17 May 2015, 14:52
މާލޭގައި ނައިޓު މާކެޓު ހިންގަން ގޯމީޑިއާ ޕްރައިވެޓް ލިމިޓެޑާ ހަވާލުކޮށްފައި ވަނީ މަގާމުގެ ނުފޫޒު ބޭނުންކޮށްގެން އެ ކުންފުންޏަށް ނާޖާއިޒު ފައިދާއެއް ހޯދައިދިނުމުގެ ގޮތުން ކަމަށް ތުހުމަތު ކުރެވޭތީ ދައުލަތުން ދައުވާ އުފުލާފައިވާ ފަސް ބޭފުޅުންގެ ތެރެއިން ތިން ބޭފުޅަކު ދައުވާ އަށް އިންކާރު ކުރައްވައިފި އެވެ.
އެ މައްސަލައާ ގުޅިގެން ދައުލަތުން ދައުވާ އުފުލާފައި ވަނީ މާލޭ ސިޓީގެ ޑެޕިއުޓީ މޭޔަރުކަން ކުރައްވާފައިވާ ދެ ބޭފުޅުން ކަމުގައިވާ ގ. ޗާންދަނީމާގޭ އިބްރާހީމް ސުޖާއު އާއި މ. ސިސްކިން އަހްމަދު ޝަމާހު ރަޝީދުގެ އިތުރުން ކުރީގެ ކައުންސިލަރު މ. ސީކްއީން އަހްމަދު ހަމީދު (ފްލައި) އާއި ގދ. ތިނަދޫ ފަތިސް އަހްމަދު މިޒުހަތު ނައީމާއި އެއަތޮޅު މަޑަވެލި ނެޕްޗޫން އާއިޝަތު ޖުމާނާ މުހައްމަދު ރަޝީދުގެ މައްޗަށެވެ.
މިއަދު ކްރިމިނަލް ކޯޓުގައި ބޭއްވި އެ މައްސަލައިގެ ޝަރީއަތުގެ އަޑު އެހުމުގައި ދައުވާއަށް އިންކާރު ކުރައްވާފައި ވަނީ ސުޖާއު އާއި ހަމީދުގެ އިތުރުން މުޒުހަތު އެވެ.
ދައުވާއަށް އިންކާރު ކުރެއްވުމަށް ފަހު ސުޖާއު އަދި ހަމީދު ވިދާޅުވެފައި ވަނީ އެބޭފުޅުންގެ ފަރާތުން ޝަރީއަތަށް ޖަވާބު ދާރީ ވާނީ ވަކީލު ކަމަށެވެ. ޝަރީއަތުން މިޒުހަތަށް ވަނީ ވަކީލަކު އައްޔަން ކުރުމަށް ތިން ދުވަހުގެ މުއްދަތެއް ދީފަ އެވެ.
ދައުލަތުން ކުރި ދައުވާއަށް އިންކާރު ކުރައްވަމުން ސުޖާއު އަދި ހަމީދުގެ ވަކީލު މުހައްމަދު ޝިފާޒު ވިދާޅުވީ ދައުލަތުން ދައުވާ އުފުލާފައި ވަނީ ސައްހަ ނޫން މުއާމަލާތެއްގެ މައްޗަށް ކަމަށާއި އެ ދައުވާއަށް އިޖުރާއީ ގޮތުން އިއުތިރާޒު ކުރާ ކަމަށެވެ.
ދިފާއީ ވަކީލަށް ޖަވާބު ދެއްވަމުން ދައުލަތުގެ ވަކީލު ވިދާޅުވީ ގޯ މީޑިއާ އަކީ ނައިޓް މާކެޓް ހިންގުމުގައި އެއްވެސް ތަޖުރިބާއެއް ހުރި ފަރާތެއްކަން އެއްވެސް ޑޮކިއުމެންޓަކުން އެނގެން ނެތް ކަމަށާއި އެހެންނަމަވެސް އޭރު މޭލޭ ސިޓީ ކައުންސިލުގެ ބިޑް ކޮމިޓީގައި ހިމެނިވަޑައިގަންނަވާ މެންބަރުން ގޯ މީޑިއާއަށް ތަޖުރިބާގެ ބައިން ފުލް މާކްސް ދީފައި ވަނީ އެއްވެސް އަސާސެއް ނެތި ކަމަށެވެ.
އެ މައްސަލައިގެ މިއަދުގެ އަޑުއެހުން ނިންމާލަމުން ގާޒީ ވިދާޅުވީ އިތުރު އަޑުއެހުމެއް ކުރިއަށް ގެނދާނީ މައްސަލާގައި ދައުވާ ލިބޭ މ. ސިސްކިން އަހްމަދު ޝަމާހު ރަޝީދުގެ އިތުރުން މަޑަވެލި ނެޕްޗޫން އާއިޝަތު ޖުމާނާ މުހައްމަދު ރަޝީދުގެ އަޑުއެހުމަށް ފަހު ކަމަށެވެ.
ކޮރަޕްޝަން ހުއްޓުވުމާއި މަނާކުރުމުގެ ގާނޫނުގައި ބުނެފައިވާ ގޮތުން މަގާމުގެ ނުފޫޒު ބޭނުންކޮށްގެން އެހެން ފަރާތަކަށް ނާޖާއިޒު ފައިދާއެއް ހޯދައިދިނުމުގެ ކުށެއް ސާބިތުވެއްޖެ މީހެއްގެ އަދަބަކީ ގިނަވެގެން ތިން އަހަރަށް ޖަލަށްލުން ނުވަތަ އަރުވާލުން ނުވަތަ ގޭބަންދުކުރުން ކަމަށެވެ.