01 Jun 2015, 11:44
ށ. ފީވަކުން ފެނިފައިވާ ދަނޑުވެރިކަމަށް ނުރައްކާތެރި ސުއިޕެއް ކަމަށްވާ ފުރުޓްފުލައި އުޅޭތޯ އިތުރު 10 ރަށަކަށް ޓުރެޕް ފޮނުވުމަށް ނިންމާފައިވާ ކަމަށް ދަނޑުވެރިކަމާ ބެހޭ ވުޒާރާ އިން ބުނެފި އެވެ.
ފިޝަރީޒް އެންޑް އެގްރިކަލްޗާ މިނިސްޓަރުގެ ނައިބު މުހައްމަދު ޝަރީފް މިއަދު ސަން އަށް ވިދާޅުވީ، ފީވަކުގައި ޓުރެޕް ބޭނުންކޮށްގެން އެސޫފި ކޮންޓުރޯލް ކުރުމުގެ މަސައްކަތް ވަރަށް ކާމިޔާބުކަމާ އެކު ކުރަމުންދާ އިރު ފީވަކުން ތަކެތި ގެންދާ އިތުރު 10 ރަށަކަށް ޓުރެޕް ފޮނުވައިގެން ޗެކް ކުރުމަށް އެ މިނިސްޓްރީ އިން ނިންމާފައިވާ ކަމަށެވެ.
"ފީވަކުން ބައެއް ފަހަރަށް ތަކެތި ގެންދާ ރަށްރަށް އެބަހުރޭ ދަނޑުވެރިކަން ކުރާ ރަށްރަށް ވެސް. މިސާލަކަށް ކުޅުދުއްފުށި މާކެޓް ތަންތަން އެބައުޅޭ، އެހެންވީމާ ބައެއް އެސަރަހައްދުގެ ބައެއް ރަށްރަށް ޗެކްކޮށް ބަލާލަން އެބަ ޖެހޭ." ޝަރީފް ވިދާޅުވި އެވެ.
ޓުރެޕް އަކީ އޭތި ހަރުކުރުމުން އޭގައި ހުންނަ ވަހެއްގެ ސަބަބުން އަމިއްލަ ޒާތުގައި ފުރުޓް ފުލައި އެއަށް އަންނަ އެއްޗެކެވެ. އަދި އޭގެ ވަހުން އެ ސޮރު މަރުވާ އެއްޗެކެވެ.
މިހާތަނަށް އެއްވެސް ރަށަކުން ފުރުޓްފުލައި ފެނިގެން ރިޕޯޓްކޮށްފައި ނުވާ ކަމަށާއި އޭތި ކޮންޓުރޯލް ކުރުމަށް ޗެކްކުރަން ޖެހޭ 10 ރަށުގެ މަސައްކަތް ދެ ހަފްތާއެއްގެ ތެރޭގައި ނިންމާލެވޭނެ ކަމަށް ޝަރީފް ވިދާޅުވި އެވެ.
"މިހަފްތާ ނިމޭ ހިސާބުގައި އެ ރަށްތަކަށް ފޮނުވޭނެ ކަމަށް މިބަލަނީ. ކުރިއަށް އޮތް ދެ ހަފްތާއެއްހާ ދުވަސްތެރޭގައި ބަލައި ނިންމާލެވޭނެ،" ޝަރީފް ވިދާޅުވި އެވެ.
ފުރުޓް ފްލައި އަކީ ދުނިޔޭގެ ވަރަށް ގިނަ ގައުމުތަކުގައި އުޅޭ އަދި އޭގެ ސަބަބުން އެ ގައުމެއްގައި ހައްދާ މޭވާ އާއި ތަރުކާރީއަށް އެންމެ ބޮޑަށް ގެއްލުންދޭ އެއް ސޫތްޕެވެ. އޭގެ ސަބަބުން ގަހުން ލިބޭ ގޮވާމުގެ 90 ޕަސެންޓް ނުވަތަ 100 ޕަސެންޓު މޭވާ ބައެއްފަހަރު ހަލާކުވެގެންދެ އެވެ.
ފުރުޓް ފްލައި ގެއްލުންދޭ މޭވާތަކުގެ ތެރޭގައި އަނބު، ޖަނބުރޯލު، ފަޅޯ، ފޭރު، މިރުސް، ލުނބޯ، ޓޯމާޓޯ، ކެޕްސިކަމް، ބަނބުކެޔޮ، ކިއުކަމްބާ އަދި އެކިވައްތަރުގެ މޭވާ އާއި ތަރުކާރީ ހިމެނެ އެވެ.