19 May 2015, 21:04
ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު (އަބްދުﷲ ގާޒީ) ހައްޔަރު ކުރުމުގެ މައްސަލައިގެ ކުށް ސާބިތުވެ 13 އަހަރު ދުވަހުގެ ޖަލު ހުކުމެއް ތަންފީޒު ކުރަމުން އަންނަ ކުރީގެ ރައީސް މުހައްމަދު ނަޝީދު މާލެ ގެނެސް ޑޮކްޓަރަށް ދެއްކުމަށް އެޕޮއިންޓްމަންޓެއް ހައްދާފައި ނުވާ ކަމަށް ކަރެކްޝަނަލް ސާވިސް އިން ބުނެފި އެވެ.
ކަރެކްޝަނަލް ސާވިސްގެ އިންފޮމޭޝަން އޮފިސަރު މޫސާ ރަމީޒު މިރޭ "ސަން" އަށް ވިދާޅުވީ ރައީސް ނަޝީދު ޑޮކްޓަރަށް ދެއްކުމަށް މާލެ ގެންނަން އުޅޭ ކަމަށް ބުނެ މިއަދު ހަވީރު މާލެ ތެރޭގައި ފެތުރިގެން ދިޔަ އަޑުތަކަކީ ދޮގު އަޑުތަކެއް ކަމަށެވެ. އޭނާ ވިދާޅުވީ ޖަލު ހުކުމެއް ތަންފީޒު ކުރަމުންދާ ފަރާތެއް ޑޮކްޓަރަށް ދެއްކުން އޮންނަ އުސޫލުތައް ތަފާތު ވާނެ ކަމަށެވެ.
"ޖަލުގައި ހުންނަ މީހަކު ޑޮކްޓަރަށް ދެއްކުމުގެ އުސޫލު މި އޮންނަނީ އެގައިދީ އަކު އެދުނީމަ މިކޮޅުން [ޖަލުގައި ހުންނަ ގައިދީން ދައްކާ ޑޮކްޓަރު] އެހެން ޑޮކްޓަރަކަށް ދެއްކުމަށް އެދުނީމާ އަޅުގަނޑުމެންގެ [ކަރެކްޝަނަލް ސާވިސް] ތެރެއިން އޮންނަ އުސޫލުތަކެއް އޮވޭ ހަމަޖެހިފައި." ރަމީޒު ވިދާޅުވި އެވެ.
އަންނަ ހަފްތާގައި ޑޮކްޓަރަށް ދެއްކުމަށް ނަޝީދު މާލެ ގެންނާނެ ކަމަށް ދެކެވޭ ވާހަކަތަކަށް އިޝާރާތް ކުރައްވައި އޭނާ ވިދާޅުވީ އެފަދަ ކަމެއް އަދި އެނގިފައި ނުވާ ކަމަށެވެ.
ކުރީގެ ރައީސް ނަޝީދު އުޅުއްވަނީ އާލަސްކަންފުޅާތޯ އެހުމުން ރަމީޒު ވިދާޅުވީ "އެކަހަލަ ކަމެއް އިރާދަކުރެއްވިއްޔާ ނޫޅޭ" ކަމަށެވެ.
ރައީސް ނަޝީދު ޑޮކްޓަރަށް ދެއްކުމަށް އޭޑީކޭ ހޮސްޕިޓަލަށް މިއަދު ގެންނަވާނެ ކަމަށް ބުނެ މާލެ ތެރޭގައި ވަނީ އަޑުތަކެއް ފެތުރިފައި އެވެ. އެގޮތުން ރައީސް ނަޝީދަށް ތާއީދު ކުރާ ފަރާތްތަކުން ވަނީ އޭޑީކޭ ހޮސްޕިޓަލް ހުންނަ ސަރަހައްދަށް އެއްވެފައި ވެސް މެ އެވެ. އަދި ބައެެއް ފަރާތްތަކުން ހޮސްޕިޓަލް ތެރޭގައި ވެސް ތިއްބެވެ.
ރައީސް ނަޝީދު 13 އަހަރުގެ ޖަލު ހުކުމް ތަންފީޒު ކުރައްވަމުން ގެންދަނީ މާފުށީ ޖަލުގައި އެމަނިކުފާނަށް ހާއްސަކޮށް ހަދާފައި ހުންނަ ވަކި ހާއްސަ އެޕާޓުމަންޓެއްގައި ކަމަށް ހޯމް މިނިސްޓްރީ އިން ބުނެ އެވެ.