28 Apr 2015, 09:33
ބާރުގަދަ ބިންހެލުމެއް އައިސް ބޮޑެތި ގެއްލުންތައް ލިބިފައިވާ ނޭޕާލުގައި ތިބި ދިވެހިން ރާއްޖެ ގެނައުމަށް ގައުމީ އެއާލައިން މޯލްޑިވިއަން ނޭޕާލަށް ދިއުމަށް ޓަކައި އިންޑިއާ އިން ނަގަން ޖެހޭ ހުއްދަތައް ލިބިފައިވާ ކަމަށާއި ނަމަވެސް ނޭޕާލުން ލިބެން ޖެހޭ ހުއްދަތައް އަދިވެސް ނުލިބޭ ކަމަށް އެއެއާލައިން އިން ބުނެފި އެވެ.
މޯލްޑިވިއަންގެ ހެޑް އޮފް އެޑްމިނިސްޓްރޭޝަން އަލީ ނަޝާތު މިއަދު "ސަން" އަށް ވިދާޅުވީ އެއީ އިންޑިއާ މަތިން އުދުހިގެން ކުރަން ޖެހޭ ދަތުރަކަށް ވުމުން އިންޑިއާ އިން ނަގަން ޖެހޭ ހުއްދަ ލިބިފައިވީ ނަމަވެސް އަދިވެސް ނޭޕާލަށް ލިބެން ޖެހޭ ހުއްދަ ނުލިބޭ ކަމަށެވެ.
"ނޭޕާލަށް ޖައްސަން އެއެޕޫވް ނުލިބިގެން މިއުޅެނީ، [ހުއްދަ ލިބޭނެ އިރެއްވެސް] އަދި ނޭނގެ، އެކަމުގައި މުޅިންހެން މިއުޅެނީ ފޮރިން މިނިސްޓްރީގެ ބޭފުޅުންނާ އެކު،" ނަޝާތު ވިދާޅުވި އެވެ.
އޭނާ ވިދާޅުވީ އެއެއާލައިން އޮތީ ތައްޔާރަށް ކަމަށާއި ހުއްދަތައް ލިބޭހާ އަވަހަށް ނޭޕާލަށް ދިވެހިން ބަލައި ދިއުމަށް ފުރާނެ ކަމަށެވެ.
ބާރުގަދަ ބިންހެލުމެއް އައިސް ބޮޑެތި ގެއްލުންތައް ލިބިފައިވާ ނޭޕާލުގައި ތިބި ދިވެހި ދަރިވަރުންގެ ތެރެއިން 14 ދަރިވަރަކު ވަނީ އިންޑިއާ އަށް ގެންގޮސްފަ އެވެ.
އިންޑިއާގައި ހުންނަވާ ރާއްޖޭގެ ސަފީރު އަހުމަދު މުހައްމަދު އިއްޔެ ސަން އަށް ވިދާޅުވީ އެ 14 ކުދިން އިންޑިއާގެ ހޮޓަލެއެއްގައި ބޭއްތިބުމާއި އަދި މިއަދު ސްރީލަންކަންގެ ފްލައިޓަކުން މާލެ ފޮނުވުމުގެ ހުރިހާ ހަރަދެއް ވެސް ކުރާނީ ދިވެހި ސަރުކާރުން ކަމަށެވެ.
މިހާތަނަށް ބެލި އިރު ނޭޕާލުގައި 100 ވަރަކަށް ދިވެހި ކިޔަވާކުދިން ތިބިކަމަށް އެނގިފައިވެ އެވެ. އެއެންމެންގެ ހާލުވެސް ރަނގަޅު ކަމަށް ފޮރިން މިނިސްޓްރީ އިން މައުލޫމާތުދެ އެވެ.
ނޭޕާލުގެ ކަތަމަންޑޫއަށް ރިކްޓާ މިންގަނޑުން 7.9 މެގްނެޓިއުޑްގެ ބާރުމިނުގައި އައި ބިންހެލުމުގައި 3000 އަށްވުރެ ގިނަ މީހުން މަރުވެ ގިނަ ރައްޔިތުން ހާލުގައިޖެހިފަ އެވެ.