16 Apr 2015, 15:46
އަތޮޅުތަކުގެ ސިއްހީ ޚިދުމަތްދޭ މަރުކަޒުތައް އާބާތުރަ ފިލުވުމަށް ސަރުކާރުން ފަށާފައިވާ މަޝްރޫއުގެ ދަށުން ހަތަރު ރަށެއްގައި ގާއިމްކޮށްފައިވާ ސިއްހީ މަރުކަޒުތައް މަރާމާތުކުރަން މިއަދު ބަޔަކާ ހަވާލުކޮށްފިއެވެ.
ހެލްތް މިނިސްޓްރީގައި މިއަދު ބޭއްވި ރަސްމިއްޔާތެއްގައި މަރާމާރުކުރުމަށް ހަވާލުކޮށްފައިވަނީ، ށ. ފުނަދޫ އާއި ރ. ދުވާފަރުގެ އިތުރުން ކ. ގުރައިދޫ އަދި ނ. މާޅެންދޫ ސިއްހީ މަރުކަޒެވެ.
އެ ހަތަރު ރަށުގެ ސިއްހީ މަރުކަޒު ވެސް މަރާމާތުކުރުމުގެ މަސައްކަތް އެކި ފަރާތްތަކާއި ހަވާލުކުރުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ، ހެލްތް މިނިސްޓަރު އަހުމަދު ޒުހޫރު އެވެ.
އެގޮތުން ޖުމްލަ 110 ދުވަސްތެރޭގައި މަސައްކަތް ނިންމާގޮތަށް، ށ. ފުނަދޫ އަތޮޅު ހޮސްޕިޓަލުގައި ދުވާލަކު 15 ޓަނުގެ މީރުފެން އުފައްދާ ޕްލާންޓެއް ބެހެއްޓުމުގެ މަސައްކަތް ހަވާލުކޮށްފައި ވަނީ ސްޓެޓިކް ކޮމްޕެނީ ޕްރައިވެޓް ލިމިޓެޑާއެވެ. އެ ޕްރޮޖެކްޓްގެ އަގަކީ 991،290.80 ރުފިޔާ އެވެ.
ހެލްތު މިނިސްޓްރީގައި މިއަދު ބޭއްވި ރަސްމިއްޔާތުގެ ތެރެއިން --- ސަން ފޮޓޯ: ޔޫސުފް ސޮފްވާން
އޭގެ އިތުރުން 95 ދުވަހުގެ ތެރޭގައި ނިންމާގޮތަށް 509،648.53 ރުފިޔާ އަށް ރ. ދުވާފަރު ސިއްހީ މަރުކަޒުގެ މަސައްކަތް ހަވާލުކޮށްފައި ވަނީ ޓްރައިކޯ އިންވެސްޓްމަންޓާ އެވެ. އަދި 35 ދުވަސްތެރޭ ނިންމާގޮތަށް 465،399.32 ރުފިޔާ އަށް ކ. ގުރައިދޫ ސިއްހީމަރުކަޒުގެ މަސައްކަތް ހަވާލުކޮށްފައި ވަނީ އައިއެސްއެފް ކޮންސްޓްރަކްޝަން ޕްރައިވެޓް ލިމިޓެޑާ އެވެ.
ނ. މާޅެންދޫ ސިއްހީ މަރުކަޒު މަރާމާތު ކުރުމުގެ މަސައްކަތް 42 ދުވަސް ތެރޭގައި ނިންމާގޮތަށް 292،245.70 ރުފިޔާގެ އަގަކަށް ހަވާލުކޮށްފައި ވަނީ ރަޒާ ކޮންސްޓްރަންޝަން ޕްރައިވެޓް ލިމިޓެޑާ އެވެ.
އަތޮޅުތަކުގައި ސިއްހީ ޚިދުމަތްދޭ ހުރިހާތަންތަނުގެ އާބާތުރަ ފިލުވުމުގެ މަސައްކަތަކީ ސަރުކާރުން ވަރަށް ބޮޑު އިސްކަމެއް ދީގެން މިދިޔަ އަހަރު ފަށާފައިވާ މަޝްރޫއެކެވެ. އަދި އެ މަޝްރޫއަށް ސަރުކާރުގެ ބަޖެޓުން 50 މިލިއަން ރުފިޔާ ހަރަދުވާނެ ކަމަށް ހެލްތް މިނިސްޓްރީން ބުނެއެވެ.