14 Apr 2015, 14:33
ބޭންކް އޮފް މޯލްޑިވްސް (ބީއެމްއެލް) އިން ދޫކުރާ ލުއި އެކްސްޕްރެސް ލޯނު ދޭ އުސޫލަށް ބަދަލުތަކެއް ގެނެސްފައިވާ ކަމަށް އެ ބޭންކުން ބުނެފިއެވެ.
އެ ގޮތުން ލުއި އެކްސްޕްރެސް ލޯނެއް ނަގާފައިވާ ފަރާތަކަށް ލޯނުގެ އަދަދު އިތުރު ކުުރުމުގެ ފުރުސަތު ބޭންކުން ވަނީ ހުޅުވާލާފައެވެ. އެހެންނަމަވެސް މި ފުރުސަތު ބޭންކުން ދޭނީ މިހާރު ނަގާފައިވާ ލޯނު ނެގިތާ ބާރަ މަސް ދުވަސްވެފައިވާ އަދި ފާއިތުވި ހަ މަސްދުވަހު ލޯނަށް ބަރާބަަރަށް ފައިސާ ދައްކާފައިވާ ފަރާތްތަކަށެވެ.
މީގެ އިތުރުން އެކައުންޓް ޓްރާންސްފަރ، ޗެކް އަދި ނަގުދު ފައިސާއިން މަހުން މަހަށް މުސާރަ ޖަމާވިކަމުގައި ވިޔަސް މިހާރު ލުއި އެކްސްޕްރެސް ލޯނަށް އެދި ހުށަހެޅޭނެ ކަަމަށް ބޭންކުން ބުނެއެވެ. މިހާތަނަށް ބޭންކުން ލުއި އެކްސްޕްރެސް ލޯނު ދޫކޮށްފައިވަނީ ހަމައެކަނި ބީއެމްއެލްގެ މުސާރަ ޖަމާކުރުމުގެ ޚިދުމަތް މެދުވެރިކޮށް އެކައުންޓަށް މުސާރަ ޖަމާކުރާ ފަރާތްތަކަށެވެ.
" މިއީ ގިނަ ކަސްޓަމަރުން ލޯނަށް އެދި ހުށަހެޅުމުގެ ފުރުސަތު ހުޅުވާލާ އަދި ކަސްޓަމަރުންނަށް ދޭ ޚިދުމަތް އިތުރަށް ރަނގަޅުކުރުމުގެ ގޮތުން ގެނެވުނު ބަދަލެކެވެ،" ބޭންކުން މިކަމާއި ގުޅިގެން ނެރުނު ބަޔާނުގައި ވެއެވެ.
މި ބަދަލާ ގުޅޭގޮތުން ބޭންކުގެ ރީޓެއިލް ބޭންކިންގ ޑައިރެކްޓަރ މުޙައްމަދު ޝަރީފް ވިދާޅުވީ "ލުއި އެކްސްޕްރެސް ލޯނަކީ ބޭންކުގެ ލޯނުތަކުގެ ތެރެއިން އެންމެ ގިނަ ކަސްޓަމަރުން ބޭނުންވާ ލޯނު. މަތީ ތަޢުލީމް ހާސިލްކުރުމަށާއި ބޭސްފަރުވާގެ އިތުރުން ދިރިއުޅުމުގެ ތަފާތު ބޭނުންތަކަށް ކަސްޓަމަރުން ލޯނު ނަގާފައިވާ ކަން ފާހަގަކުރެވޭ. މިއަދު މިގެނެވުނު ބަދަލާއެކު ގިނަ ކަސްޓަމަރުންނަށް މި ލޯނު ބޭނުންކުރެވިގެންދާނެ،" ކަމަށެވެ.
ލުއި އެކްސްޕްރެސް ލޯނުގައި 20،000 ރުފިޔާއާއި 50،000 ރުފިޔާއާ ދެމެދުގެ އަދަދަކަށް ކަސްޓަމަރުންނަށް ފައިސާ ދޫކުރެއެވެ.