20 May 2015, 16:12
މާލޭ ސިޓީގެ ޑެޕިއުޓީ މޭޔަރު ޝިފާ މުހައްމަދު އިބްރާހީމް ނާސިރު އިންޓަނޭޝަނަލް އެއާޕޯޓުގައި މުޒާހަރާ ކުރި ކަމަށް ދެ ފުލުހަކު ހެކިބަސްދީފި އެވެ.
ޝިފާއާ ދެކޮޅަށް ދެ ފުލުހަކު ހެކިބަސްދީފައި ވަނީ ދައުލަތުން އޭނާއާއި އިތުރު ބައެއްގެ މައްޗަށް އުފުލާފައިވާ އަމުރަށްނުކިޔަމަންތެރިވުމުގެ ދައުވާއާ ގުޅިގެން މިއަދު ބޭއްވި ޝަރީއަތުގެ މަޖިލީހުގައެވެ.
މިއަދު ހެކިބަސްދިން ޓޫރިސްޓު ޕޮލިހުގައި މަސައްކަތްކުރާ ދެ ފުލުހަކު ބުނީ މިދިޔަ މާޗް މަހުގެ ފަސް ވަނަ ދުވަހު އިބްރާހީމް ނާސިރު އިންޓަނޭޝަނަލް އެއާޕޯޓުގެ އިންޓަނޭޝަނަލް ޓާމިނަލްގެ ޑިޕާޗާ ހޯލް ކައިރީ ޝިފާއާ އާއި އިތުރު ބަޔަކު އެއްވެއުޅެނިކޮށް އެ ދެ މީހުންނަށް ފެނުނު ކަމަށެވެ.
ދައުލަތުން ޝިފާ އާއި އިތުރުބައެއްގެ މައްޗަށް ދައުވާ ކޮށްފައި ވަނީ ސުލްހަވެރިކަމާ އެކު އެއްވެއުޅުމުގެ މިނިވަންކަމުގެ ގާނޫނާ ޚިލާފަށް އިބްރާހީމް ނާސިރު އިންޓަނޭޝަނަލް އެއާޕޯޓުގައި މުޒާހަރާ ކުރި ކަމަށް ބުނެއެވެ.
ޝިފާގެ އިތުރުން އެމައްސަލާގައި ދައުވާ އުފުލާފައި ވަނީ މ. ފެހިފަތްގެ، ޔުމްނާ އާއި ޏ. ފުވައްމުލައް، މިސްކިތްމަގު، ދޯނާޑު، ޒަހުރާ މޫސާ އާއި މ. ނިވްހިލްމަން، ޝަމީމާ އާދަމްފުޅާއި ހ. ވެޔޮވިލާ، ޝަފިއްއާ ޒުބައިރާއި މއ. ނާރިނގުގޭ މުހައްމަދު އިބްރާހީމް މަނިކު އާއި ސ. ހުޅުދޫ ކަޅުމަގިގޭ މަރިޔަމް ޒުބައިރާއި ސ. ހިތަދޫ ޝެޑިއުލަސް، ޚަދީޖާ ޝާދިޔާ އާއި މާލޭ ދަފްތަރު 5866 ފާތިމަތު ރަޝީދާ އާއިހ. ޓިވެގާލައިޓް ފަރީޝާ އަހްމަދާއި މ. ތަންތާރަ، އާމިނަތު ޒިމްނާ އާއި ގ. އާކާޝްވިލާ، އާމިނަތު ޒާހިރާ އާއި މ. ނިރޮޅު، އާމިނަތު ޝާނީޒު ސައީދާއި ގ. ދުވާފަރު، އާއިޝަތު މަމްދޫހާގެ އިތުރުން މއ. ބީޗްހައުސް، އާމިނަތު ދުމައިނާ އިރުޝާދެވެ.
ދައުލަތުން ހެކީންގެ ގޮތުގައި ހުށަހަޅާފައިވާ 10 ފުލުހުންގެ ތެރެއިން މިއަދު ނަގާފައި ވަނީ 8 ފުލުހެއްގެ ހެކިބަހެވެ. ބާކީ ތިބި ތިން ފުލުހުންގެ ހެކިބަސް ނެގުން އަންނަ ހޯމަ ދުވަހަށް ވަނީ ތާވަލްކޮށްފައެވެ.
ސުލްހަވެރިކަމާ އެކު އެއްވެއުޅުމުގެ ގާނޫނުގައި މުޒާހަރާކުރުމުގެ ވާހަކަ ބުނެފައިނުވާ ކަމަށާއި އެ ގާނޫނުގައި ވަނީ އެއްވެ އުޅުމުގެ ވާހަކަ ކަމުގައިވާތީ، ގާނޫނާ ޚިލާފަށް މުޒާހަރާ ކުރުމުގެ ދައުވާ ނުކުރެވޭނެ ކަމަށް ބުނެ ދިފާއީ ވަކީލުން މިއަދު ވަނީ އިޖުރާއީ ނުކުތާއެއް ނަގާފައެވެ. އެހެންނަމަވެސް ގާޒީ ސުޖާއު އުސްމާން ވަނީ އެއީ އިޖުރާއީ ނުކުތާއެއް ކަމުގައި ބަލައިނުގަތުމަށް ނިންމަވާފައެވެ.
ދައުވާ ލިބޭ އެންމެން ވެސް ވަނީ ދިފާއީ ހެކީންގެ ގޮތުގައި ތިން މީހަކު ހުށަޅާފައެވެ. އެހެންނަމަވެސް ދިފާއީ ހެކީންގެ ހެކިބަސް ނެގުމާ މެދު ކޯޓުން އަދި ގޮތެއް ނިންމާފައެއް ނުވެއެވެ.