15 Apr 2015, 14:01
މުހީތު މަރާލި މައްސަލައިގެ ފަހު އަޑުއެހުން އަންނަ މަހު 10 ވަނަ ދުވަހު ބާއްވަން ކްރިމިނަލް ކޯޓުން މިއަދު ނިންމައިފި އެވެ.
މިއަދު ހެނދުނު ކްރިމިނަލް ކޯޓުގައި ބޭއްވި ޝަރީއަތުގެ އަޑުއެހުމުގައި ދެ ފަރާތުން ވެސް ހެއްކާ ބެހޭ ގޮތުން ވާހަކަ ދައްކައި ނިމުމުން ޝަރީއަތުން އިއުލާނުކުރީ ހުލާސާ ބަޔާން އިއްވުން އޮއްނާނީ އަންނަ މަހުގެ 10 ވަނަ ދުވަހު ކަމަށެވެ. ހުލާސާ ބަޔާނަށް ފަހު އިތުރުކަމެއް ސާފުކުރަން ނުޖެހޭ ނަމަ ދެން އޮއްނާނީ ހުކުމް އިއްވުމެވެ.
މުހީތު މަރާލި ކަމުގެ ތުހުމަތުގައި ދައުވާ ކޮށްފައި ވަނީ ގދ. ގައްދޫ އަބުލަޢީގޭ މުހުޖަތު އަހްމަދު ނާސިހު އާއި ސ. މަރަދޫ ސަލްޓަންސްވިލާ އަލީ މުޝައްފައުގެ މައްޗަށެވެ. އެކަމުގައި ބައިވެރިވި ކަމުގެ ތުހުމަތުގައި ދައުވާ ކޮށްފައި ވަނީ ޅ. ނައިފަރު ޒައިތޫނިގޭ މުހައްމަދު މައިމޫންގެ މައްޗަށެވެ.
މުހީތު މަރާލުމުގެ ކުށް ސާބިތުވެ 18 އަހަރުން ދަށުގެ ދެ ކުއްޖަކު މެރުމަށް ޖުވެނައިލް ކޯޓުން ވަނީ މިދިޔަ އަހަރު ހުކުމް ކޮށްފަ އެވެ. އަދި އެ މައްސަލަ މިހާރު ވަނީ ހައިކޯޓުގައި އިސްތިއުނާފުކޮށްފަ އެވެ.
ވަޅިން ހަމަލާދީ މުހީތު މަރާލާފައި ވަނީ 2012 ވަނަ އަހަރުގެ ފެބްރުއަރީ މަހުގެ 19 ވީ އާދީއްތަ ދުވަހުގެ (ހޮނިހިރު ދުވަހުގެ ރޭ ދަންވަރު) 1:50 އެހާކަން ހާއިރު ފިނޭންސް މިނިސްޓްރީ ކުރިމަތީ އޮންނަ ކޮޅު ބެދިފައިވާ ގޯޅިގަނޑުގެ ތެރޭގައި ސައިކަލެއްގެ މަތީގައި އޭނާ އިންދަ އެވެ.