12 Apr 2015, 15:05
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހުލޫފް ފުލުހުންގެ ބަންދުން ދޫކޮށްލުމަށް ހައިކޯޓުން މިއަދު އަމުރުކޮށްފި އެވެ.
ހައިކޯޓުން މިއަދު ކުރި ހުކުމްގައި ވަނީ މަހުލޫފް އެންމެ ފުރަތަމަ ހައްޔަރުކޮށްފައި ވަނީ މިދިޔަ މާޗް މަހުގެ 25 ވަނަ ދުވަހުގެ ރޭ އިދިކޮޅު ސިޔާސީ ޕާޓީތަކުން މާލޭގައި ކުރި މުޒާހަރާގައި ފުލުހުން ބަންދުކޮށްފައިވާ ސަރަހައްދަށް ވަދެ، ފުލުހުންގެ އަމުރަށްނުކިޔަމަންތެރިވެ، ފުލުހުންގެ ދައުރު އަދާކުރުމަށް ހުރަސްއަޅާފައިވާ ކަމުގެ ތުހުމަތުގައި ކަމަށެވެ.
އެއަށްފަހު މުޖުތަމައުގެ ސަލާމަތާ ރައްކާތެރިކަމަށްޓަކައި ކްރިމިނަލް ކޯޓުން އޭނާ ފަސް ދުވަހަށް ހޯމް މިނިސްޓްރީން ކަނޑައަޅާތަނެއްގައި ބަންދުގައި ބެހެއްޓުމަށް އަމުރުކޮށްފައިވާއިރު، އެ އަމުރުގެ ދަށުން އޭނާ ބަންދުގައި ބަހައްޓާފައި ހުރީ ދޫނިދޫގައި ކަމަށް ވެސް އެ ހުކުމްގައި ވެއެވެ.
އެމުއްދަތު ހަމަވުމުން އޭނާ ފަސް ދުވަހުގެ މުއްދަތަށް ގޭބަންދުކުރަން އަމުރުކޮށްފައިވާއިރު، އެ އަމުރު ޕްރޮސިކިއުޓާ ޖެނެރަލްގެ އޮފީހުން އިސްތިއުނާފުކޮށްފައިނުވާ ކަމަށް ވެސް އެ ހުކުމްގައި ވެއެވެ.
އަދި އެއަމުރުގެ މުއްދަތު ހަމަވުމުން މުޖުތަމައުގެ ހަމަޖެހުމާއި ސަލާމަތާ ރައްކާތެރިކަމަށްޓަކައި އަނެއްކާވެސް 15 ދުވަހުގެ މުއްދަތަށް ހޯމް މިނިސްޓްރީން ކަނޑައަޅާތަނެއްގައި މަހުލޫފް ބަންދުގައި ބަހައްޓަން އަމުރުކޮށްފައިވާ ކަމަށް ވެސް ހައިކޯޓުގެ ހުކުމްގައި ވެއެވެ.
އެންމެފަހުން މަހުލޫފްގެ ބަންދުގެ މުއްދަތު އިތުރުކޮށްފައި ވަނީ މުޒާހަރާތަކުގައި ބައިވެރިނުވުމަށް ކުރި ޝަރުތައް އެއްބަސްނުވުމުން ކަމަށްވާއިރު، އެއީ ގާނޫނު އަސާސީއާ ޚިލާފު ކަމެއް ކަމަށް ކަނޑަޅައި ހައިކޯޓުން ވަނީ އޭނާ ދޫކޮށްލަން އަމުރުކޮށްފަ އެވެ.