ހިބަރެއްގެ ތުންގަނޑުން ހެރި މީހަކު މަރުވެއްޖެ

31 May 2015, 13:25

ހަވާއީގެ މަސްވެރިއެއްގެ ގަޔަށް ހިބަރެއްގެ ތުންގަނޑު ހެރިގެން އެމީހާ މަރުވެއްޖެ އެވެ.

ދަ ގާޑިއަން ނޫހުން އިއްޔެ ބުނީ ހުކުރު ދުވަހު ހިނގި ހާދިސާގައި މަރުވެފައި ވަނީ އުމުރުން 47 އަހަރުގެ ރޮންޑީ ލެލޭންސް ކިޔާ މީހެއް ކަމަށާއި އޭނާ މަރުވީ މަސްމަރާ ބަޑިއަކުން ހިބަރަށް ހަމަލާދީ އެ ސޮރު އަތުލަން އުޅުމުގެ ތެރޭގައި ކަމަށެވެ.

ފުލުހުންނާ ހަވާލާދީ ނޫހުން ބުނީ އެ ރޮންޑީ ހިބަރަށް ބަޑި ޖެހުމުން އެ ސޮރު ހުކްނައްޓާލުމަށް ތެޅިފޮޅުނު ކަމަށާއި އަދި ފަހުން ބާރު ސްޕީޑްގައި އޭނާ އާ ދިމާލަށް އައިސް ތިން ފޫޓު ދިގު ތުންގަނޑު ރޮންޑީގެ މެޔަށް ވައްދާލީ ކަމަށެވެ. ނަމަވެސް ރޮންޑީ ވަގުތުން މައްޗަށް އެރި ކަމަށާއި އަދި ވަގުތުން ކުއްލި ފަރުވާދިން ކަމަށާއި އެކަމަކު އޭނާ ސަލާމަތް ނުވި ކަމަށެވެ. އޭނާ މަރުވީ ހޮސްޕިޓަލުގައި ކަމަށް ނޫހުން ބުންޏެވެ.

ހަވާއީގެ އަހުލުވެރި ރޮންޑީ އަކީ ޗާޓާ މަހުގެ ވިޔަފާރީގައި ބޯޓެއްގެ ކެޕްޓަނެއްގެ ގޮތުގައި 18 އަހަރުވަންދެން މަސައްކަތް ކުރުމުގެ އިތުރަށް 25 އަހަރުވަންދެން ހަވާއި ކަނޑާއި މޫދަށް ފަރިތަ މީހެކެވެ.

ރޮންޑީ ލެލޭންސް --

ތުންގަނޑުލީ ހިބަރުގެ ހަމަލާތަކުން ކުރިން ވެސް މީހުން ޒަހަމުވެ އަދި މަރުވެސްވެފައިވެ އެވެ.