12 May 2015, 16:25
ރަށްރަށުގެ ފަރުތަކުގައި ޖަހާފައި ހުންނަ ދުރަށް އަލިފޮނުވާ ބައްތިތައް ނުވަތަ "އެއްލާ ބައްތި" ތައް މަރާމާތުކުރުމަށް ޖުމްލަ 7.4 މިލިއަން ރުފިޔާގެ ޕްރޮޖެކްޓެއް ހިންގަން ނިންމާފައިވާ ކަމަށް ޓްރާންސްޕޯޓް އޮތޯރިޓީން މިއަދު ބުނެފި އެވެ.
ވެލާނާގޭގައި މިއަދު މެންދުރު ބޭއްވި ނޫސްވެރިންގެ ބައްދަލުވުމެއްގައި ޓްރާންސްޕޯޓް އޮތޯރިޓީގެ ޗެއާމަން އަބްދުއްރަޝީދު ނާފިޒު ވިދާޅުވީ ޓްރާންސްޕޯޓް އޮތޯރިޓީން މިހާރު އެންމެ އިސްކަމެއްދީގެން ކުރަމުން އަންނަ މަސައްކަތަކީ ކަނޑު ދަތުރުފަތުރުގެ ސަލާމަތްތެރިކަން ދަތުރުވެރިންނަށް ޔަގީންކޮށް ދިނުމަށް ކަމަށެވެ.
އެގޮތުން އެކިއެކި ފަރުތަކުގައި ވޭތުވެދިޔަ ދުވަސްތަކުގައި ޖަހާފައިވާ ދުރަށް އަލިފޮނުވާ ބައްތިތައް ނުދިއްލޭ މައްސަލަ ހައްލުކޮށް އެ ބައްތިތައް ދިއްލުމަށް ހިންގަން ހަމަޖައްސާފައިވާ މަޝްރޫއަށް ޖުމްލަ 7.4 މިލިއަން ރުފިޔާ ހަރަދުވާ ކަމަށާއި އެ ބަޖެޓް މިހާރު ހަމަޖެހިފައިވާ ކަމަށް އޭނާ ވިދާޅުވިއެވެ.
ޓްރާންސްޕޯޓް އޮތޯރިޓީގެ ޗެއާމަން ނާފިޒް -- ސަން ފޮޓޯ: ފަޔާޒު މޫސާ
"ވަރަށް ގިނަ ކައުންސިލް ތަކުން ވެސް އަދި ދަތުރުވެރިންނާއި މަސްވެރިންގެ ފަރާތުން ވެސް ކެނޑިނޭޅި ހުށަހަޅަމުން އަންނަ ޝަކުވާއެއް އެ ބައްތިތައް ނުދިއްލޭ މައްސަލަ. އެ ޝަކުވާތައް އަޑުއެހުމަށްފަހު ސަރުކާރުން މިހާރު މިވަނީ އެ މައްސަލަ ހައްލުކުރުމުގެ މަސައްކަތް ފަށާފައި،" ނާފިޒް ވިދާޅުވި އެވެ.
އިތުރަށް ވާހަކަ ދައްކަވަމުން ނާފިޒް ވިދާޅުވީ، ދަތުރުފަތުރު ކުރާ ފަރާތްތަކުގެ ސަލާމަތީ ސެޓްފިކެޓް ދޫކުރުމުގެ ކަންކަން ހުރިހާ ރަށަކުން މިހާރު ހަމަޖައްސާފައިވާ ކަމަށެވެ. އެގޮތުން ގާތްގަނޑަކަށް 80 ޕަސެންޓު ރަށްރަށުގައި އެކަމަށް ބޭނުންވާ މީހުން ތަމްރީނުކޮށްފައިވާ ކަމަށް ނަފިޒް ވިދާޅުވި އެވެ.
އޭގެ ސަބަބުން ސަލާމަތީ ސެޓްފިކެޓް ހައްދަން ނުވަތަ އެ ސެޓްފިކެޓް އާކުރަން އަތޮޅުތަކުން މާލެއަށް އަންނަން ނުޖެހޭނެކަމަށް ނާފިޒް ވިދާޅުވި އެވެ.