14 Jul 2015, 11:53
އިންޑިއަން އޯޝަން އައިލެންޑް ގޭމްސް (އައިއޯއަޖީ) އަކީ ރާއްޖޭގެ ކެޕްޓަން ޢަލީ އަޝްފާޤް (ދަގަނޑޭ) އާއި އެއް ވަނަ ގޯލްކީޕަރު ޢިމްރާން މުޙައްމަދު ނުލައި ކުޅެން ދަސްކުރަންވީ ވަގުތު ކަމަށް ގައުމީ ޓީމްގެ ކޯޗް ވެލިޒާ ޕޮޕޯވް ބުނެފި އެވެ.
ގައުމީ ޓީމް އިއުލާން ކުރުމަށް އިއްޔަ އެފްއޭއެމް ހައުސްގައި ބޭއްވި ޕްރެސް ކޮންފަރެންސްގައި ޕޮޕޯވް ބުނީ ސާފު ޗެމްޕިއަންޝިޕަށް ފަހު ދަނގަޑޭ އާއި ޢިމްރާން ކުޅުން ހުއްޓާލާފާނެ ކަމަށާއި އެހެންކަމުން އެކުޅުންތެރި ކުޅުން ހުއްޓަލިއަސް ޒުވާން ކުޅުންތެރިން ތައްޔާރަށް ތިބެން ޖެހޭ ކަމަށެވެ.
"މިހާރު އަހަރެމެން ޖެހޭ ދަސްކުރަން އަޝްފާޤާއި ޢިމްރާން އަދި މުޙައްމަދު ޢާރިފު (ބަކާ) ވެސް ނެތި ކުޅުން." ޕޮޕޯވް ބުންޏެވެ.
ޕޮޕޯވް ބުނީ ދަނގަޑޭއާއި ޢިމްރާން ކުޅުން ހުއްޓާލި ނަމަވެސް ރާއްޖޭގެ ފުޓްބޯޅަ ކުރިއަށްދާން ޖެހޭނެ ކަމަށާއި އައިއޯއައިޖީއަކީ ވަރުގަދަ މެޗްތަކެއް ކުޅެން ޖެހޭ ކަމަށާއި އެހެންކަމުން ޒުވާން ކުޅުންތެރިންގެ ފެންވަރު ދައްކައި ދަގަނޑޭއާއި ޢިމްރާން ނެތަސް އެކުޅުންތެރިން ތައްޔާރަށް ތިބިކަން ސާބިތުކޮށްދޭން ޖެހޭ ކަމަށެވެ.
ޢިމްރާންއަށް އަނިޔާވެފައިވާ އިރު މުބާރަތުގައި ކުޅޭ ތިން މެޗްގައި ތިން ކީޕަރުން ވެސް ފެނުމުގެ ފުރުސަތު އެބައޮތް ކަމަށެވެ. އަދި މިވަގުތަކީ ވޯލްޑްކަޕް ކޮލިފައިންގައި ޗައިނާއާ ދެކޮޅަށް ކުޅޭނެ ކީޕަރެއް ޓެސްޓް ކުރުމަށް ރަނގަޅު ފުރުސަތެއް ކަމަށް ވެސް އޭނާ ބުންޏެވެ.
އައިއޯއަިޖީގައި ވާދަކުރާ ޓީމްގައި ހިމަނާފައިވާ ތިން ކީޕަރުންނަކީ ގައުމީ ތީމްގެ ދެ ބަދަލު ކީޕަރުން ކަމުގައިވާ ޓީސީގެ މުޙައްމަދު ޢިމްރާންއާއި ބީޖީގެ އިބްރާހިމް އިފްރާހް ޢަރީފާއި ވެލެންސިއާގެ އަޙްމަދު ޢާޠިފް އެވެ.
"އަހަންނަކަށް އަދި ނޭނގެ ބުނާކަށް ކޮން ގޯލް ކީޕަރެއް ކަމެއް ފުރަތަމަ އެގާރައިގައި ހިމެނޭނީ ނަމަވެސް ކުރިއަށް މިއޮތް ދިހަ ދުވަހުގެ ޓްރޭނިންއަށް ފަހު އަސްލަމް [ގައުމީ ތީމްގެ ގޯލް ކީޕަރު ޓްރެއިނާ] ނިންމާނީ ކޮން ކުޅުންތެރިޔެއްކަން. މިމުބާރަތަށް ދަނީކީ ކުޅުންތެރިން ޓެސްޓް ކުރާކަށްނޫން. ނަމަވެސް އެއްވަނަ ކީޕަރު ޢިމްރާން ނެތް އިރު އެބަޖެހޭ ބަލަން ވޯލްޑްކަޕް ކޮލިފައިންގައި ޗައިނާއާ ދެކޮޅަށް ކުޅޭ މެޗަށް ނިކުންނާނީ ކޮން ގޯލް ކީޕަރެއްކަން،" ޕޮޕޯވް ބުންޏެވެ.
ޢިމްރާން އަށް އަނިޔާވެގެން ޓީމްގައި ނުހިމެނޭއިރު ކެޕްޓަން ދަނގަޑޭ އާޢި ވައިސްކެޕްޓަން ބަކާ ޓީމްގައި ނުހިމެނެނީ އެކުޅުންތެރިން ކުޅޭ ބޭރު ކުލަބުތަކުން އެކުޅުންތެރިނަށް ރިލިސް ނުލިބޭތީ އެވެ.
ޕޮޕޯވް ބުނީ ދަނގަޑޭ ކުޅޭ މެލޭޗިއާގެ ޕީޑީއާރްއެމްއާއި ބަކާ ކުޅޭ މިޔަންމާގެ ކޭބީޒެޑުން ކުޅުންތެރިން ދޫކޯށްލަން ބޭނުން ވަނި މި މުބާރާތަކީ ބައިނަލްއަގުވާމީ މެޗްތަކަކަށް ނުވާތީ ކަމަށެވެ. އަދި މިޗުތައް ކުޅެގެން ރޭންކަށް ބަދަލުތަކެއް ވެސް ނާންނާނެތީ ކަމަށެވެ.
އައިއޯޖީއަށް ތައްޔަރުވުމަށް ގައުމީ ޓީމް ޕްރެކްޓިސް ފެށުމަށް ހަމަޖެހިފައި ވަނީ މިމަހުގެ 18 ވަނަ ދުވަހު އެވެ.
އިންޑިއަން އޯޝަން އައިލެންޑް ގޭމްސް ބޭއްވުމަށް ހަމޖެހިފައި ވަނީ އަންނަ މަހު 1 އިން 8 ވަނަ ދުވަހުގެ ނިޔަލަށް ރީޔުނިއަންގެ ވެރިރަށް ސެންޓި ޑެނިސްގަ އެވެ.