18 May 2015, 09:16
ރާއްޖޭގެ ވިޔަފާރީގެ މާހައުލު އިތުރަށް ތަނަވަސް ކުރުމަށް ޓަކައި ގާނޫނީ ދާއިރާއަށް ގެންނަށް ޖެހޭ ބަދަލުތައް ގެންނަމުން އަންނަ ކަމަށް އެޓާނީ ޖެނެރަލް މުހައްމަދު އަނިލް ވިދާޅުވެއްޖެ އެވެ.
އެންޓަޕްރައިސް ޑިވެލޮޕްމެންޓް ސެންޓަރުތައް އިފްތިތާހު ކުުރުމަށް ހޮޓެލްޖެންގައި ރޭ ބޭއްވި ރަސްމިއްޔާތުގައި ވާހަކަ ދައްކަވަމުން އަނިލް ވިދާޅުވީ ރާއްޖެ އާއި ރާއްޖެ އިން ބޭރުގެ ތަޖުރިބާކާރުން ގުޅިގެން ގާނޫނުތަކަށް ގެންނަން ޖެހޭ ބަދަލުތައް ގެންނަމުން އަންނަ ކަމަށް އަނިލް ވިދާޅުވި އެވެ. އެެގޮތުން ކުންފުންޏާ ބެހޭ ގާނޫނު "ޒަމާނާ އެއްގޮތަށް ބަދަލުކުރުމަށް އަދި އިންވެސްޓްމެންޓަށް ފަހި" ގާނޫނަކަށް ހެދުމަށް މަސައްކަތްކުރައްވާ ކަމަށް އެޓާނީ ޖެނެރަލް ވިދާޅުވި އެވެ.
"މިހާރު އުފެދިފައި އޮތް ސްމޯލް އެންޑް މީޑިއަމް އެންޓަޕްރައިސް ގާނޫނުތައް އިތުރަށް އިސްލާހުކޮށް ހަރުދަނާކުރުމަށް ޓަކައި އަޅަން ޖެހޭ ފިޔަވަޅުތައް އެޅުމާއި އެކަމާ ގުޅުން ހުރި ގަވާއިދުތައް ތައާރަފު ކުރުމުގެ މަސައްކަތް މިދަނީ ވަރަށް ބާރު މިނެއްގައި ކުރިއަށް،" އަނިލް ވިދާޅުވި އެވެ.
މީގެ ނަތީޖާއަކަށް ވެގެންދާނީ ދެމެހެއްޓެނިވި ގޮތެއްގައި އިގްތިސާދީ ތަރައްގީ އައުން ކަމަށް އަނިލް ވިދާޅުވި އެވެ.
އިގްތިސާދީ ކުރިއަރަމުން އައުމާ އެކު ދިވެހި ރާއްޖެ އަށް ހަމަޖެހުމާއި ސަލާމަތާއި ރައްކާތެރިކަން ބޭނުންވާ ކަމަށް އަނިލް ވިދާޅުވި އެވެ. މިކަމަށް ކުރަން ޖެހޭ މަސައްކަތް 'އެންމެން އެކުއެކީ' ކުރަން ޖެހޭ ކަމަށް ވެސް އަނިލް ވިދާޅުވި އެވެ. ގައުމުގެ އިގްތިސާދު ރަނގަޅުވުމުން އޭގެ ފައިދާ ލިބޭނީ ވަކި ކުލައަކަށް ނުވަތަ ވަކި ބަޔަކަށް ނޫން ކަމަށާއި އެހެންކަމުން ހުރިހާ ރައްޔިތުންގެ އެއްބާރުލުން ބޭނުންވާ ކަމަށް އަނިލް ވިދާޅުވި އެވެ.
އެންޓަޕްރައިސް ޑިވޮލޮޕްމެންޓް ސެންޓަރުތަކުގެ ސަބަބުން އާ ވިޔަފާރިތައް އުފެދިގެންދާނެ ކަަމަށް އަނިލް ވިދާޅުވި އެވެ. އަދި މި ސަރުކާރުގެ އިގްތިސާދީ ސިޔާސަތު ކާމިޔާބުވަމުން އަންނަ ކަމަށް އަނިލް ވިދާޅުވި އެވެ.