15 Jun 2015, 21:18
ރޯދަޔަށް ހާއްސަކޮށް ގެން އެސްޓީއޯއިން ވިއްކަމުން އައި ފިޔާ، އަލުވީގެ އަގުތައް ހެޔޮ ކޮށްފިއެވެ.
އެސްޓީއޯއިން ބުނީ މާދަމާ އިން ފެށިގެން ކުރިން 250 ރުފިޔާއަށް ވިއްކި ފިޔާ ބަސްތާއެއް 220 ރުފިޔާއަށް ވިއްކަން ނިންމާފައިވާ ކަމަށެވެ. މީގެ ކުރިން ފިޔާ ކިލޯއެއް 12 ރުފިޔާއަށް ވިއްކިއިރު މާދަމާއިން ފެށިގެން 10 ރުފިޔާއަށް ފިޔާ ކިލޯއެއް ވިއްކުމަށް އެސްޓީއޯއިން ވަނީ ނިންމާފައެވެ.
ބާޒާރުގައި ފިޔާ ބަސްތާއެއް މިހާރު ވިއްކަމުން ދަނީ 350 ރުފިޔާ އާއި 320 ރުފިޔާއާ ދެމެދުގެ އަގުތަކެއްގައެވެ. ފިޔާކިލޯއެއް ވިއްކަމުން ދަނީ 18 ރުފިޔާއަށެވެ.
ކުރިން އެސްޓީއޯއިން އަލުވި ބަސްތާއެއް 250 ރުފިޔާއަށް ވިއްކިއިރު މާދަމާއިން ފެށިގެން އެކުންފުނިން ނިންމާފައިވަނީ 180 ރުފިޔާއަށް ފިޔާ ބަސްތާއެއް ވިއްކުމަށެވެ. މީގެ ކުރިން ފިޔާ ކިލޯއެއް 12 ރުފިޔާއަށް ވިއްކިއިރު މާދަމާއިން ފެށިގެން 9 ރުފިޔާއަށް ފިޔާ ކިލޯއެއް ވިއްކުމަށް ވަނީ ނިންމާފައެވެ.
އަލުވި ބަސްތާއެއް މިއަދު ބާޒާރުގައި ވިއްކަމުން ދަނީ 300 ރުފިޔާއަށެވެ. ކުރިން އަލުވި ކިލޯއެއް ވިއްކަނީ 12 ރުފިޔާ އަށެވެ.
ފިޔާއާއި އަލުވީގެ އަގު އެސްޓީއޯއިން ހެޔޮ ކުރި ނަމަވެސް ބިހުގެ އަގު ހަމަ ހުރީ 270 ރުފިޔާގައެވެ. ވަކިން ބިހެއް ވިއްކަނީ 1.50 ރުފިޔާއަށެވެ. ބާޒާރުގައި ބިސްކޭހެއް ވިއްކަމުންދަނީ 600 ރުފިޔާއަށެވެ.