05 Jul 2015, 12:13
ތޫނިސް (ޖުލައި 5): ތޫނިސްގެ ސޫސާގައިވާ ޓޫރިސްޓް ރިސޯޓް ސަރަހައްދަކަށް މިދިޔަ ހަފްތާގައި ދިން ޓެރަރިސްޓް ޙަމަލާތަކާ ގުޅިގެން އެގައުމުގެ ރައީސް އަލްބާޖީ ގާއިދް އައްސިބްސީ ކުއްލި ޙާލަތު އިޢްލާން ކުރައްވައިފިއެވެ.
ތޫނިސްގެ ޓީވީ މެދުވެރިކޮށް އިއްޔެ ހަވީރު ރައްޔިތުންނަށް ދެއްވި ޚިތާބެއްގައި ސިބްސީ ވިދާޅުވީ، އިއްޔެއިން ފެށިގެން 30 ދުވަހުގެ މުއްދަތަށް މުޅި ގައުމުގައި ކުއްލި ޙާލަތު އިޢްލާންކޮށްފި ކަމަށާއި މިކަން ކުރީ ބޮޑުވަޒީރާއި ޕާލަމެންޓްގެ ރައީސް އާ މަޝްވަރާ ކުރެއްވުމަށްފަހު އެބޭފުޅުންނަށްވެސް ފެނިވަޑައިގަންނަވާ ގޮތެއްގެ މަތިން ކަމުގައެވެ.
ތޫނިސްގެ ގާނޫނު އަސާސީގައިވާގޮތުން ކުއްލި ޙާލަތު އިޢުލާންކޮށްފި ހާލަތެއްގައި ސަލާމަތީ ކަންކަމުގައި ސިފައިންނާއި ފުލުހުންނަށް ގާނޫނުން ބޭރު ވަރަށް ބޮޑެތި ބާރުތަކަކާއި އިޚްތިޔާރުތަކެއް ދެއެވެ.
ތޫނިސްއަށް ޓެރަރިޒަމްގެ ނުރައްކާ ކުރިމަތިވެފައިވާ މިދަނޑިވަޅަކީ ސަލާމަތީ ކަންކަމުގައި ސިފައިންނާއި ފުލުހުންނަށް ވަރަށް ބޮޑެތި ބާރުތަކަކާއި އިޚްތިޔާރުތަކެއް ދޭންޖެހޭ ދަނޑިވަޅެއްކަމަށް ގައުމުގެ ހުރިހާ މުއައްސަސާތަކަކުންވެސް ދެކޭކަމަށްވެސް ރައީސް ސިބްސީ ވިދާޅުވިއެވެ.
މިދިޔަ ޖޫންމަހުގެ 26 ވަނަ ދުވަހު ތޫނިސްގެ ސޫސާ ރިސޯޓަށް ބަޔަކު ދިން ހަމަލާތަކެއްގައި 38 މީހުން މަރުވެ އެތަށް ބަޔަކު ޒަޚަމްވެފައިވެއެވެ. މިޙަމަލާތަކުގައި މަރުވެ އަދި ޒަޚަމްވި ގިނަމީހުންނަކީ ބޭރުގެ ފަތުރުވެރިންނެވެ. މީގެތެރޭގައިވެސް ގިނައީ އިނގިރޭސިވިލާތުގެ ފަތުރުވެރިންނެވެ. މިދިޔަ މާޗް މަހުވެސް ތޫނިސްގެ ޓޫރިޒަމާ ގުޅުންހުރި ތަނެއްކަމަށްވާ ބާރްދޫ ދާރުލްއާސާރަށް ބަޔަކު ދިން ޙަމަލާތަކެއްގައި ބޭރުގެ ފަތުރުވެރިންގެ 59 މީހުން މަރުވެފައިވެއެވެ.
މިދިޔަ ޖޫންމަހުގެ 26 ވަނަ ދުވަހު ތޫނިސްގެ ސޫސާ ރިސޯޓަށް ދިން ޓެރަރިސްޓް ޙަމަލާތަކުގެ ޒިންމާ އުފުލާފައިވަނީ އައިއެސް ޖަމާއަތުންނެވެ. މި ޙަމަލާތައް ދިން ޓެރަރިސްޓުން ތަމްރީންކޮށްފައިވަނީ ތޫނިސްގެ އަވަށްޓެރި ލީބިޔާގައި ހުންނަ އައިއެސްގެ ޓެރަރިސްޓް ކޭންޕަކުން ކަމަށް ތޫނިސްގެ ޖާސޫސީ ފަރާތްތަކުން ބުނެއެވެ. (އަލްޖަޒީރާ)