05 Jul 2015, 13:48
ރާއްޖެ އަށް މިނިވަންކަން ލިބުމުގެ އެގްރިމެންޓްގައި އޭރުގެ ބޮޑުވަޒީރު އިބްރާހިމް ނާސިރު ސޮއި ކުރެއްވި ގަލަންކޮޅުގެ ނަކަލެއް ނެރެފި އެވެ.
މޫކައި ސުއިޓްގައި މިއަދު ބޭއްވި ރަސްމިއްޔާތުގައި އެ ގަލަންކޮޅުގެ ނަކަލު ނެރެދެއްވީ އަސްލު ގަލަންކޮޅު ލިބިވަޑައިގަތް، ދައުލަތަށް ގިނަ ދުވަހު ހިދުމަތް ކުރެއްވި އަދި ނިޝާން އިއްޒުއްދީންގެ އިއްޒަތްތެރި ވެރިޔާ އަބުދުއްސައްތާރު މޫސާ ދީދީ އެވެ.
އިނގިރޭސީންގެ ދަށުން ދިވެހި ރާއްޖެ މިނިވަންވި ދުވަހު- 26 ޖުލައި 1965ގައި- އެ އެއްބަސްވުމުގައި ސޮއި ކުރެއްވި ގަލަންކޮޅު އިބްރާހިމް ނާސިރު ހަދިޔާ ކުރެއްވީ އަބްދުއްސައްތާރު މޫސާ ދީދީ އަށެވެ.
ރާއްޖޭގެ މިނިވަން ކަމަށް 50 އަހަރު ފުރޭ މުނާސަބަތާ ދިމާކޮށް މިއަދު ނެރުނު ގަލަން ލިބެން ހުންނާނީ ނޮވެލްޓީ ބުކުޝޮޕުންނާއި ނޮލެޖު ބުކްޝޮޕުން ކަމަށް އިވެންޓް އިންތިޒާމު ކުރި ފަރާތުން ބުންޏެވެ.
ގަލަމެއް ވިއްކަނީ 250 ރުފިޔާ އަށެވެ.
ގަލަން ނެރުމުގެ ރަސްމިއްޔާތުގައި ވާހަކަ ދައްކަވަމުން އެ މަސައްކަތް ކުރެއްވި، ޓީވީއެމްގެ ކުރީގެ ސީއީއޯ އަލީ ހާލިދު ވިދާޅުވީ އަސްލު ގަލަމާއި ނަމޫނާ ގަލަމުގެ ތަފާތަކީ އަސްލު ގަލަމުގެ ދޯރީގައި "ޕާކަރު" އޮތް ތަނުގައި "ފިފްޓީ އިޔާސް" ޖަހާފައި އޮތުން ކަމަށެވެ.
މިނިވަންކަން ލިބުމުގެ އެގްރިމެންޓްގައި އޭރުގެ ބޮޑުވަޒީރު އިބްރާހިމް ނާސިރު ސޮއި ކުރެއްވި ގަލަންކޮޅުގެ ނަމޫނާ ގަލަން: ސަންފޮޓޯ--ފަޔާޒު މޫސާ
އަލީ ވިދާޅުވީ ގަލަމުގައި ޕާކާރު ނުޖެހޭތީ އެތަނުގައި ފިފްޓީ އިޔާސް ޖަހަން ނިންމީ ކަމަށެވެ. އަދި އެ ގަލަން އުފެއްދި ކުންފުނިން ވަނީ ޕާކަރު ގަލަމުގެ ތައްގަނޑު ނަގާފައި ކަމަށާއި އެ ސަބަބާ ހުރެ، ޕާކަރު ނުޖެހުނީ ކަމަށެވެ.
"ޕާކަރަކީ ފްރާންސްގެ ބައެއް، މި ރީޖަންގައި ކަނޑައަޅާފައި އޮތީ އިންޑިއާ. އެ ބޭފުޅުންނާ ވާހަކަ ދެއްކީމާ ވިދާޅުވީ މި މޯލްޑް މިއޮތީ ޕްރޮޑަކްޝަނުން ނަގާފައޭ އެހެންވީމާ އަސްލު ގަލަމެއް ހަދައެއް ނުދެވޭނެއޭ،" އަލީ ހާލިދު ވިދާޅުވި އެވެ.
ރާއްޖޭގެ މިނިވަން ކަމަށް 50 އަހަރު ފާހަފަ ކުރާ އިރު އެ ނަމޫނާ ގަލަން ރައްޔިތުންނާ ހަމައަށް ގެނެސްދިނުމަކީ އޭނާ އަށް ލިބޭ ވަރަށް ބޮޑު އުފަލެއް ކަމަށް އަލީ ހާލިދު ވިދާޅުވި އެވެ.
މިއަދުގެ ރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރު އުމަރު ނަސީރު ވިދާޅުވީ އެ ގަލަމަކީ ހަމައެކަނި ރާއްޖެ އަށް މިނިވަންކަން ލިބުމުގެ އެއްބަސްވުމުގައި ސޮއި ކުރުމަށް އެކަނި ބޭނުން ކުރި ގަލަމެއް ނޫން ކަމަށެވެ.
މިނިވަންކަން ލިބުމުގެ އެގްރިމެންޓްގައި އޭރުގެ ބޮޑުވަޒީރު އިބްރާހިމް ނާސިރު ސޮއި ކުރެއްވި ގަލަންކޮޅުގެ ނަމޫނާ ގަލަން ނެރުން: ސަންފޮޓޯ--ފަޔާޒު މޫސާ
އެގޮތުން އިނގިރޭސި ވިލާތުގެ ރާނީ ކްއީން އެލިޒަބަތު ރާއްޖެ އަށް ކުރެއްވި ދަތުރުފުޅުގައި އިއްޒަތްތެރިން ސޮއި ކުރާ ފޮތުގައި ސޮއި ކުރެއްވީ ވެސް އެގަލަމުން ކަމަށް އޭނާ ވިދާޅުވި އެވެ. އަދި ސްރީލަންކާގެ ކުރީގެ ޕްރައިމް މިނިސްޓަރު ބަންޑާރަނައިކަ ރާއްޖެ ވަޑައިގެންނެވި ފަހަރު ވެސް އިއްޒަތްތެރިން ސޮއި ކުރާ ފޮތުގައި ސޮއި ކުރެއްވީ ވެސް އެގަލަމުން ކަމަށް އުމަރު ވިދާޅުވި އެވެ.
މިއަދުގެ ރަސްމިއްޔާތުގައި އަބުދުއްސައްތާރު ވިދާޅުވީ މިނިވަން ކަމުގެ އެގްރިމެންޓްގައި ސޮއި ކުރެއްވުމަށް ފަހު އިބްރާހިމް ނާސިރު އަބްދުއްސައްތާރުމެންގެ ގެއަށް ވަޑައިގެން އެ ގަލަންކޮޅު އަބުދުއްސައްތާރަށް ދެއްވީ ކަމަށެވެ.
"އަޅުގަނޑުދެކެނީ އެއީ އިބްރާހިމް ނާސިރު އަޅުގަނޑަށް ދެއްވި ހަދިޔާއެއް ކަމަށް. އެއީ އިބްރާހިމް ނާސިރު އަމިއްލަފުޅަށް ބޭނުންކުރެއްވި ގަލަމެއް،" އަބުދުއްސައްތާރު މޫސާ ދީދީ ވިދާޅުވި އެވެ.