމަށް މަސައްކަތް ކުރައްވާނެ ކަމަށެވެ. އަދި އިސްލާމީ ދުނިޔޭގެ އެކިއެކި ޔުނިވާސިޓީތަކުގެ ތަޖުރިބާތައް ރާއްޖޭގެ އިސްލާމިކް ޔުނިވާސިޓީ އަށް ގެނައުމަށް ކުރެވެން ހުރި ހުރިހާ ކަމެއް ކުރައްވާނެ ކަމަށް ވެސް ޝަހީމް ވިދާޅުވި އެވެ.
ގާނޫނުގައި ބުނެފައިވާ ގޮތުން ވައިސް ޗާންސެލަރަކީ ޔުނިވާސިޓީގެ މަޖިލީހުން ނިންމާ އުސޫލުތަކާ އެއްގޮތަށް ޔުނިވާސިޓީގެ ތައުލީމީ، އިލްމީ އަދި އިދާރީ ކަންތައްތައް ހިންގާ އެންމެ އިސްވެރިޔާ އެވެ.