20 May 2015, 14:11
ޗައިނާ ޓޫރިސްޓުންނަށް ހާއްސަ ރިސޯޓްތައް ތަރައްގީ ކުރުމަށް ދިވެހި ސަރުކާރާއި ޗައިނާގެ ސަރުކާރުގެ ކުންފުއްޏަކާ ދެމެދު އެއްބަސްވުމެއްގައި ސޮއިކޮށްފިއެވެ.
ޗައިނާ މެޝިނަރީ އިންޖިނިއަރިން ކޯޕަރޭޝަން (ސީމެކް)އާއެކު އެއެއްބަސް ވުމުގައި ދިވެހި ސަރުކާރުގެ ފަރާތުން ސޮއިކުރީ ޓޫރިޒަމް މިނިސްޓަރު އަހުމަދު އަދީބެވެ.
ނޫސްވެރިންނަށް މައުލޫމާތު ދެއްވަމުން މިނިސްޓަރު އަދީބު ވިދާޅުވީ ސީމެކްއަކީ އެ ގައުމުގެ ސަރުކާރު ހިއްސާވާ ބޮޑު ކުންފުންޏެއް ކަމަށާއި އެ ކުންފުނިން އެންމެ ކުޑަވެގެން ރާއްޖޭގައި 200 މިލިއަން ޑޮލަރު އިންވެސްޓް ކުރާނެ ކަމަށެވެ.
"ޗައިނާގެ ސަރުކާރު އިންޓުރެސްޓް އޮތް ކުންފުއްޏަކުން އިންވެސްޓް ކުރުމަކީ އަޅުގަނޑު ދެކޭ ގޮތުގައި ދިވެހި ރާއްޖެއަށް ލިބިގެންދާނެ ވަރަށް ބޮޑު ކުރިއެރުމެއް،" މިނިސްޓަރު ވިދާޅުވި އެވެ.
މިހާރު ރާއްޖޭގެ ރިސޯޓްތައް ހެދިފައި މިހުރީ ޔޫރަޕުގެ ސުޓައިލް އަށް ކަމަށްވާއިރު ޗައިނާ މީހުންނަށް ހާއްސަ ރިސޯޓްތަކާއެކު ޗައިނާ ފަތުރުވެރިންގެ އިތުރު ސަމާލުކަން ލިބޭނެ ކަމަށް ވެސް މިނިސްޓަރު ވިދާޅުވިއެވެ.
ސީމެކް އަށް ތަރައްގީކުރުމަށް ފުރަތަމަ ހަވާލުކުރެވޭނީ ތ. ކަޅުފަހަލަފުށި، ކަމަށާއި އެ ރަށުގެ ފީޒިބަލް ހަދައި މިއަހަރު ތެރޭ ރިސޯޓް ހެދުމުގެ މަސައްކަތް ފެށޭނެ ކަމަށް ވެސް އަދީބު ވިދާޅުވި އެވެ. އޭގެ އިތުރުން އިތުރު ތަންތަނުގައި ވެސް އެ ކުންފުނިން އިންވެސްޓްކުރާނެ ކަމަށް އަދީބު ވިދާޅުވިއެވެ.
ދުނިޔޭގެ އެކި ކަންކޮޅުތަކުގައި ބޮޑެތި އިންވެސްޓްމަންޓްތަކެއް ކޮށްފައިވާ ސީމެކުން ޗައިނާ ޓޫރިސްޓުންނަށް އަމާޒުކޮށްގެން ރާއްޖޭގައި ރިސޯޓްތައް ތަރައްގީކުރާއިރު ޗައިނާއަކީ މިހާރު ރާއްޖެއަށް އެންމެ ގިނަ ޓޫރިސްޓުން އަންނަ ގައުމެވެ.