12 May 2015, 13:48
އޭއެފްސީ ކަޕްގައި މާދަމާ ލާއޯސްގެ ލާއޯއެފްސީއާ ދެކޮޅަށް ނިކުންނައިރު މުހިންމު ބައެއް ކުޅުންތެރިންނަށް ކުރިމަތިވެފައިވާ އަނިޔާގެ ސަބަބުން އޭއެފްސީކަޕްގައި އެންމެ ފަހުން ކުޅުނު ދެމެޗްގައި ކުޅުނު ގޮތަށް ނުކުޅެވިދާނެކަމަށް ނިއުރޭޑިއަންޓްގެ ވަގުތީ ކޯޗް ސޮބާހް މުޙައްމަދު (ސޮބާ) ބުނެފިއެވެ.
ލާއޯސްގައި ހުރެ ސަންއަށް މަޢުލޫމާތު ދެމުން ސޮބާ ބުނީ ޑިފެންޑަރު އަކްރަމް އަބްދުލް ޣަނީ (އަކޫ) އަށާއި ވިލިއަމްއަށްވެސް އަނިޔާވެފައިވާ ކަމަށާއި އެހެންވެ ނިއުއިން އެންމެ ފަހުން އޭއެފްސީކަޕްގެ ދެ މެޗުގައި ކުޅުނު ސްޓައިލަށް ޓީމް ރާވަން އުނދަގޫ ވާނެކަމަށެވެ.
ސޮބާ ބުނީ އަނިޔާގެ ސަބަބުން އެޓީމްގެ އެއް ނަންބަރު ކީޕަރު އުޒްބެކިސްތާންގެ ޢަލީޝަ އަކްމެދޯވްއަށް ކުޅެވޭނެކަން އަދި މުޅިން ޔަޤީން ނުވާކަމަށެވެ.
އެހެން ވެއްޖެނަމަ އެޓީމްގެ ގޯލް ބަލަހައްޓާނީ ޒުވާން ގޯލްކީޕަރު މުޙައްމަދު ޔަމާންއެވެ.
ސޮބާ ބުނީ ކާޑުގެ މައްސަލައާއި އިންޖަރީގެ މައްސަލައަކީ ފުޓްބޯޅައިގައި ކުރިމަތިވާނެ މައްސަލައެއް ކަމަށާއި އެހެންކަމުން މެޗަށް ނިކުންނައިރު އެކަން ބަހަނާއަކަށް ދައްކަން ބޭނުން ނުވާކަމަށެވެ.
ނިއުއަކީ އޭއެފްސީ ކުލަބް ރޭންކަށް އަބަދުވެސް ވިސްނާ ކުލަބެއް ކަމަށާއި އަމާޒަކީ މިމެޗްގައި މޮޅުވެގެން ރޭންކުގައި އިތުރަށް ކުރިއަށް ޖެހިލުންކަމަށް ސޮބާ ބުންޏެވެ.
މާލޭގައި ލާއޯއެފްސީއާ ދެކޮޅަށް ކުޅުނު މެޗް 2-1 ގެ ނަތިޖާއަކުން ކާމިޔާބު ކުރީ ނިއުއެވެ.
ރާއްޖެއިން އޭއެފްސީ ކަޕްގައި ވާދަކުރާ އަނެއް ޓިމް ކަމުގައިވާ މާޒިޔާ މިއަދު ސިންގަޕޫރުގައި ނިކުންނާނީ އެޤައުމުގެ ވޭރިއާސް އެފްސީއާ ދެކޮޅަށެވެ.
ރާއްޖެއިން ވާދަ ކުރާ ދެ ޓީމްވެސް ވަނީ ގުރޫޕް ސްޓްޖުގައި މުބާރާތުން ކަޓާފައެވެ.