18 Jun 2015, 18:35
ރައީސުލްޖުމްހޫރިއްޔާގެ މަގާމަށާއި ރައީސުލްޖުމްހޫރިއްޔާގެ ނައިބުގެ މަގާމަށް ވާދަ ކުރެވޭ އުމުރު 30 އަހަރާއި 65 އަހަރާ ދެމެދަށް ބަދަލު ކުރުމަށް ގާނޫނު އަސާސީއަށް އިސްލާހު ގެނައުމަށް މަޖިލީހަށް ހުށަހެޅި އިސްލާހު ކޮމެޓީން ފާސްކޮށްފި އެވެ.
ގާނުނޫ އަސާސީގެ 109 ވަނަ މާއްދާއަށް ހޯރަފުށީ ދާއިރާގެ މެމްބަރު މުހައްމަދު އިސްމާއިލް ހުށަހެޅުއްވި އިސްލާހު ދިރާސާކޮށްފައި ވަނީ މަޖިލީހުގެ މިނިވަން މުއައްސަސާތަކުގެ ކޮމެޓީންނެވެ. އެ ކޮމެޓީން އެ އިސްލާހު ތަޅުމަށް ފޮޮނުވަން ފާސްކުރީ ސަރުކާރަށް ތާއިދު ކުރާ މެމްބަރުންގެ އަގުލަބިއްޔަތުންނެވެ.
މަޖިލީހުގެ ތަޅުމުން އެ އިސްލާހު ފާސްވުމަށް މަޖިލީހުގެ ބޮޑު އަގުލަބިއްޔަތެއް ބޭނުންވާނެ އެވެ. ގާނޫނު އަސާސީގައި ބުނެފައިވާ ގޮތުން ގާނޫނު އަސާސީއަށް އިސްލާހު ގެނެވޭނީ މަޖިލީހުގެ ޖުމްލަ މެމްބަރުންގެ ތެރެއިން ހަތަރު ބައިކުޅަ ތިން ބައި މެމްބަރުންގެ އަގުލަބިއްޔަތުން ކަމަށެވެ. އެއީ މަޖިލީހުގެ 85 މެމްބަރުންގެ ތެރެއިން 64 މެމްބަރުންގެ އަގުލަބިއްޔަތެވެ.
ސަރުކާރު ހިންގާ ޕީޕީއެމްގައި މިހާރު ތިއްބެވީ 44 މަޖިލިސް މެމްބަރުންނެވެ. ސަރުކާރު ކޯލިޝަންގައި ހިމެނޭ އެމްޑީއޭގައި ތިއްބެވީ ފަސް މަޖިލިސް މެމްބަރުންނެވެ. ސަރުކާރު ކޯލިޝަންގައި ޖުމްލަ 49 މެމްބަރުން އެބަ ތިއްބެވެ.
ގާނޫނު އަސާސީއަށް އިސްލާހު ގެނައުމަށް ޕީޕީއެމް/އެމްޑީއޭގެ މެމްބަރުންނާ އެއްކޮލަށް ޖުމްހޫރީ ޕާޓީގެ 11 މެމްބަރުން ވޯޓު ދީފިނަމަ ޖުމްލަ ވޯޓުގެ އަދަދު 60 އަރާނެ އެވެ. އިތުރަށް ބޭނުންވަނީ ހަތަރު ވޯޓެވެ.
މަޖިލީހުގައި މެމްބަރުން ތަމްސީލު ކުރާ ގޮތް:
- ޕީޕީއެމް: 44 މެމްބަރުން
- އެމްޑީޕީ: 21 މެމްބަރުން
- ޖޭޕީ: 11 މެމްބަރުން
- އެމްޑީއޭ: 5 މެމްބަރުން
- އަދާލަތު: 1 މެމްބަރުން
- މިނިވަން: 3 މެމްބަރުން (މެމްބަރު ރީކޯ މޫސާ މަނިކު/ މެމްބަރު އަހުމަދު މަހުލޫފު/ މެމްބަރު ހުސައިން އަރީފް)
ގާނޫނު އަސާސީގެ 109 ވަނަ މާއްދާއަށް އިސްލާހު ގެނައުމަށް ހުށަހަޅާފައިވާ އިސްލާހުގައި ބުނެފައިވާ ގޮތުގައި އުމުރުން 65 އަހަރަށް ވުރެއް މަތީ އުމުރުގެ އެއްވެސް މީހަކަށް ރައީސް ކަމަކަށް ވާދައެއް ނުކުރެވޭ އެވެ.
އެ އިސްލާހު މަޖިލީހުން ފާސްވެއްޖެނަމަ ޖުމްހޫރީ ޕާޓީގެ ލީޑަރު ގާސިމް އިބްރާހިމާއި ޕީޕީއެމްގެ ރައީސް މައުމޫން އަބްދުލް ގައްޔޫމަށް ވެރިކަމަކަށް ވާދައެއް ނުކުރެވޭނެ އެވެ. ގާސިމް އިބްރާހިމްގެ އުމުރުފުޅަކީ 65 އަހަރު ކަމުގައިވާއިރު، ރައީސް މައުމޫންގެ އުމުރުފުޅަކީ 77 އަހަރެވެ.
ގާނޫނު އަސާސީގެ 109 ވަނަ މާއްދާގައި މިހާރު ބުނެފައި ވަނީ ރައީސުލްޖުމްހޫރިއްޔާ ކަމުގެ މަގާމަށް އިންތިހާބު ކުރެވޭ މީހެއްގެ އުމުރަކީ 35 އަހަރު ކަމުގައިވާންޖެހޭނެ ކަމަށެވެ. ނަމަވެސް އެ މަގާމަށް ކުރިމަތި ނުލެވޭނެ ދޮށީ އުމުރަކީ ކޮބައިކަމެއް އެ މާއްދާގައި ވެސް އަދި ގާނޫނު އަސާސީގައި ވެސް ބަޔާންކޮށްފައެއް ނުވެ އެވެ.
ގާނޫނު އަސާސީގެ 112 ވަނަ މާއްދާގައި ބުނެފައި ވަނީ ރައީސުލްޖުމްހޫރިއްޔާގެ ނައިބު ކަމުގެ ޝަރުތަތަކީ ރައީސުލްޖުމްހޫރިއްޔާ ކަމުގެ މަގާމަށް ވެސް ކުރިމަތިލެވޭ ފަރާތްތަކުގެ ޝަރުތުތައް ކަމަށެވެ. އެހެންކަމުން މުހައްމަދު ހުށަހެޅުއްވި އިސްލާހު ރައީސާއި ނައިބު ރައީސް ކަމަށް ކުރިމަތިލައްވާ ކޮންމެ ފަރާތަކަށް ވެސް ހިނގާނެއެވެ.
މެމްބަރު މުހައްމަދު ވަނީ މީގެކުރިން ވެސް މިފަދަ އިސްލާހެއް ރައްޔިތުންގެ މަޖިލީހަށް ހުށަހަޅުއްވައިފައެވެ. އެގޮތުން މުހައްމަދު އޭރު ހުށަހެޅުއްވި އިސްލާހަކީ 65 އަހަރުވުމުން ވެރިކަމަށް ކުރިމަތި ނުލެވޭ އިސްލާހެވެ.
މުހައްމަދު މީގެ ކުރިން ވިދާޅުވެފައި ވަނީ އެ އިސްލާހު ހުށަހެޅުއްވި ގާނޫނު އަސާސީގައި ރައީސުލްޖުމްހޫރީއްޔާ ކަމުގެ މަގާމަށް ކުރިމަތި ނުލެވޭނެ ވަކި އުމުރެއް ކަނޑައެޅުމަށް ކަަމަށެވެ. ނަމަވެސް އެ އިސްލާހު ފަހުން ވަނީ ނަންގަވާފަ އެވެ.