18 Jun 2015, 15:19
ވޯސޯ (ޖޫން 18) : ރަޝިޔާގެ ނިއުކްލިޔާ ބާރުތައް އިތުރަށް ވަރުގަދަ ކުރުމަށް އެގައުމުން ނިންމި ނިންމުމަކީ ތަސައްރަފް ފުދޭ ނިއުކްލިޔާ ބާރަކުން ކުރާނެކަމެއް ނޫންކަމަށް ވިދާޅުވެ ނޭޓޯގެ އިސް ކޮމާންޑަރު ޖެނެރަލް ފިލިޕް ބްރިޑްލާވް ރަޝިޔާއަށް ވަރަށް ބޮޑަށް ފާޑު ވިދާޅުވެއްޖެ އެވެ.
ޕޮލެންޑްގެ ސްވިތްތަޒޯވްގައި ވާހަކަ ދައްކަވަމުން ޖެނެރަލް ބްރިޑްލާވް ވިދާޅުވީ ރަޝިޔާގެ ސްޓްރެޓީޖިކް އަދި ނިއުކްލިއަރ ބާރުތައް މިހާރަށްވުރެ ވަރުގަދަ ކުރުމަށް ނިންމި ނިންމުމަކީ ޒިންމާދާރު ނިންމުމެއް ނޫންކަމަށާއި ރަޝިޔާގެ މިނިންމުމުގެ ސަބަބުން ނިއުކްލިޔަރ ހަތިޔާރުގެ ރޭހެއް އުފަންވުން ނޫންކަމެއް ނުވާނެ ކަމުގަ އެވެ. ޖެނެރަލް ބްރިޑްލާވްގެ މިބަޔާނަކީ ރަޝިޔާގެ ނިއުކްލިއަރ ބާރުތައް އިތުރަށް ވަރުގަދަ ކުރުމަށްޓަކައި ނިއުކްލިއަ ވޯހެޑް ހަރުކޮށްފައިވާ އިންޓަކޮންޓިނެންޓަލް ބެލަސްޓިކް މިސައިލްގެ އިތުރު 40 މިސައިލް ރަޝިޔާ ސިފައިންގެ ޚިދްމަތަށް ނެރުމަށް ރައީސް ޕޫޓިން ނިންމެވި ނިންމެވުމަށް ނޭޓޯއިން ދިން ފުރަތަމަ ރައްދެވެ.
ރަޝިޔާގެ ރައީސް ވްލްޑިމޭރު ޕޫޓިންވަނީ ނިއުކްލިއަ ހަތިޔާރު ހަރުކުރެވޭ ގޮތަށް ރަޝިޔާ ތައްޔާރުކުރާ އެންމެ ޒަމާނީ ޓެކްނޮލޮޖީގެ ދުރުރާސްތާގެ އިތުރު 40 މިސައިލް މިއަހަރު ތެރޭގައި ރަޝިޔާ ސިފައިންގެ ޚިދްމަތަށް ނެރޭނެކަން މިދިޔަ އަންގާރަ ދުވަހު އިޢްލާން ކުރައްވާފަ އެވެ. މިއިން ކޮންމެ މިސައިލަކީ ވެސް ނިއުކްލިއަ އެތަށް ހަތިޔާރެއް ހިމެނޭ ވޯހެޑްތައް ހަރުކޮށްފައިވާ އަދި އަޑަށްވުރެ ތިންގުނަ ބާރުމިނުގައި ބާރަހާސް ކިލޯމީޓަރުގެ ރާސްތާއަށް ދަތުރުކުރުމުގެ ގާބިލްކަން ލިބިފައިވާ މިސައިލްތަކެވެ.
ޕޫޓިން މިގޮތަށް ނިންމެވީ ރަޝިޔާގެ ސަރަހައްދީ ރޮނގުގެ ކައިރީގައި ނޭޓޯ އިން ބިނާކުރަމުން ގެންދާ މިސައިލް އައްޑަނައިގެ ނިޒާމަށާއި ރަޝިޔާގެ އަވަށްޓެރި ޕޮލެންޑް ފަދަ ގައުމުތަކުގައި ނޭޓޯއިން ބަރުހަތިޔާރު ރުކުރުވާލުމަށް ކުރިޔަށްގެންދާ މަޝްރޫޢަށް ރައްދު ދިނުމުގެ ގޮތުންކަމަށް ވަނީ ބެލެވިފަ އެވެ. ޕޫޓިން ވަނީ ރަޝިޔާގެ އަމަނާއި ސަލާމަތަށް ނުރައްކާކުރާ ކޮންމެ ފަރާތަކާ ދިމާއަށް ރަޝިޔާގެ ނިއުކްލިޔަރ އަދި ސްޓްރެޓީޖިކް ބާރުތައް އަމާޒުކުރާނެ ކަމުގެ އިންޒާރު ދެއްވާފަ އެވެ. އަދި ރަޝިޔާގެ ސަރަހައްދީ ރޮނގުގެ ކައިރީގައި ނޭޓޯއިން ބިނާކުރާ މިސައިލް އައްޑަނައިގެ ނިޒާމަކީ ރަޝިޔާގެ އަމަނާއި ސަލާމަތަށްހުރި ބިރެއްކަމަށާ އެކަމާދެކޮޅަށް ފިޔަވަޅު ނާޅައި ރަޝިޔާ ނޯންނާނެ ކަމަށްވެސް ޕޫޓިން ވިދާޅުވެފައިވެ އެވެ.
އަދި ރަޝިޔާގެ ސަރަހައްދީ ރޮނގާ ގުޅިފައިވާ ޕޮލެންޑާއި ޔުކްރޭން ފަދަ ގައުމުތައް ހަތިޔާރު ޖަމާކޮށްގެން ނޭންގުމެއްގެ ތެރެއިން ރަޝިޔާ ހިސާރުކުރުމަށް ނޭޓޯ އިން ކުޅޭ ކުޅިވަރު ބަލަން ނޯންނާނެ ކަމުގެ އިންޒާރުވެސް ޕޫޓިން ވަނީ ދެއްވާފަ އެވެ. (ރޮއިޓާސް)