06 Jun 2015, 15:10
މާލޭގެ މަގުތަކުގައި ބަހައްޓާފައި ހުރި ގިނަ ދުވަސްވެ ހަލާކުވެފައިވާ ވެހިކަލްތަކާއި ވެރިފަރާތް ނޭނގޭ ގޮތަށް ބަހައްޓާފައި ހުރި ވެހިކަލްތައް ނަގައި ތިލަފުއްޓަށް ގެންދަން ފަށައިފި އެވެ.
ސަބް އިންސްޕެކްޓާ އޮފް ޕޮލިސް އަހުމަދު ހަނީފް މިއަދު ވިދާޅުވީ މާލޭގެ މަގުތަކާއި ގޯޅިތަކުގައި ޕާކްކޮށްފައި ހުރި ގިނަދުވަސްވެ ހަލާކުވެފައިވާ ވެހިކަލްތަކާއި ސުންބޯޑު ޖަހައި ވެރިފަރާތް ނޭގޭ ގޮތަށް ބަހައްޓާފައި ހުރި ވެހިކަލްތައް ނެގުމަށް ފަށާފައިވާ އޮޕަރޭޝަން ހުއްޓާލާނީ މާލޭގެ މަގުތަކުގައި އެގޮތަށް ބަހައްޓާފައި ހުރި ގިނަދުވަސްވީ އުޅަނދުތައް ނަގައި މަގުމަތި ސާފުކުރެވުމުން ކަމަށެވެ.
"މާލެއިން ނެގޭ ހުރިހާ ވެހިކަލެއް ގެންދިއުމަށް ހަމަޖެހިފައި ވަނީ ތިލަފުއްޓަށް. ވެހިކަލްތައް ގެންދިއުމުގައި ލިބޭ ގެއްލުމަށް ފުލުހުންނާއި ކަމާ ބެހޭ ފަރާތްތަކުން ޒިންމާ ނުވާނެ. ތިލަފުއްޓަށް ގެންދެވޭ ވެހިކަލް މާލެގެނެވޭނީ ހަމަޖެހިފައިވާ އުސޫލުގެ މަތިން ގާނޫނީ ގޮތުން އެވެހިކަލެއްގެ ވެރިފަރާތުން ފުރިހަމަކުރަން ޖެހޭ ކަންކަން ފުރިހަމަ ކުރުމުން،" ހަނީފް ވިދާޅުވި އެވެ.
ފުލުހުން ބުނީ ޓްރެފިކް މެނޭޖްމަންޓް ޑިޕާޓްމަންޓުން މިއަދު ފެށި އެމަސައްކަތުގައި މިއަދު ހެނދުނު 09:00 ން ފެށިގެން މެންދުރު 12:00 އާ ހަމައަށް ހަތަރު ފުރޮޅުލީ 14 ވެހިކަލް މާލޭގެ އެކި ސަރަހައްދުތަކުން ޓޯކޮށްގެން ތިލަފުއްޓަށް ގެންދިއުމަށް މަސައްކަތް ކުރަމުންދާ ކަމަށް ފުލުހުން ބުންޏެވެ.
މީގެ ކުރިން އެކިފަހަރުމަތިން ޓޯކޮށް ގާކޮށީގައި ބަހައްޓާފައި ހުރި 21 ވެހިކަލެއް ވެސް މިއަދު ތިލަފުއްޓަށް ގެންދިއުމަށް ބާޖަށް އަރުވާފައި ވާނެ ކަމަށް ވެސް ފުލުހުން ބުންޏެވެ.
މީގެ ކުރިން ވެސް ފުލުހުން ވަނީ މާލޭގެ އެކި ސަރަހައްދުތަކުގައި ގަވައިދާ ހިލާފަށް ޕާކްކޮށްފައި ހުންނަ އުޅަނދުތަކާއި ގިނަ ދުވަސްތަކެއް ވަންދެން ބަހައްޓާފައި ހުންނަ ވެހިކަލްތައް ނަގައިފަ އެވެ.