27 May 2015, 14:56
ދިވެހި ދައުލަތް މިއަދު ދިފާޢުކުރަން ޖެހިފައި މިވަނީ، ހަމައެކަނި ބޭރުގެ ދުޝްމަނުންނާއި ޢަދާވާތްތެރިންގެ ފަރާތުން ނޫން ކަމަށާއި ދިވެހިންގެ ތެރޭގައި އޮތް ސިޔާސީ ހަލަބޮލި ކަމުން ވެސް ގައުމު ދިފާއު ކުރަން ޖެހޭ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
މޯލްޑިވްސް ނޭޝަނަލް ޑިފެންސް ފޯސްގެ ޑިފެންސް އިންޓިޓިއުޓް ފޮ ޓްރޭނިންގް އެންޑް އެޑިޔުކޭޝަންގެ ފަރާތުން ހިންގި 61 ވަނަ އަސާސީ ތަމްރީން ކޯހުގެ ބައިވެރިން، ސިފައިންގެ ހުވާ ކުރުމާއި ބަޑި ހަވާލުކުރުމަށް ޓަކައި މިއަދު ހެނދުނު ބަންޑާރަކޮށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ދިވެހި ސިފައިންނަކީ ގާނޫނީ ހުވާގެ މަތީގައި ދެމިތިބޭ، ސަފުތައް ބަދަހިކުރުމަށް މަސައްކަތްކުރާ، ދިވެހި ދަޢުލަތަކަށް ދިމާވާ ކޮންމެ ނުރައްކަލަކަށް ކުރިމަތިލާން ކެރޭ ބަޔަކަށް ވާން ޖެހޭ ކަމަށެވެ.
ސިފައިންގެ ހިދުމަތާ އަލަށް ގުޅުނު ސިފައިން ހުވާކުރުމުގެ ރަސްމިއްޔާތުގެ ތެރެއިން: ފޮޓޯ/ ރައީސް އޮފީސް
އަދި ދިވެހި ސިފައިންނަކީ ދިވެހި ދައުލަތް ޙިމާޔަތް ކުރުމުގައި، ދެ ވަނަ ފުރުޞަތަކަށް ސުވާލު އުފެއްދުމަށް ޖާގަދޭ ބަޔަކަށް ވެގެންނުވާނެ ކަމަށް ރައީސް ޔާމީންގެ ވާހަކަފުޅުގައި ވިދާޅުވި އެވެ. އެ ރަސްމިއްޔާތުގައި ރައީސް ޔާމީން ވަނީ އަމާނާތްތެރިކަމާއެކީ އޯޑަރުތަކަށް ތަބާވާ ބަޔަކަށް ވުމަށް ދިވެހި ސިފައިންނަށް އިލްތިމާސްކުރައްވާފައި އެވެ.
ރައީސް ވިދާޅުވީ، އަސްކަރިއްޔާ އަށް ޚިދުމަތްކުރުމަށް ވުރެ މަތިވެރި ވަރުގަދަ މަސައްކަތެއް، ގުރްބާނީއެއް ނުވަތަ ޝަރަފްވެރި މަގާމެއްވެސް ދިވެހި ދައުލަތަކު ނޯންނާނެ ކަމަށެވެ. އަދި ސިފައިންގެ ޚިދުމަތާ ގުޅެނީ، ދިވެހި ދައުލަތް ދިފާޢުކުރުމަށާއި ޙިމާޔަތް ކުރުމަށާއި އިސްލާމްދީން ނެގެހެއްޓުމަށާއި ދިވެހި ރާއްޖޭގެ ގާނޫނު އަސާސީ ދެމެހެއްޓުމުގެ އިތުރުން، ގާނޫނީ ސަރުކާރަށް ރައްކާތެރިކަން ދިނުމަށް ކަމުގައި ވިދާޅުވި އެވެ.
ސިފައިންގެ ހިދުމަތާ އަލަށް ގުޅުނު ސިފައިން ހުވާކުރުމުގެ ރަސްމިއްޔާތުގެ ތެރެއިން: ފޮޓޯ/ ރައީސް އޮފީސް
މީގެ އިތުރުން، ބޭރުން އަތުވެދާނެ އެއްވެސް ނުފޫޒެއްގެ ސަބަބުން ހިތްތަކާއި ނަފްސުތައް ހަލާކުވެދިޔުމަށް ޖާގަނުދިނުމަށް ރައީސުލްޖުމްހޫރިއްޔާ ސިފައިންނަށް ނަސޭޙަތްތެރިވެ ވަޑައިގެންނެވި އެވެ.