12 Jul 2015, 12:23
ސަރުކާރާއި އިދިކޮޅު އެމްޑީޕީއާ ދެމެދު ކުރަމުންދާ މަޝްވަރާގެ ތިން ވަނަ ބައްދަލުވުން މިރޭ ބާއްވާ ގޮތަށް ހަމަޖައްސައިފި އެވެ.
ރައީސް އޮފީހުގެ ތަރުޖަމާނު އިބުރާހިމް މުއާޒު އަލީ މިއަދު ކުރެއްވި ޓުވީޓެއްގައި ވިދާޅުވެފައި ވަނީ ސަރުކާރުން އިދިކޮޅު އެމްޑީޕީއާ އެކު ބާއްވާ މަޝްވަރާ ބައްދަލުވުން މިރޭ 10:30ގައި ރައީސް އޮފީހުގައި އޮންނާނެ ކަމަށެވެ.
Sarukaarun MDP aa eku baavaa 03 vana mashvaraa baddhaluvun mirey 10.30 gai, Raeesuljumhooriyyaage Ofeehugai onnaane.
— Ibrahim Muaz Ali (@SpokespersonMV)July 12, 2015
ސަރުކާރާ އެމްޑީޕީއާ އެކު މިހާތަނަށް ދެ ބައްދަލުވުމެއް ވަނީ ކުރިއަށް ގެންގޮސްފައި އެވެ. އަދި ތިންވަނަ ބައްދަލުވުން ބާއްވާނެ ދުވަހާ ވަގުތު ކަނޑައަޅާފައި ވަނިކޮށް ބައްދަލުވުމުގައި ސަރުކާރުގެ ފަރާތުން ބައިވެރިވެވަޑައިގަންނަވާ ބައެއް ފަރާތްތައް ރަށުގައި ނޫޅުއްވާތީ އެ ބައްދަލުވުން މިދިޔަ ހަފުތާގައި ވަނީ ކެންސަލް ކޮށްފަ އެވެ.
އެންމެ ފަހުން ބޭއްވި މަޝްވަރާގެ ބައްދަލުވުމުގައި ސަރުކާރުގެ ފަރާތުން އެމްޑީޕީއާ އެކު މަޝްވަރާގައި ބައިވެރިވެވަޑައިގަންނަވާ ހޯމް މިނިސްޓަރު އުމަރު ނަސީރު ވިދާޅުވެފައި ވަނީ އެމްޑީޕީގެ ފަރާތުން ބައެއް ކަންކަން ހުށަހެޅި އިރު ވަކި މުއްދަތެއްގެ ތެރޭގައި ބައެއް ކަންކަން ނިންމަން އެދިފައި އޮތަސް އެއްވެސް ހުށަހެޅުމަކަށް މުހުލަތެއް ނުލައި ކުރިއަށްގެންދަން އެއްބަސްވެފައިވާ ކަމަށެވެ.
މިރޭ ބޭއްވުމަށް ހަމަޖެހިފައިވާ ބައްދަލުވުމުގައި އޮތީ ސިޔާސީ ހަމަޖެހުން އަލުން ގާއިމް ކުރުމަށް އެމްޑީޕީން ހުށަހަޅާފައިވާ ކަންކަން ކުރާނެ ގޮތުގެ ތާވަލަކާއި އަދި އެމްޑީޕީން ސަރުކާރަށް ކޮށްދޭންވީ ކޮންކަމެއްކަން ސަރުކާރަށް ހުށަހެޅުމެވެ.
އެމްޑީޕީން ހުށަހެޅި ބައެއް ކަންކަން:
- ހުކުމް ތަންފީޒުކުރަމުންދާ ބައެއް ސިޔާސީ ބޭފުޅުންނަށް ލުޔެއްދިނުން.
- ސިޔާސީ ހަރަކާތްތަކާ ގުޅިގެން ދައުވާ އުފުލިފައިވާ ސިޔާސީ ބޭފުޅުންނަށް ލުޔެއްދިނުން.
- ސިޔާސީ ހަރަކާތްތަކާ ގުޅިގެން ތަހުގީގު ކުރިއަށްދާ ފަރާތްތަކަށް ލުޔެއްދިނުން.
- ވިޔަފާރިވެރިންނަށް ކުރިމަތިވެފައިވާ ދަތިތައް ހައްލުކުރުން.
- ކައުންސިލަރުންނާއި ސިވިލްސާވަންޓުންނާއި ސަރުކާރުގެ ކުންފުނިތަކުގެ މުވައްޒަފުންނަށް ވަޒީފާ އަދާކުރުމުގައި ކުރިމަތިވެފައިވާ ދަތިތައް ހައްލުކުރުން.
- ޑރ. އަފްރާޝީމްގެ މަރުގެ މައްސަލައާ ގުޅޭ މިނިވަން ތަހުގީގެއް ހިންގުން.
- ނޫސްވެރިޔާ އަހްމަދު ރިޟްވާން އަބްދުﷲ ގެއްލުނު މައްސަލައާ ގުޅޭ މިނިވަން ތަހުގީގެއްހިންގުން.
- ސިޔާސީ ފަރާތްތަކަށާއި ނޫސްވެރިންނަށް ބިރުދެއްކުމުގެ ގޮތުން އެސްއެމްއެސްތައް ފޮނުވި މައްސަލައިގެ މިނިވަން ތަހުގީގެއް ހިންގުން.
އެމްޑީޕީއާ އެކު ކުރާ މަޝްވަރާތައް ލީޑު ކުރައްވާ ބޭފުޅެއްގެ ގޮތުގައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ކަނޑައަޅުއްވާފައި ވަނީ ހޯމް މިނިސްޓަރު އުމަރު ނަސީރެވެ. އުމަރުގެ އިތުރުން އެ މަޝްވަރާގައި ސަރުކާރުގެ ބައިވެރިވެވަޑައިގަންނަވަނީ ފިޝަރީޒް މިނިސްޓަރު ޑރ. މުހައްމަދު ޝައިނީ އާއި ރައީސް އޮފީހުގެ މިނިސްޓަރު އަބްދުﷲ އަމީނެވެ.