16 Apr 2015, 21:59
ދިރާގުގެ ހިއްސާއަކަށް 4.72 ރުފިޔާ ބަހަން އެ ކުންފުނީގެ އަހަރީ އާންމު ޖަލްސާގައި މިރޭ ފާސްކޮށްފި އެވެ.
ދިރާގުގެ ހިއްސާދާރުން އެގޮތަށް ފާސް ކުރީ ހޮޓެލް ޖެންގައި މިރޭ ކުރިއަށްދާ 2014 ވަނަ އަހަރުގެ އަހަރީ އާންމު ޖަލްސާގަ އެވެ. މިދިޔަ އަހަރު ދިރާގަށް ސާފު ފައިދާގެ ގޮތުގައި ލިބިފައި ވަނީ 701 މިލިއަން ރުފިޔާ އެވެ. މިއީ 2013 ވަނަ އަހަރު ލިބުނު ސާފު ފައިދާ އަށް ވުރެ 59 މިލިއަން ރުފިޔާ ( ނުވަތަ 9.2 އިއްސައްތަ ) އިތުުރު އަދަދެކެވެ.
ދިރާގުން ވަނީ 2014 ވަނަ އަހަރުގެ އޮގަސްޓްމަހުގަ ވެސް ހިއްސާގެ ފައިދާ ބަހާފައެވެ. އިންޓަރިމް ޑިވިޑެންޑްގެ ގޮތުގައި ވަނީ އެ ފަހަރު 342 މިލިއަން ރުފިޔާ ބަހާފައިވެއެވެ. އަދި މިރޭ ހިއްސާގެ ފައިދާގެ ގޮތުގައި ބަހަން ފާސްކުރި 359 މިލިއަން ރުފިޔާ އާއި އެކު ދިރާގުން ޖުމްލަ މިދިޔަ އަހަރަށް ބަހާ ހިއްސާގެ ފައިދާ 701 މިލިއަނަށް އަރާނެއެވެ.
އާމްދަނީގެ ގޮތުގައި ދިރާގަށް މިދިޔަ އަހަރު ވަނީ 2.1 ބިލިއަން ރުފިޔާ ލިބިފައިވެ އެވެ. ދިރާގުގެ އަހަރީ ރިޕޯޓްގައިވާ ޗެއާޕާސަންގެ ރިޕޯޓްގައި މުހައްމަދު އަޝްމަލީ ވިދާޅުވެފައި ވަނީ " އަދުގެ ވިޔަފާރީގެ މާހައުލަށް ބަލާއިރު މިއީ ހިއްސާދާރުން ކުރައްވާފައިވާ އިންވެސްޓްމެންޓަށް ރަނގަޅު ފައިދާއެެއް" ކަމުގައި ދެކޭކަމަށެވެ.
އަހަރީ އާއްމު ޖަލްސާގައި ވަނީ އާއްމުންގެ ތެރެއިން ކަނޑައަޅާ ޑިރެކްޓަރުގެ މަގާމަށް މިހާރެވެސް އެ މަގާމުގައި ހުންނެވި އިމްރާން އަލީ އިންތިޚާބުކޮށްފައެވެ. މަގާމަށް ކުރިމަތިލީ ފަރާތްތަކުގެ ތެރެއިން ޝަރުތުހަމަވާ މީހަކަށް ހުރީ ވެސް އިމްރާން އެކަނި ކަަމަށް ޗެއާޕާސަން އަޝްމަލީ ވިދާޅުވިއެވެ. ރޭގެ ބައްދަލުވުމުގައި ދިރާގުގެ އެކްސްޓާނަލް އޮޑިޓަރެއްގެ ގޮތުގައި ކޭޕީއެމްޖީ ކަނޑައަޅާފައެވެ.
އިނގިރޭސި ބަހުން ކުރިޔަށް ދިޔަ އަހަރީ ޖަލްސާގައި ދިރާގުގެ މެޖޯރިިޓީ ހިއްސާދާރު ބަޓެލްކޯގެ ބޭފުޅުން ބައިވެރިވިއެވެ.