29 Jun 2015, 13:36
ގައުމީ ޔުނިވާސިޓީގެ ޖީ-ބްލޮކުގެ ގޮތުގައި ބޭނުން ކުރަމުން އަންނަ ބާ ޖަމާލުއްދީން ހުސްކުރުމަށް ޓަކައި ޕޮލިޓެކްނިކް އިމާރާތް ދިނުމަށް އެދިފައިވާނެ ކަމަށް ގައުމީ ޔުނިވާސިޓީ އިން ބުނެފި އެވެ.
ގައުމީ ޔުނިވާސިޓީގެ ވައިސް ޗާންސެލާ ޑރ. މުހައްމަދު ޝަރީފް މިއަދު ސަން އަށް ވިދާޅުވީ ޔުނިވާސިޓީ އަށް ދިމާވެފައިވާ ޖާގައިގެ ދަތިކަމަށް ހައްލު ހޯދުމަށް ޕޮލިޓެކްނިކް އިމާރާތް ދިނުމަށް އެދިފައިވާނެ ކަމަށާއި އެ އިމާރާތް ލިބިއްޖެ ނަމަ ޖާގައިގެ ދަތިކަމަށް ބޮޑު ހައްލެއް ލިބިގެންދާނެ ކަމަށެވެ.
"އަޅުގަނޑުމެން ވާނީ ފެކަލްޓީ އޮފް އިންޖިނިއަރިން ހިންގިއެއްނު މިހާރުގެ މޯލްޑިސް ޕޮލިޓެކްނިކް، އެތަން އަޅުގަނޑުމެންނަށް ހަމަޖައްސައި ދެއްވާށޭ ދަންނަވާފައި. އޭރުން އަޅުގަނޑުމެންނަށް ވަރަށް ބޮޑު ލުޔަކަށް ވާނެ،" ޑރ. ޝަރީފް ވިދާޅުވި އެވެ.
ޕޮލިޓެކްނިކް އިމާރާތް ޔުނިވާސިޓީ އަށް ދިނުމާ ގުޅޭ ގޮތުން ރައީސް އޮފީހުގެ ބަހެއް އަދި ވަނީ ލިބޭ ގޮތް ނުވެފަ އެވެ.
ބާ ޖަމާލުއްދީން މާދަމާ ހުސްކުރަން ޖެހޭއިރު އެއިމާރާތުގައި ހިންގަމުން އައި ކުލާސްތައް އެމްއީއެސް އަށް ބަދަލުކުރާ އިރު ކޮމްޕިއުޓާ ސެންޓަރު ޔުނިވާސިޓީގެ މައި އިދާރާއަށް މަދަލުކުރަމުންދާ ކަމަށް ޝަރީފް ވިދާޅުވި އެވެ.
މިހާރު ހަމަޖެހިފައިނުވަނީ ބާޖަމާލުއްދީނުގައި ޔުނިވާސިޓީގެ މުވައްޒިފުން ތިބި އިދާރާތައް ބަދަލުކުރާނެ ތަނެއް ކަމަށާއި ޔުނިވާސިޓީ ތެރެއިން ބައެއް ކުލާސްތައް މަދުކޮށްފައި ނަމަވެސް އެކަން ކުރެވޭތޯ އެބަ ބަލަމުންދާ ކަމަށް ޝަރީފް ވިދާޅުވި އެވެ.
ރައީސް އޮފީހުގެ ތަރުޖަމާން އިބްރާހިމް މުއާޒު ވިދާޅުވީ މިހާރު ޔުނިވާސިޓިއަށް ދީފައިވާ ފުރުސަތަކީ މިމަހުގެ ނިޔަލަށް ބާ ޖަމާލުއްދީނުގައި ހުރި ސާމާނު ނެރުމަށް ކަމަށެވެ. އެމްއީއެސް އިމާރާތުގައި ކުލާސްތައް ހިންގުމަށް ފުރުސަތު ދިނީ ވެސް ވަގުތީ ގޮތުން ކަމަށް މުއާޒު ވިދާޅުވި އެވެ.
ބާ ޖަމާލުއްދީނުގައި ކުރިން ހިންގަމުން އައި ޝަރީއާއިން ލޯގެ ކްލާސްތައް އެމްއީއެސް އަށް ބަދަލުކޮށް އެފެކަލްޓީގެ ކިޔެވުންތައް ފަށާފައިވެ އެވެ. ނަމަވެސް ފެކެލްޓީ އޮފް އާޓުސްގެ ކިޔެވުން އަދި ވެސް ކުރިއަށްގެންދަނީ ބާ ޖަމާލުއްދީނުގަ އެވެ.
ބާ ޖަމާލުއްދީންގައި ހިންގާ ދެ ފެކަލްޓީގެ ކޯސްތަކުގައި 1،200 އެއްހާ ދަރިވަރުން ދަނީ ތައުލީމް ހާސިލް ކުރަމުންނެވެ.
ބާވެ ބޮލަށް ވެއްޓެން ކައިރިވެފައިވާ ގައުމީ ޔުނިވާސިޓީގެ ފެކަލްޓީ އޮފް ޝަރީއާ އެންޑް ލޯ އާއި ފެކަލްޓީ އޮފް އާޓްސްގެ އިތުރުން ގިނަ ފެކަލްޓީތަކެއް ހިންގަމުން އަންނަ ބާ ޖަމާލުއްދީން އިމާރާތް ހުސްކުރަން އެތައް ފަހަރެއްގެ މަތިން ސަރުކާރުން ވަނީ ޔުނިވާސިޓީ އަށް އަންގައިފަ އެވެ. ނަމަވެސް ކުދިންގެ ކިޔެވުމަށް ބުރޫއަރާނެ ކަމަށް ބުނެ ޔުނިވާސިޓީ އިން އެތަން ހުސްކޮށްފައެއް ނުވެ އެވެ.