12 Apr 2015, 14:54
އާ ގާނޫނުލް އުގޫބާތަށް ރައްޔިތުންގެ މަޖިލީހުގެ މެމްބަރުން ހުށަހަޅުއްވާފައިވާ އިސްލާހުތަކަކާ ހެދި އެ ގާނޫނަށް އަމަލު ކުރަން ފަސްކުރުމަކީ "އެންމެ ބުއްދި ވެރި ގޮތް ނޫން" ކަމަށް ޕްރޮސިކިއުޓާ ޖެނެރަލް މުހުތާޒު މުހުސިން ވިދާޅުވެއްޖެ އެވެ.
ގާނޫނުލް އުގޫބާތަށް އަމަލު ކުރުން ތިން މަހަށް ފަސްކުރުމަށް ނިންމާފައިވުމާ އެކު "ސަން" އަށް ދެއްވި އިންޓަވިއުއެއްގައި ޕީޖީ މުހުތާޒު ވިދާޅުވީ ގާނޫނުލް އުގޫބާތަށް އަމަލުކުރަށް ފެށި ނަމަވެސް އިސްލާހުތައް "މަޑު މަޑުން ހުށަހެޅިދާނެ" ކަމަށެވެ. އެހެންނަމަވެސް މަޖިލީހުން ގާނޫނުލް އުގޫބާތަށް އަމަލު ކުރަން ފަސް ކުރަން ނިންމުމުން އެކަމަށް ރައްދު ދެއްވަން ބޭނުންފުޅު ނުވާ ކަމަށް ޕީޖީ ވިދާޅުވި އެވެ.
"އެހެން ނޫން. އެހެން ސަބަބުތައް އެބަހުރި. ދިމާވާ ދަތިތަކެއް ހުރެދާނެ. މިސާލަކަށް އެ ގާނޫނަށް މުއައްސަސާތަކުން ތައްޔާރުވެފައި އޮތީ ކިހާވަރަކަށްތޯ ބެލިދާނެ. އެހެންނަމަވެސް އަޅުގަނޑުގެ ވިސްނުމުގައި އިސްލާހުތަކަކާ ހެދި ގާނޫނުލް އުގޫބާތަށް އަމަލު ކުރަން ފަސްކުރާކަށް ނުފެނޭ. އަދި އެއީ އެންމެ ބުއްދިވެރި ގޮތް ކަމަކަށް އަޅުގަނޑެއް ނުދެކެން." ޕީޖީ ވިދާޅުވި އެވެ.
ގާނޫނުލް އުގޫބާތަށް އަމަލުކުރުން ތިން މަސް ދުވަހަށް ފަސްކުރުމަށް ރައްޔިތުންގެ މަޖިލީހުން މިއަދު ފާސްކުރީ 43 މެމްބަރުންގެ ވޯޓުން ނެވެ.
މިދިޔަ އަހަރުގެ އެޕްރީމް މަހުގެ 13 ވަނަ ދުވަހު ރައީސް ޔާމިން ތަސްދީގު ކުރެއްވި އާ ގާނޫނުލް އުގޫބާތުގައި ބުނެފައިވާ ގޮތުން އެ ގާނޫނަށް އަމަލު ކުރަން ފަށާނީ ތަސްދީގު ކުރާތާ އެއް އަހަރު ފަހުންނެވެ.
ގާނޫނުލް އުގޫބާތަށް އަމަލުކުރުން ތިން މަސް ދުވަހަށް ފަސްކުރަން ރައްޔިތުންގެ މަޖިލީހުން މިއަދު ވަނީ ފާސްކޮށްފަ އެވެ.