27 Apr 2015, 14:42
ރެއާލް މެޑްރިޑް ސެލްޓަ ވީގޯގެ މައްޗަށް 4-2ގެ ނަތީޖާއަކުން ކާމިޔަބު ހޯދި މެޗްގައި ރެއާލްއަށް ދެ ލަނޑު ޖަހައިދިން ހާވިޔާ "ޗިޗަރީޓޯ" ހެނާންޑޭޒް އަކީ އެޓީމަށް ކިހާ މުހިންމު ކުޅުންތެރިޔެއްކަން އޭނާ ސާބިތުކޮށްދީފިއެވެ.
ރޭ ސެލްޓަގެ ދަނޑު ބަލައިޑޯސްގައި ކުޅުނު މިމެޗްގައި ޗިޗަރީޓޯވަނީ ދެހާފުގައިވެސް ލަނޑުޖަހާފައެވެ.
ސެލްޓާގެ ކީޕަރު އަލްވަރޭޒް ކޮންޑޭ ކައިރިން ބޯޅަ ނައްތާލުމަށްފަހު ޗިޗަރިޓޯ ބޯޅަ ކުރިއަށްފޮނުވާލަނީ --- ފޮޓޯ/ އޭޕީ
މެޗްގައި ފުރަތަމަ ލީޑް ނެގީ ސެލްޓައިންނެވެ. މެޗްގެ 9 ވަނަ މިނެޓްގައި ޗިލީގެ ޤައުމީ ޓީމްގެ މިޑްފީލްޑަރު ފަބިއަން އޮރެއްޔާނާ ތަނަވަސްކޮށްދިން ފުރުސަތަކުން ސްޕެއިންގެ ނޮލީޓޯއެވެ.
ނޮލީޓޯ މިލަނަޑު ކާމިޔާބު ކުރިތާ ހަތް މިނެޓް ފަހުން މެޗްގެ 16 ވަނަ މިނެޓްގައި ރެއާލަށް ނަތީޖާ ހަމަހަމަ ކޮށްދިނީ ޖަރުމަންގެ މިޑްފީލްޑަރު ޓޯނީ ކުރޫޒެވެ. މިއީ ސެލްޓަގެ ޑިފެންސަށް ހެދުނު މިސްޓޭކެއްގައި ސާފުކޮށްލި ބޯޅަ ކުރޫޒަށް ލިބުމުން އޭނާ ގޯލަށް ފޮނުވާލައިގެން ކާމިޔާބު ކުރި ލަނޑެކެވެ.
ޓޯނީ ކުރޫޒް ލަނޑު ޖެހުމަށްފަހު އުފާ ކުރަނީ --- ފޮޓޯ/ އޭޕީ
ރެއާލްއިން ލީޑް ނެގި ލަނޑު ޗިޗަރީޓޯ ކާމިޔާބުކޮށްދިނީ މެޗްގެ 24 ވަނަ މިނެޓްގައެވެ. މިއީ ކޮލަމްބިއާގެ ޖޭމްސް ރޮޑިރިގޭޒް ސެލްޓަގެ ޕެނަލްޓީ އޭރިއާ ތެރެއަށް ހުރަސް ކުރި ބޯޅައަކުން ކާމިޔާބު ކުރި ލަނޑެކެވެ.
ރެއާލްއިން ލީޑް ނެގިނަމަވެސް ލީޑްގައި މާގިނައިރަކު ނޯވެވުނެވެ. ރެއާލްއިން ލީޑް ނެގިތާ ހަތަރު މިނެޓް ފަހުން ސެލްޓަގެ ޢުމުރުން 19 އަހަރުގެ ޒުވާން ފޯވަޑް ސްޕެއިންގެ ސެންޓި މިނާ ވަނީ ސެލްޓަށް ނަތީޖާ ހަމަހަމަކޮށްދީފައެވެ. މިލަނޑުވެސް އެޓީމަށް ކާމިޔާބު ކޮށްދީނީ ފުރަތަމަ ލަނޑު ޖެހުމުގައިވެސް ފުރުޞަތު ތަނަވަސްކޮށްދިން އޮރެއްޔާނާއެވެ.
މެޗްގެ ފުރަތަމަ ހާފުގައި ރެއާލަށް އަލުން ލީޑް ނަގައިދިނީ ފުރަތަމަ ހާފްގެ 43 ވަނަ މިނެޓްގައި ރޮނާލްޑޯ ތަނަވަސްކޮށްދިން ބޯޅައަކުން ޖޭމްސް ރޮޑްރިގޭޒްއެވެ.
ލަނޑު ޖެހުމަށްފަހު ޖޭމްސް ރޮޑްރިގޭޒް އުފާކުރަނީ ---- ފޮޓޯ/ އޭޕީ
ޗިޗަރީޓޯގެ ދެވަނަ ލަނޑު ކާމިޔާބު ކުރީ ދެ ވަނަ ހާފްގެ 24 ވަނަ މިނެޓްގައެވެ. މިއީ ސާޖިއޯ ރާމޯސް ތަނަވަސްކޮށްދިން ބޯޅައަކުން ކާމިޔާބު ކުރި ލަނޑެކެވެ.
މިމެޗުން ރެއާލް މޮޅުވުމުން އެޓީމު ވަނީ 79 ޕޮއިންޓް ލިބި ބާސެލޯނާގެ ފަހަތުން ތާވަލްގެ ދެވަނައިގައި ވިއްދާފައެވެ.
ރެއާލް މެޑްރިޑްގެ ކުޅުންތެރިން އުފާކުރަނީ --- ފޮޓޯ/އޭޕީ
އެއްވަނައިގައި އޮތް ބާސެލޯނާއާ ރެއާލްއާ އޮތީ ދެޕޮއިންޓް ފަރަގެކެވެ. އެޓީމް އެއްވަނައިގައިއޮތީ 80 ޕޮއިންޓާއެކުއެވެ.