22 Apr 2015, 11:57
ޔޫއެފާ ޗެމްޕިއަންސް ލީގް ކުއާޓާ ފައިނަލްގައި ބާސެލޯނާއާ ފްރާންސްގެ ޕީއެސްޖީ ބައްދަލު ކުރި ދެ ވަނަ ލެގް މެޗްގައި ދެ ލަނޑުގެ ތަފާތަކުން މޮޅުވެ 5-1 ގެ އެގްރިގޭޓް ނަތީޖާއަކުން ކާމިޔާބު ހޯދައި ބާސާއިން ސެމީ ފައިނަލްގެ ޖާގައެއް ކަށަވަރުކޮށްފިއެވެ.
ރޭ ބާސާގެ ކޭމްޕްނޯ ސްޓޭޑިއަމް ގައި ކުޅުނު މިމެޗްގައި ބާސާގެ ދެލަނޑުވެސް ކާމިޔާބުކުރީ ބްރަޒިލްގެ ފޯވަޑް ނޭމާ ޑަސިލްވާއެވެ. މިއީ ނޭމާގެ ފޯމް ދައްވެފައިވާ ކަމަށް ދެކެވޭ ވާހަކައަށް އޭނާ ދިން ރައްދެކެވެ.
ޗެމްޕިއަންސް ލީގް ކުއާޓާ ފައިނަލްގެ ދެ ވަނަ މެޗްގައި ބާސާއާ ޕިއެސްޖީ ބައްދަލު ކުރި މެޗްގެ ތެރެއިން --- ފޮޓޯ/އޭޕީ
ފުރަތަމަ ލަނޑު މެޗްގެ 13 ވަނަ މިނެޓްގައި ކާމިޔާބު ކުރިއިރު ދެވަނަ ލަނޑު ނޭމާ ކާމިޔާބު ކޮށްފައިވަނީ 33 ވަނަ މިނެޓްގައެވެ.
ޗެމްޕިއަންސް ލީގް ކުއާޓާ ފައިނަލްގެ ދެ ވަނަ މެޗްގައި ބާސާއާ ޕިއެސްޖީ ބައްދަލު ކުރި މެޗްގެ ތެރެއިން --- ފޮޓޯ/އޭޕީ
މެޗަށްފަހު ވާހަކަ ދައްކަމުން ބާސާގެ ކޯޗް ލުއިސް އެންރީކޭ ބުނީ ކުރިއަށް އޮތީ ބާސާއަށް އެންމެ ބޭނުންވި ވަގުތަކަމަށާއި ބޭނުންވަނީ ހުރިހާ ތައްޓަކަށްވެސް ވާދަ ކުރުމަށް ކަމަށެވެ.
"މިހާރުމިވަނީ ބާސާއިން އެންމެ ބޭނުވާ ހިސާބަށް އާދެވިފައި ސިޒަން ފެށުމުގެ ކުރިންވެސް އަހަރެމެން އަމާޒު ކުރިން ހުރިހާ ތައްޓަކަށްވެސް ބާސާއިން ވާދަކުރަން،" ލުއިސް އެންރީކޭ ބުންޏެވެ.
ސެމީ ފައިނަލް މެޗްގައި ބާސާއިން ބައްދަލު ކުރަންޖެހޭނީ އެޓީމާ ވާދަވެރި ދެޓީމް ކަމުގައިވާ ރެއާލް މެޑްރިޑާ އެތުލެޓިކޯ މެޑްރިޑް ބައްދަލު ކުރާ މެޗުން މޮޅުވާ ޓީމަކާ ދެކޮޅަށެވެ.
މިދެޓީމް ކުޅުނު ފުރަތަމަ ލެގް ގެ މެޗް ނިމުނީ 0-0 އެއް ވަރުވެގެންނެވެ. މިރޭ މިދެޓީމް ކުޅޭ މެޗު ފެށުމަށް ހަމަޖެހިފައިވަނީ ރާއްޖޭ ގަޑިން 11:45 ގައެވެ.