13 May 2015, 15:23
މޯލްޑިވްސް ޕެންޝަން އެޑްމިނިސްޓްރޭޝަަން އޮފީހަށް ހަ އަހަރު ފުރުން ފާހަގަކުުރުމުގެ ގޮތުން އެ އޮފީހުގެ އާ ލޯގޯ އާއި އާ ވެބްސައިޓާއި މޯބައިލް އެޕްލިކޭޝަނެއް ތައާރަފްކޮށްފި އެވެ.
ސޯލްޓް ކެފޭ ގައި މިއަދު ބޭއްވި ރަސްމިއްޔާތެއްގައި އާ ލޯގޯ ތައާރަފްކޮށްދެއްވީ ޕެންޝަން ބޯޑުގެ ޗެއާޕާސަން އާތިފާ އަލީ އެވެ. އާ ލޯގޯ ފަރުމާކޮށްފައި ވަނީ ދިވެހިވަންތަކަން ދައްކުވައިދޭ ގޮތަކަށް ކަމަށް ޕެންޝަން އޮފީހުން ބުންޏެވެ. އެ ލޯގޯ ފަރުމާ ކުރުމުގައި ބަލާފައި ވަނީ ރާއްޖެއަށް އެންމެ ފުރަތަމަ ފައިސާ ފޮއްޗެއް ތައާރަފްކުރެއްވި އިސްކަންދަރު ރަސްގެފާނުގެ ސިއްކަފުޅަށެވެ.
ޕެންޝަން އޮފީހުގެ މޯބައިލް އެޕްލިކޭޝަން މެދުވެރިކޮށް ޕެންޝަން ފަންޑަށް ޖަމާވެފައި ހުރި އަދަދާއި ޕެންްޝަން އޮފީހުންދޭ ހިދުމަތްތަކާއި ބެހޭ މައުލޫމާތު ލިބޭނެ ކަމަށް އެ އޮފީހުން ބުންޏެވެ. މި އެޕްލިކޭޝަން އިފްތިތާހުކޮށްދެއްވީ އޮޑިޓާ ޖެނެރަލް ހަސަން ޒިޔާތު އެވެ. މި އެޕްލިކޭޝަން ގޫގްލް ޕްލޭ ސްޓޯރުން މިހާރު ވެސް ޑައުންލޯޑު ކުރެވޭނެ ކަމަށް ޕެންޝަން އޮފީހުން ބުންޏެވެ.
" އަދި ހަމައެކަނި އެންޑްރޮއިޑް ބޭނުންކުރައްވާ ފަރާތްތަކަށް އެހެންނަމަވެސް އެޕަލް ސްޓޯރުން ވެސް ވަރަށް އަވަހަށް ލިބޭނެ،" ޕެންޝަން އޮފީހުގެ އޮފިޝަލަކު ވިދާޅުވިއެވެ.
ޕެންޝަން އޮފީހުގެ ކޮންޓެކްޓް ސެންޓަރާއި ކޮންޓެކްޓް ނަމްބަރު ތައާރަފްކޮށްދެއްވީ ޕެންޝަން ބޯޑު މެމްބަރު ފަރީހާ ޝަރީފެވެ. ޕެންޝަން އޮފީހުގެ ކޮންޓެކްޓް ނަމްބަރު 1441 ތައާރަފު ކުުރުމުގެ ބޭނުމަކީ ހިދުމަތް ލިބިގަތުމަށް ގުޅާ ފަރާތްތަކަށް ވީހާވެސް ފަސޭހަކަމާއި އެކު ހިދުމަތް ދިނުން ކަަމަށް ޕެންޝަން އޮފީހުން ބުންޏެވެ.
" ހިދުމަތް ހޯދާ ބޭފުޅުންނަށް ވަގުތުން ވަގުތަށް ނުގުއްޅުވުނު ކަމުގައި ވިޔަސް އެ ގުޅުއްވި ފަރާތަކަށް ޕެންޝަން އޮފީހުން ގުޅައި އެފަރާތަކުން އެދިވަޑައިގަންނަވާ ހިދުމަތެއްދޭނެ،" ޕެންޝަން އޮފީހުގެ އޮފިޝަލަކު ވިދާޅުވިއެވެ.