Last Updated: 1 decade 6 month ago
ދިއްގަރު ދާއިރާގެ ބައި އިލެކްޝަންގައި ވޯޓު ފޮށި ބަހައްޓާފައިވާ ހަ ރަށުގެ ތެރެއިން ބައެއް ރަށްތަކުގައި ވޯޓު ފޮށިތައް ބަންދުކޮށް، ވޯޓު ގުނަން ތައްޔާރުވެއްޖެ އެވެ.
ވޯޓު ގުނަން ފަށާނީ މިއަދު ހަވީރު 4:30 ގަ އެވެ. މާލެއާއެކު ދިއްގަރު ދާއިރާގެ ވޯޓު ފޮށި ބަހައްޓާފައި ވަނީ މ. ދިއްގަރާއި އެ އަތޮޅު މަޑުއްވަރީ އާއި މުލި އާއި ރަތްމަންދޫ އަދި ވޭވަކުގަ އެވެ.
ދިއްގަރު ދާއިރާގެ ވޯޓުލުން ކުރިއަށްދަނީ މިއަދު ހެނދުނު 8:00 އިން ފެށިގެން 4:00 އަށެވެ. މިއަދު ހަވީރު 4:00އާ ހަމައަށް ވޯޓުލާނެ އިތުރު ބަޔަކު ނެތުމުން، ވޯޓު ފޮށިތައް ބަންދުކޮށްފައި ވަނީ ދިއްގަރާއި ރަތްމަންދޫ އާއި ވޭވަށް އާއި މަޑުއްވަރި އަދި މުލި އެވެ. މާލޭގައި ބަހައްޓާފައިވާ ވޯޓު ފޮށި ބަންދުކޮށްފައި ވަނީ 4:10 ގަ އެވެ.
ދިއްގަރު ދާއިރާގެ އިންތިބާހުގައި ވާދަ ކުރައްވަނީ:
ޝަމީމް އަލީ
މޫސާ ނަސީރު އަހްމަދު
އަހްމަދު ރާޒީ (އެމްޑީޕީ ކެންޑިޑޭޓް)
އަހުމަދު ފާރިސް މައުމޫން (ޕީޕީއެމް ކެންޑިޑޭޓް)
ރައްޔިތުންގެ މަޖިލީހުގެ ދިއްގަރު ދާއިރާގެ ބައި-އިލެކްޝަން ރައީސް މައުމޫން އަބްދުލް ގައްޔޫމްގެ ދަރިކަލުން ފާރިސް މައުމޫން ބޮޑު އަގުލަބިއްޔަތުން ކާމިޔާބު ކުރައްވައިފި އެވެ.
ސަރުކާރު ހިންގާ ޕީޕީއެމްގެ ޓިކެޓުގައި ނުކުންނެވި ފާރިސް ވަނީ ހަތަރު ކެންޑިޑޭޓުންނާ ވާދަ ކުރައްވައި ދިއްގަރު ދާއިރާގެ ހުރިހާ ވޯޓު ފޮށިތަކުން ކުރި ހޯއްދަވާފަ އެވެ. އޭނާ ވަނީ އިންތިހާބުގައި ވޯޓުލީ މީހުންގެ 59.4 ޕަސެންޓް ވޯޓު ހޯއްދަވާފަ އެވެ. އެއީ 1238 ވޯޓެވެ.
ފާރިސްއާ އެންމެ ކައިރިން ވާދަ ކުރެއްވީ އިދިކޮޅު އެންމެ ބޮޑު ޕާޓީ، އެމްޑީޕީގެ ކެންޑިޑޭޓް އަހުމަދު ރާޒީ އެވެ. އޭނާއަށް ލިބިވަޑައިގެންނެވީ ވޯޓުލީ މީހުންގެ 36.6 ޕަސެންޓް ވޯޓެވެ. އެއީ 763 މީހުންގެ ވޯޓެވެ.
އަމިއްލަ ގޮތުން އިންތިހާބުގައި ވާދަ ކުރެއްވި ލޯކަލް ގަވަމަންޓް އޮތޯރިޓީ (އެލްޖީއޭ)ގެ ނައިބު ރައީސް މޫސާ ނަސީރު އަހުމަށް ލިބިވަޑައިގެންނެވީ 31 ވޯޓެވެ.
އަމިއްލަ ގޮތުން ވާދަ ކުރެއްވި އަނެއް ކެންޑިޑޭޓަކީ މ. މަޑުއްވަރި، އިރޯސް، ޝަމީމް އަލީ އެވެ. އޭނާއަށް ލިބިވަޑައިގެންނެވީ 52 ވޯޓެވެ.
ދިއްގަރު ދާއިރާގައި ހިމެނޭ ދިއްގަރާއި މަޑުއްވަރީ އާއި ވޭވަށާއި ރަތްމަންދޫ އާއި މުލީގެ އިތުރުން މާލޭގައި ދިރިއުޅޭ އެ ދާއިރާގެ ރައްޔިތުންނަށް އިސްކަންދަރު ސްކޫލްގައި ވޯޓު ފޮއްޓެއް ބެހެއްޓި އެވެ. އެ ދާއިރާގައި ވޯޓުލުމުގެ ހައްގު ލިބިގެންވާ މީހުންގެ ތެރެއިން 82.4 ޕަސެންޓް މީހުން ވޯޓުލާން ނުކުތެވެ. އެއީ 2107 މީހުންނެވެ. އެ ދާއިރާގައި ވޯޓުލުމުގެ ހައްގު ލިބިގެންވަނީ 2555 މީހުންނަށެވެ.
ވޯޓު ގުނަން ފަށައިފި
ހަވީރު 4:00 އަށް ވޯޓު ފޮށިތައް ބަންދު ރަށްތަކުގައި ވޯޓު ގުނަން ފަށައިފި. މާލޭގައި ވޯޓު ގުނަން ފަށާނީ 4:40ގައި. އެއީ އެ ފޮށި ބަންދު ކުރީ 4:10 ގައި ކަމަށްވާތީ، ވޯޓު ގުނަން ޖެހޭނީ ބަންދު ކުރިތާ 30 މިނިޓް ފަހުން ކަމަށްވާތީ.
