16 Jun 2015, 13:36
ޓެރަރިޒަމްގެ ހުކުމް ސާބިތުވެ 13 އަހަރަށް ޖަލަށް ލާފައިވާ ކުރީގެ ރައީސް މުހައްމަދު ނަޝީދުގެ އަދަބު ލުއިކޮށްދެއްވުމަށް ރައީސުލްޖުމްހޫރިއްޔާ އަބްދުﷲ ޔާމީނަށް ދަންނަވައިފި އެވެ.
ރައީސް ނަޝީދުގެ ގާނޫނީ ވަކީލް ހަސަން ލަތީފް ސޮއިކުރައްވައި އިއްޔެ ރައީސް ޔާމީނަށް ފޮނުއްވި ސިޓީގައި ބުނެފައިވަނީ މައާފް ދިނުމާއި އަދަބު ލުއިކޮށްދިނުމުގެ ގާނޫނު 29 ވަނަ މާއްދާއިން ރައީސުލްޖުމްހޫރިއްޔާގެ އިސްނެގުމަކުން އަދަބު ލުއިކޮށްދިނުމުގެ އިހުތިޔާރު ލިބިގެންވާއިރު ރައީސް ނަޝީދަށް އަދަބު ލުއިކޮށްދިނުމަށް އެދޭ ކަމަށެވެ.
"ކަންމިހެން އޮތުމުން އިސްވެ ދެންނެވި ކަންކަމަށް ރިއާޔަތް ކުރައްވައި ރައީސް ނަޝީދުގެ މައްޗަށް ތަންފީޒު ކުރެވެމުންދާ ހުކުމުގައިވާ އަދަބު ލުއިކޮށްދިނުމަށް ގާނޫނުގެ 29 ވަނަ މާއްދާގެ(ނ) ގެ ދަށުން ލުއިކޮށްދިނުމަށް އެދޭ ވާހަކަ ދެއްނެވީމެވެ." އެސިޓީގައި ބުނެފައިވެއެވެ.
ރައީސް ނަޝީދުގެ އަދަބު ލުއިކޮށްދެއްވުމަށް އެދިވަދައިގެންފައިވާއިރު ރައީސް ޔާމީން މީގެ ކުރިން ވިދާޅުވެފައިވަނީ، ރައީސް ނަޝީދުގެ މައްސަލަ އިސްތިއުނާފް ކުރެއްވުމަށް އެދިވަޑައިގަންނަވާ ކަމަށެވެ. ސަރުކާރުން ކޯޓުގެ ހުކުމްތައް ތަންފީޒު ކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
ރައީސް ނަޝީދު 13 އަހަރަށް ޖަލަށްލުމަށް ހުކުމް ކޮށްފައި ވަނީ އެމަނިކުފާނު ރާއްޖޭގެ ރައީސުލްޖުމްހޫރިއްޔާ ކަމުގެ މަގާމާއި އަދި ސިފައިންގެ އެންމެ މަތީވެރިޔާގެ މަގާމުގައި ހުންނެވި އިރު، ކްރިމިނަލް ކޯޓުގެ އިސްގާޒީ އަބްދުﷲ މުހައްމަދު ހައްޔަރުކުރުމަށް ސިފައިންނަށް އަމުރުކުރައްވާފައިވާތީ އެވެ.