20 May 2015, 11:27
ބޭންކް އޮފް މޯލްޑިވްސް އިން 100 ވަނަ ރަށުގައި ޚިދުމަތް ދޭން ފަށައިފި އެވެ.
އަތޮޅު ތަކުގެ 100 ވަނަ ރަށުން ފައިސާ ނެގުމުގެ ޚިދުމަތް މިއަދު ދޭން ފަށައިފައި ވަނީ ކ. އަތޮޅު މާފުށީގައެވެ. މިއަދު މާފުށީގައި ބޭއްވި ރަސްމިއްޔާތުގައި ފައިސާ ނެގުމުގެ ޚިދުމަތް ރަސްމީކޮށް ތައާރަފު ކުރައްވާފައިވަނީ ރަސްމިއްޔާތުގެ ޝަރަފުވެރި މެހެމާން މޯލްޑިވްސް މަނިޓަރީ އޮތޯރިޓީގެ ގަވަރުނަރ އަޒީމާ އާދަމެވެ.
އެ ރަސްމިއްޔާތުގައި ވާހަކަފުޅު ދައްކަވަމުން ކުންފުނީގެ ސީއީއޯ އެންޑްރިވް ހީލީ ވިދާޅުވީ ރާއްޖެ ފަދަ ޖަޒީރާ ރަށްތަކެއް ހިމެނޭ ގައުމެއްގައި ހުރިހާ ސަރަހައްދަކަށް ބޭންކްގެ ޚިދުމަތް ދިނުމަކީ އެންމެ ފަސޭހަ ކަންތައް ކަމުގައި ނޫން ވިޔަސް މަސައްކަތް ކުރަމުން ދަނީ ހުރިހާ ރަށެއްގައި ވެސް ބޭންކްގެ ޚިދުމަތް ފޯރުކޮށްދިނުމަށް ކަމަށެވެ.
ހީލީ ވިދާޅުވީ މިއަދު ދޭން ފެށޭ ޚިދުމަތާއެކު ރަށުގެ ރައްޔިތުންނަށް ފަސޭހަކަމާ އެކު ޕީއޯއެސް މެޝިން ބޭނުންކުރެވޭނެ ކަމަށެވެ.
އެ ރަސްމިއްޔާތުގައި ވަހާކަފުޅު ދައްކަވަމުން ޝަރަފުވެރި މެހެމާން ވިދާޅުވީ ފައިސާގެ މުއާމަލާތްތަކުގައި ހުރިހާ ރައްޔިތުންނަށް ޚިދުމަތް ލިބުމަކީ އިޤްތިސާދަށް ކުރިއެރުން ލިބޭނެ ކަމެއް ކަމަށެވެ. އެ މަސައްކަތަކީ ރާއްޖޭގެ ހުރިހާ ރަށެއްގައި ބޭންކްގެ ޚިދުމަތް ދިނުމަށް ބީއެމްއެލް އިން ކުރަމުންގެންދާ މަސައްކަތުގެ ތެރެއިން ދެވެން ފެށި ޚިދުމަތެކެވެ.
މިއަދު ދޭން ފެށި ޚިދުމަތާއެކު ކޮންމެ ފަރާތަކަށް ދުވާލެއްގެ މައްޗަށް 2000 އަށްވުރެ ގިނަ ނުވާ އަދަދަކަށް ފައިސާ ނެގޭނެ އެވެ.