Last Updated: 1 decade 5 month ago
އިދިކޮޅު އެންމެ ބޮޑު ޕާޓީ، އެމްޑީޕީން އިސްނަގައިގެން އަދާލަތު ޕާޓީއާ ގުޅިގެން ސަރުކާރުގެ "އަނިޔާވެރިކަން ނިންމަން" ކަމަށް ބުނެ ތިން ދުވަހަށް އިހްތިޖާޖު ކުރުމަށް މަޖީދީމަގުގައި މުޒާހަރާގެ ބައިވެރިން އިށީންދެއްޖެ އެވެ.
މުޒާހަރާގެ ބައިވެރިން އިށީންދެފައި ވަނީ ޗާންދަނީ މަގާއި މަޖީދީމަގާ ގުޅޭ ހިސާބު ހަތަރު އަނގޮޅި ކަންމަތީގަ އެވެ. މުޒާހަރާގެ ބައިވެރިންނާއެކު މަޖީދީމަގުގެ ބޮޑު ބައެއް ވަނީ ފުރިފަ އެވެ. މިރޭ 12:00 އަށް މުޒާހަރާ ނިންމާލުމަށް ފުލުހުން އެދިފައިވިޔަސް، އެމްޑީޕީން ބުނެފައި ވަނީ ދަންވަރަށް މުޒާހަރާ ހުއްޓާ ނުލާނެ ކަމަށެވެ.
ސަރުކާރުގެ "އަނިޔާވެރިކަން ނިންމަން" ކަމަށް ބުނެ އެމްޑީޕީން އިސް ނަގައިގެން އަދާލަތާއެކު ކުރިއަށް ގެންދާ މުޒާހަރާ-- ސަން ފޮޓޯ/ އަލީ ނަސީރު
މުޒާހަރާ ފެށުމުގެ ކުރިން ރާއްޖެ ޓީވީއަށް ދެއްވި އިންޓަވިއުއެއްގައި އެމްޑީޕީ ޕާލަމެންޓްރީ ގްރޫޕުގެ ލީޑަރު އިބްރާހިމް މުހައްމަދު ސާލިހު (އިބޫ) ވިދާޅުވެފައި ވަނީ މެންދަރު 12:00 ފަހުން ވެސް މުޒާހަރާ ކުރުމަށް ގާނޫނުން ބާރު ލިބިގެންވާ ކަމަށާއި މިރޭ ވެސް 12:00 ފަހުން މުޒާހަރާ ކުރިއަށް ގެންދާނެ ކަމަށެވެ.
މުޒާހަރާގެ ބައިވެރިން މިހާރު އެއްވެފައި ވަނީ ގ. ކެނެރީގެ ހުންނަ ގޯޅި އާއި މަޖީދީމަގު ގުޅޭ ސަރަހައްދުގައި. އެ ސަރަހައްދުގައި މުޒާހަރާގެ އިސް ބައިވެރިން ވެސް އެބަތިބި.
އަޑުގަދަ ކުރާ ހަރުކޮށްފައި ހުރި ކަމަށް ބެލެވޭ، ލެކިއުޓް ފިހާރަ ހިންގާ އިމާރާތުގެ ސެކިއުރިޓީ ގާޑު ފުލުހުން ބަލައި ފާސްކޮށްފައި. ފުލުހުން މިހާރު މަސައްކަތް ކުރަނީ އެ ގެއަށް ވަނުމަށް ކަމަށް ބެލެވޭ.
އަޑުގަދަ ކުރާގެ އަޑެއް މިހާރަކު ނީވޭ.
ހަތަރު އަނގޮޅި ކަންމަތީގައި އިށީންދެގެން ތިބި މުޒާހަރާގެ އިސް ބޭފުޅުން ވަށައިގެން ބެރިކޭޑް ޖަހައިފި. ބެރިކޭޑް ޖަހާފައި ވަނީ މަޖީދީމަގާއި ޗާންދަނީ މަގު ގުޅޭ ހަތަރު އަނގޮޅި، ސަރަހައްދުގައި ހުންނަ ޓްރެފިކް ލައިޓް ކައިރީގައި
މުޒާހަރާ ރޫޅާލުމަށް ޕެޕާ ސްޕްރޭ ވެސް ފުލުހުން ވަނީ ޖަހާފައި. އަދި އެއްވެސް މީހަކު ހައްޔަރުކޮށްފައެއް ނުވޭ.
ރަޔަޓް ފުލުހުން މުޒާހަރާގެ ބައިވެރިން ތިބި ލެކިއުޓް ކައިރީގައި ތިބި މީހުން ދުރަށް ޖައްސަން ފަށައިފި. ނަމަވެސް އެމްޑީޕީގެ ލީޑާޝިޕްގެ އިސް ބޭފުޅުން އަދިވެސް ތިބީ އެ ސަރަހައްދުގައި އިށިންދެގެން. ނަމަވެސް އަދި އެ މީހުން ހައްޔަރެއް ނުކުރޭ.
މުޒާހަރާގެ ބައިވެރިން ތިބީ މަޖީދީމަގާއި ޗާންދަނީމަގު ގުޅޭ ހަތަރު އަނގޮޅިކަންމަތީގައި އިށީންދެގެން. ސަރުކާރާ ދެކޮޅަށް އަދިވެސް ދަނީ އަޑު އުފުލަމުން. އަޑުގަދަ ކުރާ ފުލުހުންގެ ބެލުމުގެ ދަށަށް ގެންދިއުމުން، މިހާރު އަޑު އުފުލަމުންދަނީ ހުރިހާއެންމެން އެއް އަޑަކުން.
ފުލުހުންގެ އިންފޮމޭޝަން އޮފިސަރު އިސްމާއިލް އަލީ މިރޭ ސަން އަށް ވިދާޅުވީ 11:00 ހިނގުމާއެކު އަޑުގަދަ ކުރާ ބޭނުން ނުކުރަން ފުލުހުން މުޒާހަރާގެ ބައިވެރިންނަށް އިލްތިމާސްކޮށްފައިވާ ކަމަށް.
މުޒާހަރާގެ ބައިވެރިންނާ އިލްތިމާސްކޮށް، ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދާއި ކުރީގެ އިސްލާމިކް މިނިސްޓަރު ޑރ. އަބްދުލް މަޖީދު އަބްދުލް ބާރީ ވާހަކަފުޅު ދައްކަވައިފި.
ޑރ. މަޖީދު ވިދާޅުވީ މުޒާހަރާ ކުރަނީ ސަރުކާރާ ދެކޮޅަށް ނޫން ކަމަށާއި މުޒާހަރާ ކުރަނީ ސަރުކާރު ޒިންމާދާރު ކުރުވުމަށް ކަމަށް. އަދި ސަރުކާރު ޒިންމާދާރު ކުރުވުމަށް އެމްޑީޕީން ކުރަމުންދާ މަސައްކަތް ހުއްޓުވުމަށް މަސައްކަތްކޮށްގެން ނުވާނެ ކަމަށް ވިދާޅުވި.
އިދިކޮޅު ފަރާތްތަކުން މާލޭގައި މިރޭ ކުރިއަށް ގެންދާ މުޒާހަރާއާ ގުޅިގެން ފުލުހުން ގެންދަނީ މާލޭގެ އެކި ސަރަޙައްދުތަކުގައި ސަލާމަތާއި ރައްކާތެރިކަން ބަލަހައްޓަމުން
ޔާމީންގެ އަނިޔާވެރިކަން ހުއްޓުވާނަން. ޔާމީންގެ ވެރިކަން ވެސް ވައްޓާލާނަން. ވެރިކަން ވައްޓާލާފައި އަޅުގަނޑުމެންގެ މި މަސައްކަތް ހުއްޓާލާނީ.
ގާޑިޔަލެއްގައި ބަހައްޓާފައިވާ ޕޯޑިއަމަށް އަރައި، މުޒާހަރާގެ އިސް ބޭފުޅުން ދަނީ ސަރުކާރާ ދެކޮޅަށް އަޑު އުފުލަމުން. މިހާރު ވާހަކަފުޅު ދައްކަވަމުން ގެންދަވަނީ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު.
މިހާރު ވާހަކަފުޅު ދައްކަވަމުން ގެންދެވަނީ ޖުމްހޫރީ ޕާޓީގެ ޕާލަމެންޓްރީ ގްރޫޕުގެ މެމްބަރު އަލީ ހުސައިން. ޖުމްހޫރީ ޕާޓީގެ މަޖިލިސް މެމްބަރު އަލީ ހުސައިން މުޒާހަރާގެ އިސް ސަފުގައި ހަރަކާތެތެރިވެވަޑައިގެންނަވާއިރު، އެ ޕާޓީން ވަނީ މުޒާހަރާގައި ބައިވެރިނުވުމަށް ނިންމާފައި.
އަދާލަތު ޕާޓީގެ ފަރާތުން ޝިދާތާ ޝަފީރު މުޒާހަރާގައި ވާހަކަފުޅު ދައްކަވަން ފައްޓަވައިފި.
ގިނަ ބަޔަކު މުޒާހަރާގައި ބައިވެރިވުމަށް ޝިދާތާ އެދިވަޑައިގެންނެވި. އިދިކޮޅު ސަފުތަކާ ގުޅިގެން، ސަރުކާރުގެ "އަނިޔާވެރިކަން" ނިންމަށް ހުރިހާ ރައްޔިތުންނަށް ޝިދާތާ ވަނީ ގޮވާލައްވައިފި.
ދިގު ދެމިގެންދާނެ މުޒާހަރާއެއް ކުރާނެ ބައެއްގެ ނަމޫނާ މުޒާހަރާގެ ބައިވެރިން ދެއްކުމަށް ޝިފާޒު އެދިވަޑައިގެންފި.
މިހާރު ވާހަކަފުޅު ދައްކަވަމުން ގެންދަވަނީ އެމްޑީޕީގެ ނައިބު ރައީސް ޝިފާޒު. އޭނާ ވެސް ވަނީ ނަޝީދާއިކާނަލް ނާޒިމާއި ޝެއިހް އިމްރާން މިނިވަންކޮށްދިނުމަށް އެދި އަޑުފުލަމުން.
އިބޫ ވިދާޅުވީ މިރޭ ފެށި އެއްވުމަކީ ސިލްސިލާއަކަށް ދެމިގެންދާނެ އެއްވުމެއް ކަމަށާއި އެކަން ހުއްޓަވާ ނުލައްވަވާނެ ކަމަށް. މުޒާހަރާ ކުރިއަށް ގެންދާނީ ސުލްހަވެރިކަމާއެކުގައި ކަމަށް އިބޫ ވިދާޅުވި.
ފަރުދީ ޒިންމާގެ މުހިއްމުކަން މި ވަނީ މި ގައުމަށް ވަރަށް މުހިންމު ވެފައި. މި ގާނޫނު އަސާސީ އަނިޔާވެރި ކަމަކަށް ފުރުސަތެއް ނުދޭ. އަޅުގަނޑު ތިޔަ ހުރިހާ ބޭފުޅުންނަށް ގޮވާލަނީ ތިބޭފުޅުން ފަރުދީ ޒިންމާ ނަންގަވައި މަސައްކަތް ކުރިއަށް ގެންދިއުމަށް. އެހެން ނޫނީ މި ގައުމު ސޮއްސާލައިގެން ދާނީ އެތައް އަހަރެއް ފަހަތަށް.
މަޖީދީމަގާއި ޗާންދަނީމަގު ގުޅޭ ހަތަރު އަނގޮޅި ކަންމަތީގައި މުޒާހަރާގެ ބައިވެރިން މަޑުކޮށްގެން ތިބެ، ޕޯޑިއަމެއް ބަހައްޓައި، އަޑުގަދަ ކުރާ ބޭނުންކޮށްގެން ދަނީ އަޑު އުފުލަމުން. މިހާރު ވާހަކަފުޅު ދައްކަވަމުން ގެންދަވަނީ އިބޫ
މުޒާހަރާގެ ބައިވެރިންނާ މުހާތަބުކޮށް އިބޫ ވާހަކަ ދައްކަމުން ދަނިކޮށް، މުޒާހަރާގެ ތެރެއަށް ވަތް ފުލުހުން ހިނގައްޖެ. އެ މީހުން އިބޫއާ ދެއްކެވި ވާހަކަތަކުގެ ތަފްސީލެއް އަދި ނުލިބޭ
މުޒާހަރާގެ ތެރެއަށް ވަތް ފުލުހުންނާ ވާހަކަ ދައްކަނީ އެމްޑީޕީގެ ޕާލަމެންޓްރީ ގްރޫޕުގެ ލީޑަރު އިބްރާހިމް މުހައްމަދު ސާލިހު (އިބޫ).
