12 May 2015, 15:19
މި އަހަރުގެ މިހާތަނަށް ޖުމްލަ 5014 އަމިއްލަ ފަރުދުންގެ ވިޔަފާރި ރަޖިސްޓްރީކޮށްދީފައިވާ ކަމަށް އިކޮނޮމިކް މިނިސްޓްރީ އިން ބުނެފި އެވެ.
އެ މިނިސްޓްރީ އިން މިހާރު ކުރިއަށްގެންދާ މަސައްކަތްތަކާ ގުޅޭ މައުލޫމާތު މީޑިއާ އަށް ހިއްސާކުރުމަށް މިއަދު ވެލާނާގޭގައި ބޭއްވި ނޫސްވެރިންގެ ބައްދަލުވުމެއްގައި އެ މިނިސްޓްރީގެ ރެޖިސްޓަރާ އޮފް ކޮމްޕެނީސް މަރިޔަމް ވިސާމް ވިދާޅުވީ މި އަހަރުގެ މިހާތަނަށް ޖުމްލަ 5014 ވިޔަފާރި ރަޖިސްޓްރީކޮށްފައިވާ އިރު ގިނައީ އަމިއްލަ ފަރުދުންގެ ވިޔަފާރިތައް ކަމަށެވެ.
"މިއަހަރު މިހާތަނަށް 4500 އަމިއްލަ ފަރުދުންގެ ވިޔަފާރި، 450 ކުންފުނި އަދި 50 ޕާޓްނާޝިޕް އަދި މީގެ އިތުރުން ހަތަރު ކޯޕަރޭޓް ސޮސައިޓީއެއް މިވަނީ ރަޖިސްޓާކޮށްފައި. އެއީ ޖުމްލަ 5000 ވިޔަފާރި،" ވިޝާމް ވިދާޅުވި އެވެ.
އޭގެ އިތުރުން މިނިސްޓްރީ އިން ކުރަމުން އަންނަ މަސައްކަތްތަކުގެ ތެރޭގައި ފޮރިން އިންވެސްޓްމަންޓްތައް ރަޖިސްޓަރީކޮށްދިނުން ހިމެނޭ ކަމަށް އޭނާ ވިދާޅުވި އެވެ.
އެގޮތުން މި އަހަރުގެ މިހާތަނަށް 600 މިލިއަން ޑޮލަރާ ގާތްކުރާ އަދަދަކަށް މިއަހަރުގެ ތެރޭގައި ފޮރިން އިންވެސްޓްމަންޓަށް ހުއްދަދޫކޮށްފައިވާ ކަމަށް އޭނާ ވިދާޅުވި އެވެ. އޭގެ ތެރޭގައި ކޮންސްޓްރަކްޝަން، ޓޫރިޒަމް، ރިއަލްއެސްޓޭޓް އަދި އެހެނިހެން ސެކްޓާތައް ހިމެނޭ ކަމަށް އޭނާ ވިދާޅުވި އެވެ.
މިދިޔަ އަހަރާއި މި އަހަރާ ދޭތެރޭގައި ޖުމްލަކޮށް ރަޖިސްޓަރީ ކުރެވުނު ފޮރިން އިންވެސްޓްމަންޓްތަކަށް ބަލާއިރު 1.8 ބިލިއަން ޑޮލަރަށް ގާތްކުރާ އަދަދެއްގެ އިންވެސްޓްމަންޓްތައް ރަޖިސްޓަރީ ކޮށްދީފައިވާ ކަމަށް ވިދާޅުވި އެވެ.
މިދިޔަ އަހަރުގެ މެއި މަހާ އަޅާ ބަލާ އިރު މި އަހަރުގެ މެއި މަހުގެ ނިޔަލަށް ފޮރިން އިންވެސްޓްމަންޓް ރަޖިސްޓަރީކޮށްފައިވާ އަދަދު ގާތްގަނޑަކަށް 50 ޕަސެންޓް އިތުރުވެފައިވާ ކަމަށް އޭނާ ވިދާޅުވި އެވެ.