20 Jun 2015, 13:43
ޗިލީގައި މިހާރު ކުރިއަށްދާ ކޮޕާ އެމެރިކާ ކަޕްގައި ކޮލަމްބިއާ އާ ދެކޮޅަށް ކުޅުނު މެޗް ނިމުމަށްފަހު ދަނޑު މަތީގައި ހިންގި ހަމަނުޖެހުމާ ގުޅިގެން ބްރެޒިލްގެ ފޯވަޑް ނޭމާ ޑަސިލްވާ ހަތަރު މެޗަށް ސަސްޕެންޑްކޮށްފި އެވެ.
ދެކުނު އެމެރިކާގެ ފުޓްބޯޅަ ޖަމިއްޔާ 'ކޮންމެބެލް' އިން ނޭމާއާ ދެކޮޅަށް އަޅާފައިވާ ސަސްޕެންޝަނާ ގުޅިގެން، ފައިނަލަށް ބްރަޒިލް ދަތުރު ކުރި ނަމަވެސް ނޭމާއަށް ނުކުޅެވޭނެއެވެ.
އަދި މިފަހަރުގެ މުބާރާތުން ބުރެޒިލް ކަޓައިފިނަމަ ދެން އަންނަ މުބާރަތެއްގައި ފުރަތަމަ މެޗްތަކުގައި ނޭމާ ހުންނަންޖެހޭނީ ދަނޑު ބޭރުގައެވެ.
ހަތަރު މެޗްގެ ސަސްޕެންޝަންގެ އިތުރުން ދިހަ ހާސް ޑޮލަރުން އޭނާ ޖުރިމަނާ ކުރުމަށްވެސް ކޮންމެބެލްއިން ވަނީ ނިންމާފައެވެ.
އެމެޗްގައި ހިނގާ ދިޔަ ހަމަނުޖެހުތަކާ ގުޅިގެން ނޭމާ އަށާއި ކޮލަމްބިއާގެ ކާލޯސް ބާކާއަށްވެސް ވަނީ ރަތް ކަޑު ދައްކާފައެވެ.
ނޭމާއަށް ރަތް ކާޑު ދައްކައި ދަނޑުން ފޮނުވައިލީ މެޗްގެ ނަތީޖައާ މެދު ހިތް ހަމަނުޖެހޭކަން ދެއްކުމުގެ ގޮތުން ކޮލަމްބިއާގެ ޕަބެލޯ އާމޭރޯއަށް އަމާޒުކޮށްފައި އޭނާއާ ދިމާލަށް ބޯޅަ ފޮނުވާލުމުން ހިނގައިދިޔަ ހަމަނުޖެހުންތަކާ ގުޅިގެންނެވެ.
ކާލޯސް ބާކާއަށް ރަތް ކާޑު ދައްކާފައިވަނީ ހިނގާދިޔަ ހަމަނުޖެހުންތަކުގެ ތެރޭގައި ދުވެފައި އައިސް ނޭމާގެ ބުރަކަށީގައި ޖަހައި ކޮއްޕާލުމުންނެވެ.
ބްރަޒިލްގެ ކޯޗް ކާލޯސް ޑުންގާ ބުނެފައިވަނީ ނޭމާ ނުލައިވެސް ބްރަޒިލް ކުޅެން ފަރިތަ ވާނެ ކަމަށާއި ގޭމް ޕްލޭން ރާވާއިރު އެކަމަށް ވިސްނާނާނެކަމަށެވެ.