27 May 2015, 22:02
ސަރުކާރުން ބޭނުންވާ ފެންވަރަށް މަސައްކަތްތައް ކުރިއަށް ނުދާތީ އެނބުރި ރާއްޖެ ވަޑައިގަތުމަށް މިއަދުގެ ވަގުތެއްގައި މަގާމުން އިސްތިއުފާ ދެއްވާފައިވާ މެލޭޝިއާގައި ހުންނަވާ ދިވެހި ސަފީރު މުހައްމަދު ފަޔާޒު (އެފްއޭ) އަށް ފޮރިން މިނިސްޓަރު ދުންޔާ މައުމޫން އަންގަވާފައިވާ ކަމަށް ފޮރިން މިނިސްޓްރީން ބުނެފި އެވެ.
ފޮރިން މިނިސްޓުރީން މިއަދު ނެރުނު ނޫސް ބަޔާނެއްގައި ބުނެފައި ވަނީ ފަޔާޒަށް މާލެ ވަޑައިގަތުމަށް މިނިސްޓަރު ދުންޔާ އަންގަވާފައި ވަނީ ސިޓީ އަކުން ކަމަށެވެ.
ފަޔާޒު މިއަދު ކުރެއްވި ޓުވީޓެއްގައި ވިދާޅުވެފައި ވަނީ މެލޭޝިއާގައި ހުންނަވާ ދިވެހި ސަފީރުކަމުން އިސްތިއުފާ ދެއްވަން އޭނާ ނިންމާފައިވާ ކަމަށެވެ.
"މުހައްމަދު ފަޔާޒު އެނބުރި ވަޑައިގަތުމަށް ފޮރިން މިނިސްޓަރު އެންގެވީ ރާއްޖޭގެ ހާރިޖީ ސިޔާސަތުގެ މަގުސަދުތައް ހާސިލު ކުރުމުގައި މެލޭޝިއާގައި ރާއްޖެއިން ކުރިއަރުވަން ބޭނުންވާ މަސްލަހަތުތައް ކުރިއެރުވުމަށް ސަރުކާރުން ބޭނުންފުޅުވާ ފެންވަރަށް ސައްކަތްތައް ކުރިއަށްދާ ކަމަށް ފެނިވަޑައިނުގަންނަވާތީ އެވެ،" ފޮރިން މިނިސްޓުރީން ނެރުނު ބަޔާނުގައި ބުނެފައިވެ އެވެ.
މެލޭޝިއާގައި ހުންނަވާ ދިވެހި ސަފީރެއްގެ މަގާމު ފަޔާޒާ ހަވާލު ކުރެއްވީ މިދިޔަ އަހަރުގެ މިދިޔަ އޭޕްރީލު މަހުގެ 29 ވަނަ ދުވަހު އެވެ. އޭނާ އަކީ މީގެ ކުރިން ހޯމް މިނިސްޓްރީގެ ސުޓޭޓް މިނިސްޓަރުކަން ވެސް ކުރައްވާފައިވާ ފަރާތެކެވެ. އަދި ހަމައެއާއެކު ފަޔާޒަކީ ކުރީގެ ޑެޕިއުޓީ ކޮމިޝަނަރު އޮފް ޕޮލިސްގެ މަގާމު ވެސް ފުރުއްވާފައިވާ ފަރާތެކެވެ. މެލޭޝިއާގެ ސަފީރު ކަމަށް ފަޔާޒު އައްޔަން ކުރެއްވުމުގެ ކުރިން އޭނާ ވަނީ ފޮރިން މިނިސްޓުރީގެ ސުޓޭޓު މިނިސްޓަރު ކަމުގެ މަގާމު ވެސް އަދާ ކުރައްވާފަ އެވެ.