03 May 2015, 15:13
ނޫސްވެރިކަމުގެ މަސްއޫލިއްޔަތު އަދާކުރުމަށް ޓަކައި އޮންނަން ޖެހޭ ރައްކާތެރި މާހައުލު ނޫސްވެރިންނަށް ތަނަވަސް ކޮށްދިނުމަށް ހައިއުމަންރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ގޮވާލައިފި އެވެ.
މިއަދަކީ ބައިނަލްއަގުވާމީ ނޫސްވެރިކަމުގެ މިނިވަންކަމުގެ ދުވަސްކަމުގައިވުމާ އެކު ދުވަހުގެ މުނާސަބަތުގައި އެ ކޮމިޝަނުން ނެރުނު ބަޔާނެއްގައި ވަނީ ނޫސްވެރިކަމަށް ބޭނުންވާނެ މައުލޫމާތު ފަސޭހަ ކަމާއެކު އެފަރާތްތަކަށް ފޯރުކޮށްދިނުމަކީ ވެސް ދައުލަތުގެ މުއައްސަސާތަކާއި އެންމެހާ ފަރާތްތަކުގެ ޒިންމާއެއް ކަމަށެވެ.
"ނުރައްކާތެރި ހާލަތްތަކުގައި މައުލޫމާތު ހޯދައި އާއްމުކުރުމުގައި ނޫސްވެރިންނަށް ގޮންޖެހުންތަކާ ކުރިމަތިވާ ހިނދުވެސް ފަސްނުޖެހި އެކަން ކުރަމުން އަންނަކަން ފާހަގަކޮށް ތައުރީފު ކުރަމެވެ. ނޫސްވެރިކަމުގެ މަސްއޫލިއްޔަތު އަދާކުރުމަށް ޓަކައި އޮންނަން ޖެހޭ ރައްކާތެރި މާހައުލު ނޫސްވެރިންނަށް ތަނަވަސް ކޮށްދިނުމާއި، ނޫސްވެރިކަމަށް ބޭނުންވާނެ މައުލޫމާތު ފަސޭހަކަމާ އެކު އެފަރާތްތަކަށް ފޯރުކޮށްދިނުމަކީ ދައުލަތުގެ މުއައްސަސާތަކާއި އެންމެހާ ފަރާތްތަކުގެ ޒިންމާއެއްކަމަށް ވީހިނދު، މި ޒިންމާ ފުރިހަމައަށް އަދާކުރުމާ އެކު، ނޫސްވެރިކަމުގެ މިނިވަންކަމަށް އިހްތިރާމްކުރުމަށް އެންމެހާ ފަރާތްތަކަށް ގޮވާލަމެވެ،" އެޗްއާރްސީއެމްގެ ބަޔާނުގައިވެ އެވެ.
އެޗްއާރްސީއެމްގެ ބަޔާނުގައި ވަނީ ނޫސްވެރިކަމުގެ މިނިވަންކަން އޭގެ އެންމެ ފުރިހަމަ ގޮތުގައި ލިބިދިނުމަށްޓަކައި އެތަކެއް މަސައްކަތެއް ކުރަންޖެހިފައިވާ ކަމަށެވެ. އަދި ނޫސްވެރިކަމުގެ ހާލަތަށް ނަޒަރު ހިންގާލާ އިރު މިއަދު ނޫސްވެރިންނަށް ތަފާތު ގޮންޖެހުންތަކެއް ހުރިކަމަށް ވެސް އެޗްއާރްސީއެމް އިން ވަނީ ބުނެފަ އެވެ.
"....މިގޮތުން ނޫސްވެރިން ފާޅުކުރާ ޚިޔާލަކުން ނުވަތަ އަދާ ކުރާ ރޯލަކުން އެފަދަ ފާރަތްތަކުގެ މިނިވަންކަން ގެއްލި ނުރައްކަލާއި ކުރިމަތިލާން ޖެހޭކަމީ ގަބޫލުކުރަން ޖެހޭ ހަގީގަތެކެވެ. މުޖުތަމައުގައި ހުރި މައްސަލަތަކަށް ހައްލެއް ހޯދުމަށް ޓަކައި ކަމާ ބެހޭ އެންމެހައި ފަރާތްތަކުގެ ސަމާލުކަމަށް އެކަންކަން ގެނައުމުގައި ބިރުވެރިކަމެއް ނެތި ތެދުވެރިކަމާއި އިޚްލާސްތެރިކަމާއި ފުރިހަމަ މިނިވަންކަމާ އެކު އެމައުލޫމާތު ފޯރުކުރެވެންޖެހޭނެ ކަމަށް މިކޮމިޝަނުންދެކެމެވެ،" އެޗްއާރްސީއެމްގެ ބަޔާނުގައިވެ އެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަސް ފާހަގަކުރުމުގެ ގޮތުން ދުވަހުގެ މުނާސަބަތުގައި ޔުނެސްކޯ އިން މިއަހަރު ކަނޑައަޅާފައިވާ ޝިއާރަކީ "ލެޓް ޖާނަލިޒަމް ތްރައިވް! ޓުވާޑްސް ބެޓާ ރިޕޯޓިންގް، ޖެންޑާ އީކުވަލިޓީ އެންޑް ސޭފްޓީ އިން ދަ ޑިޖިޓަލް އޭޖް" އެވެ.
ރިޕޯޓާސް ވިތައުޓް ބޯޑާސް 2015ގައި ފާހަގަކޮށްފައިވާ ގޮތުން ނޫސްވެރިންނަށް ލިބިދޭންޖެހޭ މިނިވަންކަމާއި ރައްކާތެރިކަމާއި ނޫސްވެރިންނަށް ނުވަތަ ނޫސްވެރިކަމުގެ ދާއިރާގައި މަސައްކަތްކުރާ ފަރާތްތަކަށް ގާނޫނީ ގޮތުން ލިބިދޭން ޖެހޭ ހިމާޔާތާއި ނޫސްވެރިންނަށް ފަސޭހަކަމާ އެކު މަސައްކަތް ކުރެވޭނެ މާހައުލެއް ގާއިމް ކުރުމަށް ދުނިޔޭގެ ގިނަ ގާއުމުތަކުން ސަމާލުކަން ނުދޭކަން ފާހަގަ ކޮށްފައިވެ އެވެ.
މިދިޔަ އަހަރާއި އަޅާބަލާ އިރު 2015 ވަނައަހަރު އާންމުކޮށްފައިވާ ވޯލްޑް ޕްރެސް ފްރީޑަމް އިންޑެކްސްގައި ރާއްޖޭގެ ނޫސްވެރިކަމުގެ މިނިވަންކަން ހަތަރު ދަރަޖަ ދަށަށް ގޮސްފައިވާކަން ފާހަގަ ކޮށްފައިވެ އެވެ.