06 May 2015, 14:54
ރާއްޖޭގެ އިންސާނީ ހައްގުތަކުގެ ހާލަތު މުރާޖައާ ކުރުމުގެ ގޮތުން ޔޫއެން ހިއުމަން ރައިޓްސް ކައުންސިލަށް މިއަދު ރިޕޯޓު ހުށަހެޅުއްވުމުން ކުރީގެ ރައީސް މުހައްމަދު ނަޝީދުގެ މައްސަލައާ ގުޅޭ ސުވާލު އަންނާނެ ކަމަށާއި އެކަމުގައި ސަރުކާރުގެ ސިޔާސަތު ބަދަލުނުވާނެ ކަމަށް ފޮރިން މިނިސްޓަރު ދުންޔާ މައުމޫނު ވިދާޅުވެއްޖެއެވެ.
ރާއްޖޭގެ އިންސާނީ ހައްގުތަކުގެ ހާލަތު މުރާޖައާ ކުރުމުގެ ގޮތުން ރިޕޯޓް ހުށަހެޅުމާއި ސުވާލު ކުރުން އޮންނާނީ މިއަދު ހަވީރު 5.30 އިން ރޭގަނޑު 9.00 އަށެވެ.
"...އެކަމުގައި ހަމަ އަނެއްކާވެސް އަޅުގަނޑުމެންގެ ޖަވާބު ވަރަށް ސާފު. އެއީ ސަރުކާރަކުން މިނިވަންކޮށް އޮތް އަދުލު އިންސާފުގެ ނިޒާމަކަށް ނުވަތަ ވަކިވެފައި އޮތް ބާރުތަކުގެ ތެރެއިން ސަރުކާރަކުން އެއްވެސް ވަރަކަށް ނުފޫޒެއް ނުފޯރުވާނެ. އަދި މީގެ ކުރިން ފޯރުވާފައެއް ވެސް ނޯންނާނެ. އެހެންވީމާ އެކަން އެއޮތީ ވަކި ގޮތަކަށް ނިމިފައި،" މިއަދު އޮންނަ ޖަލްސާއާ ބެހޭ ގޮތުން ސަންއާ ވާހަކަ ދައްކަވަމުން ދުންޔާ ވިދާޅުވިއެވެ.
ރާއްޖެއަށް މިއަދުގެ ޖަލްސާގައި ކުރިމަތިވާނެ އެހެން ސުވާލުތަކުގެ ތެރޭގައި ދީނީ މިނިވަންކަން ދިނުމާއި ބެހޭ ސުވާލުތަކާއި މަރުގެ އަދަބު ތަންފީޒު ކުރުމާއިބެހޭ ސުވާލުތައް ވެސް ހިމެނޭނެ ކަމަށް އޭނާ ވިދާޅުވިއެވެ. ދީނީ މިނިވަންކަން ދިނުމަކީ ސަރުކާރުން ވެސް އަދި ރައްޔިތުން ވެސް ބޭނުން ނުވާ ކަމެއް ކަމަށް ވިދާޅުވާނެ ކަމަށް މިނިސްޓަރު ވިދާޅުވިއެވެ.
"... މިކަންތައް އޮންނާނީ މިހެންނޭ. މިސަރުކާރުގެ ސިޔާސަތު ކަނޑައެޅިގެން މިއޮތީ ހަމަ ރާއްޖޭގައި އޮންނާނީ އިސްލާމްދީން ކަމަށާއި އެނޫން އެހެން ދީނަކަށް ރާއްޖޭގައި ޖާގައެއް ނޯންނާނެއޭ،" ދުންޔާ ވިދާޅުވިއެވެ.