15 Jun 2015, 14:35
ރާއްޖޭގެ އަތޮޅުތަކުގައި އިންޓަނެޓުގެ ހިދުމަތް ދިނުމަށް ތައްޔާރުކޮށްފައިވާ އީ ސެންޓަރުތަކުގެ ބިލްޑިން ކެޕޭސިޓީ އިތުރު ކުރުމަށް ސަރުކާރުގެ މުއައްސަސާތަކަކާއި ނޮން ގަވާންމެންޓް އޯގަނައިޒޭޝަން (އެންޖީއޯ)ތަކަކާ އެއްބަސްވުމެއް ސޮއިކޮށްފި އެވެ.
ހޮޓެލް ޖެންގައި މިއަދު ބޭއްވި ރަސްމިއްޔާތެއްގައި ބިލްޑިން ކެޕޭސިޓީ އިތުރު ކުރުމަށް ސަރުކާރުގެ 24 މުއައްސަސާ އާއި ފަސް އެންޖީއޯއަކާ ވަނީ އެއްބަސްވުމުގައި ސޮއި ކޮށްފަ އެވެ. އެ ގޮތުން އެ އެއްބަސްވުމުގައި މުއައްސަސާތަކާއެކު އެއްބަސްވުމުގައި ސޮއި ކޮށްފައި ވަނީ ނޭޝަނަލް ސެންޓާ ފޮ އިންފޮމޭޝަން ޓެކްނޮލޮޖީ އާއި ކައުންސިލުންނެވެ. ކައުންސިލުގެ ފަރާތުން ސޮއިކޮށްފައި ވަނީ ލޯކަލް ގަވާންމެންޓް އޮތޯރިޓީ (އެލްޖީއޭ) އިންނެވެ.
މިއަދު ހޮޓެލް ޖެން ގައި ބޭއްވި ރަސްމިއްޔާތުގެ ތެރެއިން--- ސަން ފޮޓޯ: އަހުމަދު ޖައިޝަން
އެއްބަސްވުމާ ބެހޭ ގޮތުން އެ ރަސްމިއްޔާތުގައި ވާހަކަފުޅު ދައްކަވަމުން ފިނޭންސް މިނިސްޓްރީގެ ސްޓޭޓް މިނިސްޓަރު އަހުމަދު އަޝްމަލީ ވިދާޅުވީ މިއަދު ސޮއި ކުރެވުމުގެ މަޝްރޫއާ އެކު އަތޮޅުތަކުގެ ރައްޔިތުންނަށް ފަސޭހަ ކަމާއެކު ސަރުކާރުގެ މުއައްސަސާތަކާ އިންޓަނެޓުގެ ޒަރިއްޔާއިން ގުޅާލައިގެން މަސައްކަތް ކުރެވޭނެ އެވެ.
އޭގެ ސަބަބުން އަތޮޅުތަކުގައި އުޅޭ ރައްޔިތުންނަށް ދިރިއުޅުމުގެ އެކި ކަންތަައްތަކުގައި އިންޓަނެޓު ބޭނުންކުރުމަށް ދަސްވެގެންދާނެ ކަމަށެވެ.
އޭނާ ވިދާޅުވީ، ރަށްރަށުގައި ގާއިމްކޮށްފައިވާ އީ ސެންޓަރުތަކުގައި މިހާރު އިންޓަނެޓްގެ ހިދުމަތުގެ އިތުރުން ފޮޓޯ ކޮޕީ ކުރުމާއި ޕްރިންޓް ކުރުން އަދި ސްކޭން ކުރުމުގެ ހިދުމަތް ލިބޭނެ ކަމަށާއި ކުރިއަށް އޮތްތާގައި ޕޯސްޓް ކުރުމުގެ ހިދުމަތް ގާއިމު ކުރުމަށް ގަސްދުކުރާ ކަމަށެވެ.