18 May 2015, 15:29
ގާނޫނީ ވަކީލު އަދި މަޝްހޫރި ލިޔުންތެރިޔާ އަހްމަދު ނަޖީބު ގަސްދުގައި މަރާލުމުގެ ކުށުގައި މެރުމަށް ހުކުމް އިއްވާފައިވާ ށ. ގޮއިދޫ ރިހާބު ފާތިމަތު ހަނާގެ ކިބައިން މަރަށް މަރު ހިފޭނެ ކަމަށް ދައުލަތުން ބުނެފިއެވެ.
ހައިކޯޓުގައި މިއަދު ބޭއްވި ޝަރީއަތުގެ މަޖިލީހުގައި ދައުލަތުގެ ވަކީލު ވިދާޅުވީ މީހަކު މެރުމުގައި ބައިވެރިވާ މީހުންގެ މައްޗަށް ވެސް ބައެއް ހާލަތްތަކުގައި ގިސޯސް ހިފިދާނެ ކަމަށް އިލްމުވެރިން ވިދާޅުވާ ކަމަށެވެ.
އެ މައްސަލައިގައި ކަން ހިނގާފައިވާ ގޮތަށް ބަލާއިރު ހަނާގެ މައްޗަށް މަރަށް މަރު ހިފޭނެ ކަމަށާއި ނަޖީބު އަވަހާރަކޮށްލުމުގައި ހަނާ އަމަލީ ގޮތުން ބައިވެރިވެފައިވާ ކަމަށް ދައުލަތުގެ ވަކީލު ވިދާޅުވިއެވެ.
ނަޖީބު އަވަހާރަކޮށްލަން އެއް މަސް ކުރިން ހަނާ އާއި އޭނާގެ ލޯބިވެރިޔާ މ. މަސްރޫރާ އަހްމަދު މުއްރަތު ރާވާފައިވާ ކަމަށާއި އޭނާ އަވަހާރަކޮށްލާފައި ވަނީވެސް ރާވާފައިވާގޮތަށް ކަމަށް ދައިލަތުގެ ވަކީލު ވިދާޅުވިއެވެ.
ދައުލަތުގެ ވަކީލު ވިދާޅުވީ ނަޖީބު އަވަހާރަކޮށްލުމުގައި ހަނާގެ ދައުރަކީ ނަޖީބު ގޮނޑިއެއްގައި ބަނުން ކަމަށާއި އެއީ ކުރިން ވެސް ރާވާފައިވާ ގޮތް ކަމަށެވެ. އަދި ގޮނޑިއެއްގައި ނަޖީބު ބަނުމުގައި ބައިވެރިވެފައިވާކަން ހަނާގެ އިއުތިރާފުން ސާބިތުވާ ކަމަށް ވެސް ދައުލަތުގެ ވަކީލު ވިދާޅުވި އެވެ.
"ނަޖީބު މަރަށް ހުށަހެޅުނީ ހަނާކުރި އަމަލެއްގެ ސަބަބުންކަން މިކަމުން ވެސް ސާފުކޮށް އެނގިގެންދޭ،" ދައުލަތުގެ ވަކީލު ވިދާޅުވި އެވެ.
ނަޖީބު އަވަހާރަކޮށްލާފައި ވަނީ 2012 ވަނަ އަހަރުގެ ޖުލައި މަހުގެ ފުރަތަމަ ދުވަހުގެ ރޭގެ ވަގުތެއްގައެވެ.
ހަނާއާއެކު އޭނާގެ ލޯބިވެރިޔާ މުއްރަތުގެ މައްޗަށް ވެސް ވަނީ މަރުގެ ހުކުމް އިއްވާފައެވެ. އޭނާވެސް ވަނީ އެ މައްސަލަ ހައިކޯޓުގައި އިސްތިއުނާފުކޮށްފައެވެ.