26 May 2015, 10:54
ރާއްޖޭގައި އިސްލާމީ ރިސޯޓެއް ހަދަން ސައުދީ އަރަބިއްޔާގެ ބޮޑު ކުންފުންޏަކުން ޝައުގުވެރިކަން ފާޅުކޮށްފި އެވެ.
އިސްލާމީ އުސޫލުތަކާ އެއްގޮތަށް ސައުދީ އަރަބިއްޔާގައި ރިސޯޓްތަކެއް ހިންގަމުން އަންނަ އަލް ހުޒާމާ މެނޭޖްމެންޓުން މިމަހުގެ 19 ވަނަ ދުވަހު ބުނިކަމަށް ހޮޓެލިއާ މިޑްލް އީސްޓް ނޫހުން ބުނީ، ރާއްޖޭގައި ރިސޯޓެއް ހަދަން ޝައުގުވެރިވަނީ ރާއްޖެއަކީ އިސްލާމީ ގައުމަކަށް ވެފައި، މެދުއިރުމަތީގެ މީހުންގެ މެދުގައި މަގުބޫލު ތަނަކަށް ވާތީ ކަމަށެވެ.
"...އެއީ އިސްލާމީ ގައުމެއް، އެހެންވީމާ އަހަރެމެންގެ ފަލްސަފާއަށް ފެތޭ. އަދި އެއީ އަރަބި އަދި ޖީސީސީ މާކެޓްތަކަށް ކަމުދާ ތަނެއް،" އަލް ހުޒާމާ މެނޭޖެމެންޓްގެ ހޮސްޕިޓަލިޓީ ޑިވިޝަންގެ ވައިސް ޕްރެޒިޑެންޓް ހުސައިން އަލީ ހަތާތާ ވިދާޅުވިކަމަށް ނޫހުގައި ވެއެވެ.
އަލް ހުޒާމާ ކުންފުނިން މިހާރުވެސް އަންނަނީ ސައުދީ އަރަބިއްޔާގައި ފަސް ހޮޓަލެއްގެ މަސައްކަތް ކުރަމުންނެވެ. އެގޮތުން ޖިއްދާގައި ސައުދީ ސަރުކާރުން ތަރައްގީކުރަމުން އަންނަ ކިންގް އަބްދުﷲ އިކޮނޮމިކް ސިޓީގައި ވެސް ހޮޓަލެއް އެޅުމަށް އެކުންފުނިން ވަނީ އެއްބަސްވުމެއްގައި ސޮއިކޮށްފައެވެ.