05 Jul 2015, 12:42
ހދ. ކުޅުދުއްފުށީގެ 40 ރޯހައުސް އެއްގައި ނަރުދަމާ ގުޅުމަށް މާލޭ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އާ ހަވާލު ކޮށްފިއެވެ.
ހައުސިން މިނިސްޓްރީގައި މިއަދު ބޭއްވި ރަސްމިއްޔާތެއްގައި ސަރުކާރުގެ ފަރާތުން އެއްބަސް ވުމުގައި ސޮއި ކުރެއްވީ ހައުސިން މިނިސްޓަރު ޑރ. މުހައްމަދު މުއިއްޒެވެ. އަދި އެމްޑަބްލިއުއެސްސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ފަޒުލް ރަޝީދެވެ.
ހައުސިން މިނިސްޓްރީގައި މިއަދު ބޭއްވި ރަސްމިއްޔާތުގައި މިނިސްޓަރު ވާހަކަފުޅު ދައްކަވަނީ --- ސަން ފޮޓޯ: ޔޫސުފް ސޮފްވާން
އެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ މިއަދު ސޮއި ކުރި އެއްބަސްވުމުގެ ދަށުން ސަރުކާރުގެ ފަރާތުން ކުޅުދުއްފުށީގައި އަޅާފައިވާ 40 ރޯހައުސްގައި ނަރުދަމާގެ މަސައްކަތް ކުރެވިގެން ދާނެ އެވެ. އެކަމަށް 1.5 މިލިއަން ރުފިޔާ ސަރުކާރުގެ ބަޖެޓުން ޚަރަދު ކުރުމަށް ނިންމާފައިވާ ކަމަށް މުއިއްޒު ވިދޅުވިއެވެ.
މިނިސްޓަރު ވިދާޅުވީ އެ 40 ގޭގެ މަސައްކަތް ނިންމުމަށް ދެ މަސް ދުވަހެއްގެ މުއްދަތެއް ދީފައިވާއިރު އެމްޑަބްލިއުއެސްސީ އިން އެ މަސައްކަތަށް ކަނޑައެޅިފައިވާ މުއްދަތުގައި ނިންމާނެ ކަމަށެވެ.
ސަރުކާރުގެ ފަރާތުން ކުޅުދުއްފުށީގައި 140 ރޯހައުސް ހެދުމަށް ވަނީ ނިންމާފައެވެ. އެގޮތުން 100 ގެއެއްގެ މަސައްކަތް މިހާރު ކުރިއަށްދާއިރު 40 ގޭގައި ނަރުދަމާގެ މަސައްކަތް ނޫން އެހެން މަސައްކަތްތައް ވަނީ ނިމިފައެވެ. އެގޮތުން އެ 40 ގޭގައި ނަރުދަމާ ނިމުމުން އެ ގެތަށް ލިބޭ ފަރާތްތަކާ އެތަން ހަވާލު ކުރެވޭނެ އެވެ.