25 Apr 2015, 09:37
ކިޔޭވް (އެޕްރީލް 25): ޔުކްރޭންގައި ދާޚިލީ ހަނގުރާމަ ހިނގަމުންދާ އެގައުމުގެ އިރުމަތީ ސަރަހައްދުތަކުގައި އެމެރިކާ ސިފައިން ހަރަކާތްތެރިވަމުންދާ ކަމަށް ރަޝިޔާ ކުރި ތުހުމަތު ތަކަށް ޔުކްރޭނުން އިންކާރުކޮށްފިއެވެ.
ޔުކްރޭނުގެ ޚާރިޖީ ވުޒާރާއިން ބުނީ ރަޝިޔާގެ ތުހުމަތު ތަކަކީ އަސާސެއްގެ މައްޗަށް ބިނާވެފައިވާ ތުހުމަތު ތަކެއް ނޫން ކަމުގައެވެ. އެމެރިކާ ސިފައިން ޔުކްރޭންގެ އިރުމަތީގައި ހަރަކާތްތެރިނުވާނެ ކަމަށާއި ރަޝިޔާގެ ތުހުމަތުތަކުގެ ބޭނުމަކީ ޔުކްރޭންގެ އިދިކޮޅު ހަނގުރާމަވެރިންނަށް ރަޝިޔާ އަސްކަރީގޮތުން އެހީތެރިވާ މައްސަލަ އޮއްބާލުން ކަމަށް ޔުކްރޭނުގެ ޚާރިޖީ ވުޒާރާއިން ނެރުނު ބަޔާނެއް ބުނެއެވެ.
ރަޝިޔާގެ ދިފާއީ ވުޒާރާއިން އިއްޔެ ބުނެފައިވަނީ ޔުކްރޭންގެ އިރުމަތީ ސަރަހައްދުތަކުގައި އެމެރިކާގެ އަސްކަރީ މުސްތަޝާރުންނާއި މުދައްރިބުން ހަރަކާތްތެރިވާ މަންޒަރު ފެންނަމުން ދާކަމަށާއި މިކަމާމެދު ކަންބޮޑުވާ ކަމުގައެވެ. މިއީ ޔުކްރޭންގެ ދާޚިލީ ހަނގުރާމައިގެ ތެރެއަށް އެމެރިކާ ވަނުން ކަމަށާއި މިއީ ޔުކްރޭނަށް ސުލްޙަ ގެނައުމަށް ޔޫރަޕްގެ ގައުމުތަކާއި ރަޝިޔާއާއި ޔުކްރޭނުންވެފައިވާ އެއްބަސްވުންތަކާ ޚިލާފު އަމަލެއް ކަމަށްވެސް ރަޝިޔާގެ ދިފާއީ ވުޒާރާއިން ނެރުނު ބަޔާނެއް ބުނެއެވެ.
ރަޝިޔާ މިހެން ބުނެފައިމިވަނީ ރަޝިޔާއިން ޔުކްރޭންގެ އިރުމަތީ ސަރަހައްދުތަކުގައި ވައިގެ ދިފާއީ ނިޒާމުތައް ރުކުރުވާލާފައިވާ ކަމަށް އެމެރިކާ ތުހުމަތުކޮށްފައި ވަނިކޮށެވެ. އެމެރިކާގެ ޚާރިޖިއްޔާއިން މިދިޔަ ބުދަދުވަހު ބުނެފައިވަނީ ޔުކްރޭންގެ ދާޚިލީ ހަނގުރާމަ ހިނގާ އެގައުމުގެ އިރުމަތީ ސަރަހައްދުތަކުގައި ވައިގެ ދިފާއީ ނިޒާމުތައް ރުކުރުވާލައިގެން ރަޝިޔާ ސިފައިން އެނިޒާމުތަކަށް ޔުކްރޭނުގެ އިދިކޮޅު ހަނގުރާމަވެރިން ތަމްރީން ކުރުވާމަންޒަރު ފެނިފައިވާކަމުގައެވެ. މިއީ ޔުކްރޭންގެ ދާޚިލީ ހަނގުރާމައިގެ ތެރެއަށް ރަޝިޔާ ވަނުންކަމަށްވެސް އެމެރިކާ ތުހުމަތުކޮށްފައި ވެއެވެ.
ރަޝިޔާ ގެންދަނީ މިތުހުމަތުތަކަށް އިންކާރު ކުރަމުންނެވެ. (ރޮއިޓާސް)