21 Apr 2015, 18:21
މުޒާހަރާއެއްގެ ތެރެއިން ކަމުގައި ވިއަސް އަދި އެއްވުމެއްގެ ތެރެއިން ކަމުގައިވިއަސް ޓެރަރިޒަމްގެ އަމަލުތައް ހިންގަން މަސައްކަތްކުރާ ފަރާތްތަކަށް ފުލުހުން ހުރަސް އަޅާނެ ކަމަށާއި އެފަދަ ކަންކަމަށް ފުލުހުން ޖާގައެއް ނުދޭނެ ކަމަށް ފުލުހުން ބުނެފި އެވެ.
ސްޕެޝަލިސްޓް އޮފަރޭޝަން ޑިޕާޓްމަންޓު (އެސްއޯ) ފުލުހުންގެ ފަރާތުން މިއަދު ހަވީރު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން ސްޕެޝަލް ޕްރޮޓެކްޝަންގެ ހެޑް ސަބް އިންސްޕެކްޓަރު އޮފް ޕޮލިސް ހުސައިން އަޒުހަމް ވިދާޅުވީ، ޓެރަރިޒަމަށް ހިތްވަރު ލިބޭ ގޮތަށް އެއްވެސް ފަރާތަކުން އެއްވެސް ކަމެއް ކުރާކަމަށްވާ ނަމަ ފުލުހުން އެކަންކަން ހުއްޓުވާނެ ކަމަށެވެ.
މިހާރު މާލޭގައި ހިނގަމުންދާ މުޒާހަރާތަކުގައި ފުލުހުން ބާރުގެ ބޭނުން ކުރަމުން ދަނީ ވަރަށް ކުޑަ މިންވަރަކަށް ކަމަށާއި އެގޮތުން މާލޭގައި މިފަހުގެ ތާރީހެއްގައި ހިނގި އެއްވެސް މުޒާހަރާއެއް ކޮންޓްރޯލް ކުރުމަށް ކަރުނަ ގޭސް ބޭނުން ކޮށްފައި ނުވާނެ ކަމަށް އަޒުހަމް ވިދާޅުވި އެވެ.
އޭނާ ވިދާޅުވީ، އެއްވުންތައް ރޫޅާލުމަށް ފުލުހުން ބޭނުން ކުރަމުން ދަނީ ޕެޕަރ ސުޕްރޭ ކަމަށެވެ.
"މިއަހަރު ތެރޭ އެއްވުންތައް މެނޭޖު ކުރުމަށް ސްޕެޝަލިސްޓު އޮޕަރޭޝަން ޑިޕާޓުމަންޓުގެ ފަރާތުން 35 ފަހަރެއްގެ މަތީން އެޓެންޑުވެފައިވޭ. މިގޮތަށް އެއްވުންތައް މެނޭޖު ކުރުމުގައި އަޅުގަނޑުމެން ފާހަގަކޮށްލަން ބޭނުން، ފޯސް އޮޕްޝަނެއްގެ ގޮތުން އަޅުގަނޑުމެންނަށް ބޭނުން ކުރެވިފައި ވަނީ ޕެޕަރ ސްޕްރޭ. އޭގެ މާނައަކީ މިއަހަރުގެ މިހާތަނަށް ބެޓަން، ޓިއާ ގޭސް، ރައިޓު ގަން، ތަންޑާ ފުލެޝް، ލޭޒާ ގަން މިފަދަ އެއްވެސް އެއްޗެއް ބޭނުންކޮށްފައެއް ނުވާނޭ،" އަޒުހަމް ވިދާޅުވިއެވެ.
" ޕެޕަރ ސްޕްރޭ އަޅުގަނޑުމެންނަށް ބޭނުންކުރެވިފައި ވަނީ 29 ފަހަރެއްގެ މަތީން. އަޅުގަނޑުމެން ދަންނަވާލަން ބޭނުން ވަނީ އެއްވުންތައް ރޫޅާލުމުގައި އަޅުގަނޑުމެން ބޭނުން ކުރަމުން މިދަނީ އެހާލަތާ ގުޅޭ ބާރެކޭ."
އިދިކޮޅު ފަރާތްތަކުން ކުރި މުޒާހަރާއެއްގެ ތެރެއަށް ފުލުހުން ޕެޕަރ ސްޕްރޭ ޖަހަނީ: ޕެޕަރ ސްޕްރޭ ޖަހަނީ އެއިރެއްގެ ހާލަތަށް ބެލުމަށްފަހު ކަމަށް ފުލުހުން މިއަދު ވަނީ ބުނެފައި: ސަން ފޮޓޯ/ އަލީ ނަސީރު
މާލޭގެ އެކި ސަރަހައްދުތައް 1887 ފަހަރެއްގެ މަތީން ބަލައި ފާސްކޮށްފައިވާ ކަމަށް އަޒުހަމް ވިދާޅުވިއެވެ. އަދި އެގޮތުން 277 މީހުން ބަލައި ފާސްކުރެވިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ 614 މީހަކަށް ނަސޭހަތްތެރިވެފައިވާ ކަމަށާއި ފުލުހުންގެ އެކި ޑިޕާޓުމަންޓުތަކާ ގުޅިގެން ހިންގި އޮޕަރޭޝަންތަކުގައި 81 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
މިބައްދަލުވުމުގައި ވާހަކަފުޅުދައްކަވަމުން ސްޕެޝަލް އޮޕަރޭޝަންސް ޑިޕާޓުމަންޓުގެ ޑެޕިއުޓީ ހެޑް ސަބް އިންސްޕެކްޓަރު އޮފް ޕޮލިސް އިބްރާހިމް އަހުމަދު ވިދާޅުވީ، ދިވެހިރާއްޖޭގެ އިންޓާނަލް ސެކިއުރިޓީ އަދި އެތެރޭގެ ހަމަޖެހުން ގާއިމުކުރުމަށް ކުރަންޖެހޭ ކޮންމެ ކަމެއް ގާނޫނު އަސާސީއާ ގާނޫނުތަކާ އެއްގޮތްވާ ގޮތުގެ މަތީން ފުލުހުން ކުރާނެ ކަމަށެވެ. އަދި މިހާރު މާލޭގައި ކުރަމުންދާ މުޒާހަރާތަކަކީ އެއްވެ އުޅުމުގެ ގާނޫނުގެ ތެރެއިން ސުލްހަވެރިކަމާއެކު ހިންގާ ހަރާކަތްތަކަށް ހެދުމަށް އޭނާ ވަނީ އިލްތިމާސްކޮށްފައެވެ.
"އަޅުގަނޑުމެންގެ މެންޑޭޓަކީ ދިވެހިރާއްޖޭގެ ކޮންމެ ތަނެއްގައި ވެސް އޭރަކު ދިމާވާ ހާލަތަކާ ކުރިމަތިލައި، އެކަންކަން ގާނޫނާ އެއްގޮތްވާ ގޮތުގެ މަތީން ކޮންޓްރޯލްކުރުން. މިކަން ކުރުމަކީ އަޅުގަނޑުމެންގެ ގައުމީ ވާޖިބެއް. މި ވާޖިބު އަދާކުރުމުގައި އަޅުގަނޑުމެން ޕްރޮފެޝަނަލް ކަމާއިއެކު ކުރަންޖެހޭ ކޮންމެ ކަމެއް އަދި ދިމާވާ އެއްވެސް ހާލަތެއްގައި އެންމެ ތަންކޮޅެއްވެސް ފަހަށް ނުޖެހި ކުރިއަށް ގެންދާނެ ކަމުގެ ޔަގީންކަންވެސް އަރުވަން،" އިބްރާހިމް އަހުމަދު ވިދާޅުވިއެވެ.